Read Biete THUPHUANG 15 Bible Online

THUPHUANG 15 - Biete bible

THUPHUANG 15

¹Khante, rivânah risinsiana dang, roinpui tak neh rikhêl tak ki mu a. Vântirtôn sarikan ripui sarikah an chôi a, amakhah dengintheina nungkhôn takhei a nit; khaheiah khan Pathian ningthikna chu a irkip tâk a nit.

²Khante, mei neh ripol lîmlâi tuikhanglian reng i-ang ki mu a; sarâng neh arlim neh arming nambar inê zoia hong isuakhei khah Pathian seranda pêk ichôiin lîmlâi tuikhanglian rikama ngîr ki mu sa a.

³Khante, Pathian suak Mosia lâ neh Berate lâ an sak a, “O Pumapa Pathian, Tinrêngthothei Ni sinthohei chu a roinpuin arkhêl a; Nangmah, nam tinhei Pumapa, Ni lampuihei chu a felin â dik tak tak.

⁴O Pumapa, tûm ner ming marit tho no ranga, Tûm nang chôiinrisâng ino ranga? Nangmah bang ner thiang a, Ni sintho felhei khah inlang a nit tâk sikin, Nam tinrêngin chubai nang hong ûn an ti,” itin.

⁵Kha rizoiin chu ki hang en a, rivâna Tempil ri-ong, a sungah Pathian omna Biakbûk iom ki mu a.

⁶Khanchu, Tempila rithokah khan ripui sarika chôi vântirtôn sarikahei khah puan ifâi ri-el tak isilin, an iṭâng rângkachak ruia khitin an hong suak a.

⁷Mîring ilikahei lâia khatkah khan vântirtôn sarikahei ziangah khan, Pathian kumkhuantluangka ring maia ningthikna sip rângkachak berbu sarikah kha a pêk a.

⁸Khanchu, Tempil khah Pathian roinpuina neh sinthotheina khû khan a sip tâk a; vântirtôn sarikahein ripui sarikah an hong ichôi khah a hek mâkah chu Tempilah khan tute lût thei mak a.