Read Biete THUPHUANG 13 Bible Online

THUPHUANG 13 - Biete bible

THUPHUANG 13

¹Khante, tuikhangliana rithokah khan sarâng hong isuak ki mu a, riki sômkah neh lu sarikah a nei a, arkiheiah khan rênglukhum sômkah a om a, a luheiah khan Pathian rikôkinsiatna riming a chuang chit a.

²Sarâng kî mu khah keiârsi angkah a nit a, a kehei chu ivom ke a ang a, a bâi chu sakeibaknei bâi ai ang a nit. Dragon khan sarâng khah a sinthotheina hei, a rêngṭhungmun hei, archamneina liantak hei khah a pêk a.

³Sarâng lu khatkah khah ithipui thei rang dôran a pop a; nikhomsela, kha sâbe khah a hong dam nôk tâk a. Rinênga mi murdîn arkhêl an ti a, Sarâng khah an zui dûl dûl tâk a.

⁴Sarâng ziangah archamneina a pêk sikin Dragon khah mi tinin chubai an ûn a, “Sarâng angkana hih tûm â om? Tûm â doi thei rang?” an ti a.

⁵Khante, sarâng khah ripâk thei rang neh Pathian rikôkinseh thei rangin iphal a nit a, thla sômilikah thla nika sung richam inei takka châng rangin iphal a nit.

⁶Khanchu, Pathian â sîrinsiat tâk a, arming hei, a Tempil hei, rivâna omhei murdi rikôkinsia a phut tâk a.

⁷Mi rithianghei idoia inê rangin iphal a nit a, nam tin, ram tin, ṭong tin neh chi tin chunga richamneina khom a ziangah ipe a nit.

⁸Leilung insiang ma ithat tâk Berate ringna lekhabua riming ichuanghei bang ti no chu rinêng chunga mi murdîn ani khah chubai an iûn rang a nit.

⁹Tukhom riat theina kuar ineiin chu iṭha takkan ringai riseh.

¹⁰Tukhom bôia tâng rang chu bôiah itâng an ta, khandaia thi rang chu khandaiin thîng an ti. Khan, Pathian mihei chu an iding indet rang neh iamiomin an om rang a nit.

¹¹Khante, Sarâng dang rinêng ata hong isuak ki mu a. Berate riki angin riki inikah a nei a, Dragon ṭong angkan a ṭong a.

¹²Sarâng masa richamneina murdi khah sarâng masa mitmuah â lek tâk a; sarâng, ithipui rang dôra pop hong idam nôk tâk kha, rinêng neh a sunga miriam iom murdi chubai ân ûn tên tên a.

¹³Sarâng â nikna khan thilrikhêlhei a tho a, mi tin mitmuah rivân ata mei rinêngah a koi iṭhum a.

¹⁴Sarâng masa riminga sinrikhêl itam takkah isin rang iphal a nit sikin rinênga mi murdi a lêm a; sarâng, khandaia pop hong idam nôk tâka rilim khah ân ding a.

¹⁵Sarâng rilim khah a hong ṭong theina rang neh, chubai ûn nuam inohei murdi a that theina rangin sarâng rilim inring theina ritha ipe a nit a.

¹⁶Khanchu, sarâng khan mi murdi, mi lian neh mi chîn, richong neh inriang, suak neh suak nino khom an kut changtiang manih, an ichala manih, risinsiana a nampêk a;

¹⁷khasikin, sarâng riming manih, arming ritlukpui nambar manih risinsiana nei inohei khan chu tutên thil richoh thei no nia, izuar khom zuar thei no nih.

¹⁸Amahin ivâr ai nang a nit. Â sût ithiamin chu sarâng nambar khah sût riseh, miriam nambar a nit a, a nambar chu rizarukkah sômirukkah irukkah[8] a nit.