Read Biete THUPHUANG 12 Bible Online

THUPHUANG 12 - Biete bible

THUPHUANG 12

¹Khanchu, rivâna risinsiana thilrikhêl tak, nupangnu nîsaa rivo, a ke nuaia ithla om, ârsi sômleiinika chuang rênglukhum ikhum a zuang ilang a.

²Khâmnu khan nai a vong a, naihân a sê a, â khêk a.

³Rivânah risinsiana thilrikhêl tak, Dragon sen ilianpa, lu sarikah neh riki sômka nei, a lu-ah rênglukhum sarika khum a zuang ilang nôk a.

⁴Armei khan rivâna ârsi mun ithumka ṭhena munkah chu a zêp a, rinêngah â ṭhul riai a. Nupangnu nai khah a zuang suak kaneh a lei fâk theina rangin nupangnu matonah khan a om ngit a.

⁵Khante, naiipa, namhei chunga thîr irola roi irêl rang a nei a, a nai khah Pathian neh a rêngṭhungmun maah khan iṭhui a nit tâk a.

⁶Khante, nupangnu kha chu Pathianin mun a înrifûk pêk, ramchârah khan lâizâm a tho tâk a, amakhan sûn sâng lei rizanikah sômirukka sung an ienkol rang a nit.

⁷Khante, rivânah khan ridoina a hong om a, Mikaela neh a lôma vântirtônhei khan Dragon khah an doi a, Dragon neh a lômahei khomin an lei doi a;

⁸nikhomsela, Dragon khan inê khâi mak a, amah neh a lômahei khah rivâna om rangin iphal ni khâi mak a.

⁹Khanchu, Dragon ilianpa, rûlpui itar, Diabola neh Soitana an iti, rammual pumpui ilêmtu khah an paiiṭhul a, a lômahei neh khan rinêngah an pai iṭhul tâk a.

¹⁰Khanungchu, rivânah iring takka khêk ki riat a, “Atûn chu ei Pathianin a ne saninring tâk, a sinthotheizia hei, ân lalzia hei, a Mesia thuneizia hei a zuang ilang tâk. Ei Pathian makunga ngîr a, a sûn a zâna ei suapuihei inô ngaitu chu rivân ata paiiṭhul a nit tâk hi.

¹¹Berate thisen neh thutak an ipom ngit sikin nêtu an nit a, ringna phala ithi huam pial an nit.

¹²Khasikin, rivânhei neh a sunga omhei, lôm ta rei. Rinêng neh tuikhanglianhei o, Diabola khah nin ziangah a zuang ṭul tâk sikin nin chung ân khôk e; Diabola khan zoro itôitekah bang a nei iti a riat sikin a ning ai thik tak tak a nit,” a ti a.

¹³Dragon khan nuaiah paiiṭhul a nit iti a riatin chu naiipa neitu nupangnu khah arzûl tâk a.

¹⁴Khanchu, nupangnu khah, Dragon tôn phâk banah, kum ithumkah neh kum rilangka sunga ienkola a omna rang ramchâr tiang a vuang theina rangin mupui ilianpa rithla kâng ruaikan an pêk a.

¹⁵Nupangnu khah tuiin a fen theina rangin Dragon khan a bâia rithokin vadung tui angkana tam â phît zut zut a.

¹⁶Nikhomsela, nupangnu khah rinêngin a lei ṭangpui a, a bâi a âng a, Dragon bâi ata tui zuang iluang suak khah â lem riai tâk a.

¹⁷Nupangnu chungah khan Dragon khah a ning a thik tak tak a, nupangnu richi la omhei, Pathian thupêk izôma, Jisua thutak iamom takka inpuang ngaituhei khah idoi rangin arthok suak tâk a.

¹⁸Dragon khah tuikhanglian rikamah khan â ding tâk a.