Read Biete THUPHUANG 1 Bible Online

THUPHUANG 1 - Biete bible

THUPHUANG 1

¹Jisua Krista thuphuang hi thil zuang itlung zel rang, Pathianin a suakhei inreh ranga ai pêk; amakhah Jisuan a vântirtôn zuang itirin, a suak Johana ziangah a zuang inriat a;

²khanchu, Johana khan Pathian thu neh Jisua thu ai dong murdihei khah a înpuang tâk a nit.

³Hi lekhabu teptu[1] neh a sunga rillôkna thuhei lei ringaia zômtuhei chu an ham a ṭhat e! Hihei murdi tlungna rang zoro hih â nâi tâk a nit.

⁴Johana khan Asia rama koindang sarikahei chibai a bûk. Pathian, Â om maiah neh Â om tâkah neh A la zuang ranga zianga rithok hei, a rêngṭhungmun makunga rithla sarika omhei zianga rithok hei,

⁵Jisua Krista, riatpuitu iamiomtak,[2] thina rithoka thoi masatak, rammuala rênghei chunga roirêltu zianga rithokhein lungkhamna neh ringeina nin ziangah om riseh. Lung a ne thlung a, a thisena ei sualhei ner sûnfâi pêktu[3],

⁶khuanetuia ne siam a, a Pa Pathian ta ranga thiampua ne siamtu ziangah, a nit, ama ziang ngêiah roinpuina neh thuneina kumkhuantluangin om riseh. Amen.

⁷En rei, sûm lâiah khin a zuang e! Mit tinrêngin mûng an ta, ama suntuhei ngêi khomin mûng an ti. Rinênga nam tinrêngin amah chu ṭâng an ti. Khangkah takah khan nîng a ti. Amen.

⁸“Keimah Alfa neh Omega[4] chu ki nit,” Pumapa Pathian, Tinrêngthotheia, Â om maiah neh Â om takah neh A la zuang rangah khan a ti.

⁹Keimah Johana, nin suapuipa, Jisua sika nuamlona idiar takka nangni tuangpuitu neh, khuanetui nitna nangni tlângpuitu hi, Pathian thu sik neh Jisuan thutak a îphuang thu ken puangna sikin Patmos tuihualah intângin ki om a.

¹⁰Pumapa nikhuah khan Rithlan ki om a; khante, ke nungtiangah khan bekul irî angkan, rôl iring takin,

¹¹“Ni thil mu rang hih lekhabuah riziak inla, koindang sarikahei: Efesi koindang hei, Smurna koindang hei, Pergamos koindang hei, Thuatira koindang hei, Sardis koindang hei, Filadelfia koindang hei, Laodikei koindang hei ziangah thon roh,” a ti ki riat a.

¹²Khante, ne sôntu imu nuamin ki hang rihêlin chu, rângkachak meiser siana sarikah ki mu a;

¹³kha meiser siana lâiah khan miriam i-ang, a keṭim idêna zakorfual ihâk rângkachak kongkhit ikhit ki mu a,

¹⁴A sam chu beramul angkana ṭek neh ivur angkana vâr a nit a, a mit chu meichok angkah a nit.

¹⁵A kephahei chu dâr ritle, meipuia hâl inrithiang tâk angkah a nit a, a rôl chu tuikhanglian irî vung vung angkah hi a nit.

¹⁶A kut changtiang ârsi sarikah a chôi a; a bâia rithokin khandai bêneirim ingaihtak a hong suak a, a mêl chu nîsa râtlâi tak angkana vâr a nit.

¹⁷Ani khah ki mu kaneh ithi angkah dôran a ke bulah ke lîr a. Ani khan a kut changtiang khah ki chungah arngat a, “Ṭi no roh, keimah a masatak neh a nungkhôn tak,

¹⁸â ringah chu ki nit, ki thi a; nikhomsela, ringai ta, atûn chu kumtluanga rangin kî ring nôk tâk a nit. Thina chungah neh mithi khua chungah khom richam kî nei a nit.

¹⁹Ni thil mu tâkhei, atûna thil iom maihei neh hi nunga thil la hong itlung ranghei hih riziak roh.

²⁰Ki kut changtianga ârsi sarika ni muhei neh rângkachak meiser siana sarikah ni muhei omzia inril chu amahih a nit: Ârsi sarika chu koindang sarika tirtônhei an nit a, meiser siana sarika chu koindang sarikahei an nit.