Read Biete THUPHUANG 17 Bible Online

THUPHUANG 17 - Biete bible

THUPHUANG 17

¹Khanchu, vântirtôn sarikah berbu sarika chôihei lâia khatkah khan a ne sôn a, “Hong inla, tui itam takka chunga ṭhung nochizuar inthang dengintheia a om rang tlia nang in-en ki ti.

²Rinênga rênghei khan an inrêpui ngai a, rinênga mi murdihei khomin ân rêna uain iinin an inrui ngai,” a ti a.

³Khanchu, Rithlân ramchârah vântirtôn khan a ne fepui a; khante, Pathian rikôkinsiatna riminga sip, lu sarika neh riki sômka nei, sarâng seninlâr chunga chuang nupangnu ki mu a.

⁴Kha nupangnu khan puan senduk neh seninlâr a sil a, rângkachak neh lungmantam neh sâilungvârin arvo a. Thil tiriom neh ân rêna thil porinchea sip rângkachak kilât a chôi a.

⁵Â chalah khan thu rithup, “Babilon Kho Roinpui, Rinênga Nochizuarhei neh Thil Porinchehei Nu,” itia riming riziak a om a.

⁶Khante, kha nupang khah mi rithianghei thisen neh Jisuaa martarhei thisen inruiin ki mu a. Ani khah ki mu kaneh chu ker ngai arkhêl tak tak a.

⁷Vântirtôn khan ki ziangah, “Ithôm ner ngai ni înrikhêl? Nupangnu neh a chuangna sarâng lu sarikah neh riki sômka nei omzia rithup kha nang iril ki ti.

⁸Sarâng nî mu khah a lei om tâk a, om nôk khâi mak a; khannisela, khurmongboia rithokin hong suak a ta, rimangnaah fêng a ti. Khante, rinênga miriam iomhei, leilung insiang ata Ringna Lekhabua an riming riziak inohei khan sarâng khah an mu tenan chu, a lei om tâk a, om nôk khâi mak a; nikhomsela, a hong iom nôk rang kha an ringai rikhêl tak tak a ti.

⁹Amahin vârna neh riattheina a nangzia â lang. Lu sarikahei khah nupangnu ṭhungna itlâng sarikahei khah an nit.

¹⁰Rêng sarikah khom an nit a; ringakah chu an ilîr tâk a, khatkah chu a lân lal a, khatkah chu la hong inlal mak e; a hong inlal khoma itôitekah inlal a ti.

¹¹Sarâng lei iom tâka, om nôk khâi ino khom khah rêng sarikahei lôma â riatna a nit a; rimangnaah la fêng a ti.

¹²Khante, riki sômka nî muhei khah rêng sômkah, ram la nei inohei an nit a; nikhomsela, dârkâr khatka sung chu sarâng neh richamneina ipe la nîng an ti.

¹³Khahei khan lunginrual takkan an sinthotheina neh an richamneina khah sarâng la pêng an ti.

¹⁴Khahei khan Berate khah doi an ta; nikhomsela, Berate khah pumahei Pumapa neh rênghei Rêng a nit sikin anni khah inê a ta, â nêna khah a zianga om - ikoihei, rithlanghei, iamomhei khan dong sâng an ti,” a ti a.

¹⁵Khante, vântirtôn ngir khan ki ziangah, “Nochizuarnu ṭhungna tui nî muhei khah namhei, mihei, chihei neh ṭonghei an nit a.

¹⁶Riki sômka neh sarâng nî mu khan nochizuarnu khah nel an ti. Thil ai nei murdi lah pêk riai an ta, a korongin marak an ta, a sa khom fâng an ta, meiin hâlinrivâm an ti.

¹⁷Pathian thuhei chu a hong tlung idik mâkah chu, rêng sômkahei khan a lungdo an sin theina rang neh, an inrualna rang neh, an ram kha sarâng zianga an pêkna rangin Pathianin lungrilah inthuar pêk a ti.

¹⁸Khante, nupangnu nî mu khah kho roinpui, rinênga rênghei chunga roirêltu chu a nit,” a ti a.