Read Biete 2 JOHANA 1 Bible Online

2 JOHANA 1 - Biete bible

2 JOHANA 1

¹Upa khan, Nupang[1] lungthlung neh a naihei, thutaka ki lungthlunghei chibai ki bûk a. Keimah bang khom ni loiin, thutak iretu dang murdi khomin lung nangni an thlung sa;

²thutak, eimania om mai khah, kumkhuakan ei ziangah a om mai rang sikah hin.

³Thutak neh lungthlungnaah khan Pa Pathian neh Pa Naipa Jisua Krista ziang ata lungkhamna hei, khorngaina hei neh ringeina hei chu ei ziangah om a ti.

⁴Pa thupêk angkan ni nai ṭhenkahei thutaka om ki mu sikin kî lôm tak tak a nit.

⁵Nupang lungthlung, thupêk ithar ni loiin, a tîr ata ei idong kha nang iril rangin ki irziak a nit; lung rithlung risak chit rei itin nang kî ngên a nit.

⁶A thupêk angkah taka ei iom hih lungthlungna chu a nit; amahih a thupêk, a tîr ata nin iriat kha a nit, “Lungthlungnaah ni om rang a nit,” iti hih.

⁷Mi lêmtu itam takkah, Jisua Krista chu taksa riputin a zuang iti pom nuam inohei rammual pumpuiah an suak tâk a. Khaangkana mihei kha chu milak neh Krista doituhei an nit.

⁸Nin itho suak isaihei khah ichân loia, nin thalo rikip takka nin mu theina rangin rivêng inṭha rei.

⁹Tukhom Krista inriseina thu-ah om loiin a khêlin chu Pathian nei mak e. Tukhom ân riseina thu-ah a om maiin chu Pa neh Naipa ai nei a nit.

¹⁰Khasikin, tukhomin hi inriseina thu hong chôi loiin nin ziangah a hongin chu, nin inah ithlun no unla, ṭongbâi iṭha khomin lei isôn no rei.

¹¹Ṭongbâi iṭhaa sôntu chu a thil isual thoah khan ai ṭang sa a nit.

¹²Nin ziangah thu itam takkah isîr rang ki nei a; khannisela, lekha neh chiaia riziak tum mang; ei lôm arkip[2] theina rangin nin ziangah ihong a, mêlrimua risôn rangin kî tûng ual a nit.

¹³Nen zirpuinu lungthlung naihein chibai nang an ibûk a nit.