Read Biete JUDA 1 Bible Online

JUDA 1 - Biete bible

JUDA 1

¹Jisua Krista som neh Jakoba unai Juda khan, Pa Pathianin lungkhamna neh Jisua Krista vênginzôknaa om, ikoihei kha chibai ki bûk.

²Lungkhamna hei, ringeina hei, lungthlungna hei nin chungah inpungin om riseh.

³Rual lungthlunghei, ei rêngka ei idong saninringna thu hih nin zianga riziak ki nuam tak tak ngai a; Pathianin a mi rithianghei zianga iamna thu voikah a înkol indet tâk hih ihoih ranga zâl tak isong rangin nangni thorna riziak a ṭûlin ki riat a.

⁴Nin lâiah Pathian ngaisak ino mi ṭhenkah inrûkka rizep an om a, kha mihei khan ei Pathian lungkhamna thu hih an hurna rikhûna rangin an mang a, ei ruaitu neh ei Puma neisun Jisua Krista lak ipom nuam mak a. Kha mihei khah thiamno chang ranga inkung thlâm tâk an nit.

⁵Hi thuhei hih nin iriat isai tâk ni khom seh, nangni inreh nôk kî nuam a nit. Pumapan Aigupta rama rithokin Israel mihei a san isua a; nikhomseh, an lâia iam inotuhei chu nungah a la înrimang nôk a nit.

⁶Vântirtônhei khom an nitna ten iham nuam loia, an omna mun imahei chu, an chungthu Roirêlna Nikhuan thanga irêl rangin, kumtluang zingziria khuapin izîng nuaiah ai sia a nit.

⁷Khangkah ngirin Sodom neh Gomora khuahei khom an kôlvêl khuahei neh, hurna porincheah an ripêklet sikin mi danghei lei riningna rangin kumtluang meia denginthein an iom a nit.

⁸Hi mihei khom hin khangkah ngaingirin an ichâng ngai a nit. Inlârna an mu a, kha inlârna mu sikah khan an takpum an innim a, Pathian richamneina an musit a, vân mi roinpuihei an rikôk insiat ngai.

⁹Mikaela, vântirtôn inchungtak ilua manin, Diabola neh Mosia ruak richua an risêl lâiah khan, Mikaela khan Diabola khah ṭong ṭha non rikôk nuam mak a, a ziangah, “Pumapan nang la ngo riseh,” ai ti pêk a nit.

¹⁰Hi mihei hin chu an iriatthiam ino murdi an isîrinsiat ngai a; ngaituana nei ino ramsahein an suakpui riatna an izui ngai angkah takin anni khom hin an zui sikin anmani a îsiat ngai a nit.

¹¹An chung ân khôk vang na! Kaina lampui khah an ro a, sum rizûlin Balaama sualna lampuiah an itlân a, Kora angkan an rihel a, an irmang tâk a nit.

¹²Kha mihei khan nin ziangah ruaiṭhe an rikhîlin, nin lungrithlungna ruaiṭhenaah khan lungpui tui ikhûm vang angkah an nit a, ṭi nachâng ria no berapu marangṭhat bang ingaitua mi an nit; ruatui ipom ino sûm, ithli isêm inlênghei an nit; favâng khoma irâ no thing, voinik ithi tâk, arzung puma iphâi chit angkah an nit.

¹³Tuipui risok huan, mahni mualphoina tôm, ârsi rilong diai angkah an nit a, kumtluang izîng richel chita om ranga iseh ṭianhei angkah an nit.

¹⁴Adama rithoka richi zuang risuia â sarina, Enoka khan hi mihei chungchâng hi a lei rillôk a; “En ta u, Pumapa chu a vântirtôn rithiang sâng itam takkah neh a zuang e.

¹⁵Pathian ngaisak ino murdihein Pathian ṭi loia an sintho murdi neh, ama doia ṭong ikhir tak tak an itho murdi chungchângah, Pathian ngaisak ino mi sualhei thiam no inchang rang neh mi murdi chunga roiirêl rangin ai zuang a nit,” itin.

¹⁶Kha mihei kha chu tiklâi khomin an chiar a, mi dem an rât a, anmani rizukna sual bang an rizûl a, an khâtin an ripâk a, an huam rang a omin chu mi an inpâk tot ngai.

¹⁷Rual lungthlunghei, nangni chu ei Pumapa Jisua Krista tirtônhein thu nangni an lei îrilhei khah remai rei.

¹⁸“Zoro nungkhônah chu, Pathian ngaisak ino mihein an rizukna nim izuiin, nangni la phengsan an ti,” itia nangni an îril kha.

¹⁹Kha mihei khah rammual mi, Rithla nei ino, inṭhendarna sua ngai an nit.

²⁰Rual lungthlunghei, nangni chu nin iamna rithiang takah khan mahni khâtin sininding ngit rei; Rithla Rithianga ṭongṭaiin,

²¹Pathian lungthlungnaah khan rivong inṭha unla, kumtluang ringna nangni peh rangin ei Pumapa Jisua Krista lungkhamna chu ngâk rei.

²²Ringlana neihei khah lunginkham unla;

²³ṭhenkah mei ata kêlisua nanghei chu kêlisua vak unla; ṭhenkah chu iṭi pumin lunginkham unla, an taksa rizukna nim ikop silbomhei kha itir rei.

²⁴Nin ibâ nona ranga nangni sunghual theitu, a roinpuina makung ngêia demnaboi neh râiifân takka nangni inngîr theitu,

²⁵Pathian iomsun, ne saninringtu ziangah khan, ei Pumapa Jisua Krista zârah, roinpuina hei, inlalna hei, sinthotheina hei, thuneina hei, zoro thleng tâk murdi ata atûn neh kumkhuantluangkan om mai riseh. Amen.