Read Biete THUPHUANG 14 Bible Online

THUPHUANG 14 - Biete bible

THUPHUANG 14

¹Khante, Zion tlângah khan Berate ding ki mu a, arming neh a Pa riming an ichala riziak mi nuai lei sîng ilikah neh sângilikah a kôlah an iding a.

²Rivâna rithokin rôl, tuikhanglian irî neh khuarî irî dur dur angkana irî ki riat a; irî kî riat khah seranda âthein an seranda an iât irî angkah a nit.

³Rêngṭhungmun matona, mîring ilikahei neh upahei makungah khan la thar an sak a, rinêng ata ritlan isuahei mi nuai lei sîngilikah neh sângilikahei bang ni no khan chu kha la khah an irsei thei ino a nit.

⁴Kha mihei kha chu nupang ata inim ino, rivong rithiang liai, Berate fena tina â zui ngai an nit, miriam lâi ata ritlan isua, Pathian neh Berate ta ranga râ masahei an nit.

⁵Milak ril tlak ngai mak a, sêlnaboi an nit.

⁶Vântirtôn dang khatkah vânlâizôla vuang ki mu a, rinênga om murdi zât tina mihei, chi tina mihei, ṭong tina mihei neh nam tina mihei zianga kumtluang Thurchi Ṭha thanginthei ranga vuang a nit.

⁷Rôl iring takkan â khêk a, “Pathian ṭi unla, chôiinrisâng rei, roi a rêl rang zoro a hong tlung tâk e; rivân hei, rinêng hei, tuikhanglian hei neh tuinâr hei isiamtu khah chubai ûn rei,” a ti a.

⁸Vântirtôn dang â nikna khan a hong zui a, “Â lîr tâk, Babilon kho roinpui, a hurna uain, nam tin tin Pathian ningthikna in-in ngai khah â lîr tâk e,” a ti a.

⁹Khante, vântirtôn dang, â thumna khan vântirtôn â khatna neh â nikna khah a hong zui a, rôl iring takkan, “Tukhom sarâng neh arlim khah chubai iûn a, an ichala manih, an kuta manih ama risinsiana chuang tâk murdi chu,

¹⁰Pathian ningthikna uain irât, a ningthikna kilâta ai sung insip khah in an ta, vântirtôn rithianghei neh Berate makungah kha mihei khah mei neh kâtin kâng a ti.

¹¹Kha mihei dengintheina meikhû khah kumkhuantluangkan khu mai a ta; sarâng neh arlim chubai iûnhei neh arming riputuhei kuttum thona khan mongtik nei no nih,” a ti a.

¹²Amahin mi rithiang, Pathian thupêk izôma Jisua ta ranga iamiomhei chu tuangdiarna an nei rang a nit.

¹³Khanchu, rivâna rithokin rôl ki riat a, “Amahih riziak roh; atûna rithokin Pumapaa thihei chu an ham a ṭhat e,” a ti a. Rithla khan, “A nit titak, an sinsôlnahei chu ringam tâng an ta; an sintho râ khan ai zui rang a nit,” a lei ti a.

¹⁴Khante, ki hang en a, sûm iṭeklang ki mu a, kha sûm chungah khan miriam i-ang hi â ṭhung a, ani khan rângkachak rênglukhum a khum a, a kutin kôida ngaihtak a chôi a.

¹⁵Khante, Tempila rithokin vântirtôn dang a hong suak a, sûm chunga ṭhung ziangah khan rôl iring takkan, “Ni kôida khah mang inla, bu khah ât roh; a ât zoro a nit tâk, rinênga buhei khah an min tâk e,” a ti a.

¹⁶Khanchu, sûm chunga ṭhung khan a kôida khah rinêngah a vaih a, rinêng buhei khah a ât tâk a.

¹⁷Khante, rivâna Tempila rithokin vântirtôn dang a hong suak nôk a, ani khom khan kôida ngaihtak a chôi a.

¹⁸Vântirtôn dang, mei chunga richamineitu, mâichâma rithokin a hong suak a, kôida ngaihtak ichôitu ziangah khan rôl iring takkan, “Ni kôida ngaihtak khah mang inla, rinênga grep irâ khû a min tâk a, zur mal roh,” a ti a.

¹⁹Khanchu, vântirtôn khan a kôida khah rinêngah a vaih a, rinênga grep irâhei khah a ât a, grep sômkhur inthûk tak, Pathian ningthikna khurpuiah khan â thun tâk a.

²⁰Khopui putianga grep sômna khurah khan grep khah a sôm tâk a; kha khura rithokah khan thisen, sakor lâkamthîr ichîm[9] tena inthûk, kilomitar rizathumkah sarika ten idên a luang zut zut a.