Read Biete THUPHUANG 10 Bible Online

THUPHUANG 10 - Biete bible

THUPHUANG 10

¹Khante, vântirtôn dang, irât tak, rivân ata zuang iṭum ki mu a, sûmin artuam a, a lu-ah sumrisâng arzâm a, a mêl chu inî angkah a nit a, a kehei khah mei chopui angkah a nit a.

²Lekhabu zuat ichînte riphar isai a chôi a, a ke changtiang tuikhanglian a sir a, voitiang imuang a sir a.

³Sakeibaknei irâm angkah dôra ringin â khêk a. A hang ikhêkin chu khuarî sarikahei khan rôl an isua a.

⁴Khuarî sarikahei thu sîr khah riziak ki tum a; nikhomsela, rivâna rithokin rôl ki riat a, “Khuarî sarikahei thu sîr khah ip ngit inla, riziak no roh,” a ne ti a.

⁵Khante, tuikhanglian neh imuang ikârin vântirtôn kha â ding ki mu a, a kut changtiang khah rivân tiang a phar a,

⁶kumkhuantluangka ringa, rivân neh a sunga om hei, rinêng neh a sunga om hei, tuikhanglian neh an sunga om hei isiamtu riming ichingin, “Zoro sôt khâi no nih,

⁷nikhomsela, vântirtôn â sarina khan a bekul a tum tenan chu Pathianin a thurithup, a suak zânthlahei zianga a inpuang kha, tlung rikip tâng a ti,” a ti a.

⁸Khanchu, rivâna rithoka rôl kî riat khan a ne sôn nôk a, “Tuikhanglian neh imuang ikâra ding vântirtôn kuta lekhabu zuat phar isai soh va lah roh,” a ti a.

⁹Vântirtôn ziangah khan ki va fe a, lekhabu zuat te khah ki va ni a. Ani khan, “Lan la, fa roh; ni sungah khan khâ tak tak a ta, ni bâiah chu khuaitui angkah dôrin thlum a ti,” a ti a.

¹⁰Khanchu, vântirtôn kuta rithokin lekhabu zuat te khah ki lâk a, ki fâk a; ki bâiah chu khuaitui angkah dôrin a thlum a; nikhomsela, ki hang ivol a, ki sungah chu a khâk[7] zap tâk a.

¹¹Khante, ki ziangah, “Mi tam takkahei, nam itam takkahei, ṭong itam takkahei neh rêng itam takkahei ziangah Pathian thu ni la sîr nôk rang a nit,” a ne ti a.