Read Biete THUPHUANG 16 Bible Online

THUPHUANG 16 - Biete bible

THUPHUANG 16

¹Khante, Tempila rithokah khan rôl iring takkan, vântirtôn sarikahei ziangah khan, “Fe unla, Pathian ningthikna berbu sarikahei khah rinêngah zu bunpai rei,” a ti ki riat a.

²Vântirtôn masa tak khah a fe a, a berbu khah rinêngah a bunpai a; khanchu, sarâng risinsiana neihei neh arlim chubai iûntuhei chungah khan pânsia nâ tak a suak tâk a.

³Vântirtôn â nikna khan a berbu khah tuikhanglianah a bunpai a; tui pumpui khah mithi thisen angkan thisen a chang tâk a; khanchu, tuikhangliana mîring murdi an thi riai tâk a.

⁴Vântirtôn â thumna khan a berbu khah vadunghei neh tuinârheiah a bunpai a; khanchu, thisen an chang zit tâk a.

⁵Khante, Vântirtôn khan, “O Mi Rithiang, Â om mai neh Â om tâk, ni roirêlhei chu ai fel a nit.

⁶Anni khan mi rithianghei neh zânthlahei thisen an isua a, nangman iin ranga thisen ngîr nî pêk hih, an mu tum an imu a nit,” a ti ki riat a.

⁷Khante, mâichâma rithoka rôl khan, “A nit, O Pumapa Pathian, Tinrêngthothei, ni roirêlhei chu â dikin ai fel a nit,” a ti ki riat a.

⁸Vântirtôn â lina khan a berbu khah inî-ah a bunpai a; khanchu, nîsa khah miriamhei em inrilông rangin sinthotheina an pêk a.

⁹Miriamhei khah nîsa lum taka em inrilôngin an om tâk a, kha dengintheina chunga richamineitu Pathian riming khah vâni an sâm a, an sual ata riletin amah inpâk ual mak a.

¹⁰Vântirtôn arngana khan a berbu khah sarâng rêngṭhungmunah khan a bunpai a; khanchu, a ram khah izîngin â bô khap tâk a, miriamhei khah an nat rai sikin an ileihei an sê a;

¹¹an nat sik neh an ipân sikah khan rivân Pathian chu vâni an sâm a, an sintho ṭhanohei ata chu rilet ual mak a.

¹²Vântirtôn â rukna khan a berbu khah tuipui, Eufratis tuipuiah a bunpai a; khanchu, sua tianga rêng ihong ranghei ta ranga lampui isiam thlâm a nit theina rangin vadung khah a kang tâk a.

¹³Khanchu, dragon bâia rithok neh, sarâng bâia rithok neh, zânthla lem bâia rithokin rithla nim ithumkah, uṭok reng i-ang hong isuak ki mu a.

¹⁴Khahei khah ramrili rithla, sinrikhêl isin ngaihei an nit; anni khah Pathian Tinrêngthothei Nikhua roinpuia ridoinaa hong iṭhuibûm rangin, rammual pumpuia rênghei ziangah an fe a.

¹⁵Ringai roh, inru angkan kî zuang rang a nit; inrinṭiana a puan isil ṭian chu a ham a ṭhat; khanonchu, korongboin om a ta, mualinphoiin ai om rang a nit.

¹⁶Khanchu, rithlahei khan rênghei khah mun khatkatah Hebrai ṭonga Armagedon an iti-ah khan an ṭhuibûm tâk a.

¹⁷Khante, vântirtôn â sarina khan a berbu khah boiruakah a bunpai a; khanchu, Tempila rêngṭhungmuna rithokin, “Arzoi tâk,” itin rôl iringtak a zuang suak a.

¹⁸Khanungchu, khothlâr a hong rilek a, rôl a hong suak a, khuarî a hong irî dur dur tâk a; nînupui khom a hong inîng a, rinêng chungah miriam an oma rithokin khangkah dôra nînupui inrik rêng rêng la om ngai mak, amakhah ân rik tak a la nit.

¹⁹Khanchu, kho roinpui khah mun ithumkan arkhoi a, ram tina khuahei khah a chim a; khante, a ningthikna uain kilât khah a zianga peh rangin, Babilon kho roinpui chu Pathian maah ireh maiin a om tâk a.

²⁰Khante, tuihual murdi a boi riai tâk a, itlânghei khom armang vang tâk a.

²¹Irial iliantak tak her sômringakah vêla rik, rivâna rithokin miriamhei chungah a ṭul a; khante, miriamhei khan irial sika dengintheina an itong khah a nat rai sikin Pathian vâni an sâm tâk a.