Read Biete 3 JOHANA 1 Bible Online

3 JOHANA 1 - Biete bible

3 JOHANA 1

¹Upa khan ki lungthlung tak, Gaia, thutaka lung kî thlung chibai kî bûk a nit.

²Mal lungthlung, tinrêngah ni hong inṭuma, rithla tiang neh taksa tiang ni dam a, ni risêl theina rangin nang kî ṭongṭai pêk ngai a nit.

³Suapuihei an zuang a, thutaka ni iamomzia neh thutaka ni om ngitzia an ne ril a, kî lôm tak tak a nit.

⁴Ki naihei thutakah an om iti ki riata kî lôm nêka lômna lian ual reng nei mang e.

⁵Mal lungthlung, hi suapuihei hih khualmi khom ni seh an chungah ni lei ṭhat tak tak a.

⁶Hintaka Koindanghei lâiah khom ni lungthlungna thu an isîr mai a. An inzinnah anni hi Pathian lôm lama ni lei ṭangpui theiin chu ṭha ok a ti.

⁷Krista sin ithoa inzin suak an nit a, an inzinnaah khan iamnotuhei zianga rithokin îte sanna an ilâk nuam ino a nit.

⁸Khaangkan, thutak ithlopa munka sin ei nit theina rangin eini hin hi mihei hih ei ṭangpui rang a nit.

⁹Koindanghei ziangah khan lekhathon itôite chu ker ziak tâk a; nikhomsela, Diotrefa, an lâia ruaitu chang inuam ngai khan chu ki ṭong ai uksak ino a nit.

¹⁰Khasikin, ki zuang tikin chu a sintho murdi inlang ki ta; ṭongno rila kin chungthu â sîrinsiat ngai dânhei nangni ril riai ki ti. Kha khom khah ân rupin la reh mak a, amah ngêiin suapuihei khom lei ithlun nuam mak a, â thlun nuamhei khom a khap a, koindang ata ai ûmisua ngai a nit.

¹¹Mal lungthlung, â ṭha no chu zui non la, â ṭha chu zui roh. Iṭha sintu chu Pathiana rithok a nit a, thil ṭha no sintu chu Pathian a lai mu ngai ino a nit.

¹²Demetria khah mi tin inpâk a lo a, thutaka inpâk khom ai lo a nit; keini khomin kin inpâk a, kin inpâkna hih â dik a nit iti ni riat.

¹³Ni ziangah thu itam takkah isîr rang ki nei a; nikhomsela, pen neh chiaia riziak nuam mang e.

¹⁴Zoro nâi sunga nang imu ki tûng a, kha tikah mêlrimun lar sôn ta rei.

¹⁵Thlangamna ni ziangah om riseh. Hintaka ei malhei hin chibai nang an bûk a. Ei malhei khah an sikah chibai ne lei bûk pêk chit roh.