Read Biete THUPHUANG 18 Bible Online

THUPHUANG 18 - Biete bible

THUPHUANG 18

¹Kha rizoiin chu vântirtôn dang, richamneina liantak inei rivân ata zuang iṭum ki mu a; a roinpuinan rinêng pumpui chu a el invâr zit a.

²Ani khan rôl iring takkan, “Babilon kho roinpui â lîr tâk, â lîr tâk, ramrilihei omna neh, rithla nim tinrêng kulbing neh iva nim neh porinche tinrêng chêkinbualna a hong nit tâk.

³A hurna sika ningthikna uain irât khah nam murdîn an in tâk a; rinênga rênghein ani khah an inrêpui ngai a, rinênga rivai mihei khan a hoiinhâi mang raina khah an richongpui phâk ngai,” itin â khêk a.

⁴Khanchu, rivâna rithokin rôl dangin hingka hin a ti ki riat a, “Ki mihei, hong suak rei, khâmnu ziang ata khah hong suak rei; A sualnaheiah nin ṭang rang ni mak e, A dengtheina khom nin tong tlak rang ni mak e.

⁵Khâmnu sualnahei khan rivân khom a sun dap tâk a, Pathianin a sintho ṭhanohei khom khah a riat mai a.

⁶Nangni a tholam takkan tho unla, A sintho lam angkah takin a bâk inikan thung rei. Zu nangni a nokpêkna kilâtah khan a ta rang a bâk inika râtin nokpêk rei.

⁷Roinpui a irti neh a hoiinhâi lam angkah takin intuangin neh ngaisiat sak rei. A lungrilin, ‘Rêngnun ke ṭhung a, Numei zel ni mang, ngaisiatna tong tlak no ning e,’ ai ti kêng a nit a.

⁸Khasikin, sûnka sungin dengtheina tuang a ti, Thina hei, lusûn hei, iṭâm hei, Meia hâlinrivâm hei tuang a ti; A roi irêltu Pumapa Pathian khah ai rât a nit,” itin.

⁹Rinênga rêng, a inrêpui ngaihei neh a hoiinhâipui ngaihei khan a kângna khû khah an mu tikin chu ṭap an ta, khopui kha ṭâng an ti.

¹⁰A dengthei tuang khah itong sa an ṭi sikin ilah takah ngîr an ta, “Babilon kho roinpui neh khua det, ni chung ân khôk vang na! Ni chung ân khôk vang na! Dârkâr khatka sungin teh ni chungah siatna a tlung tâk zia,” tîng an ti.

¹¹Rinênga rivai mihei khom khan ngaisiatin ṭâng an ta, ani khah sûn an ti; tutên an neinun lak an richôk pêk khâi no sikin.

¹²A neinun rângkachak hei, tangkarua hei, lungmantam hei neh sâilungvâr hei, puan zâirimi hei, puan senduk neh seninlâr hei, sator puan hei, puan seninlâr hei, thing namhoi chi dang dang hei, saiha hei, dâr hei, thîr hei neh sâilungvâra siam thil chi dang dang hei;

¹³Thîngthal hei, ifarua namhoi hei, namhoi ihâl chi, mura neh bero hei, uain neh oliv riak hei, ibaidi neh â hûm hei; serât neh bera hei, sakor neh tâli hei, suak hei neh miriam ringna hei an nit. Khahei khah tutên richoh pêk khâi mak a.

¹⁴Rivai mihei khan, “Ni thil idit, ni irzukhei murdi khah an rimang vang tâk a; ner chongna neh ni roinpuina murdi khom a boi zoi tâk, mu nôk tlak khâi no tin e,” an ti a.

¹⁵Khaangkan, rivai mi, ama sika hong richonghei khan a dengthei tuang khah itong sa an ṭi sikin ilah takah an ngîr a,

¹⁶“Arkhêl vang na! Khopui roinpui, puan zâirimi, a senduk neh a seninlâr isil a, rângkachak neh lungmantam neh sâilungvârheia rivo ngai a chung ân khôk vang na!

¹⁷Dârkâr khatka sungin teh archongna murdi armang vang tâk zia,” tîng an ti. Rikuanga ruaituhei neh â sunga khualinzinhei, rikuangpuhei neh tuikhangliana rilo ngai murdihei khom ilah takah an ngîr a.

¹⁸A kângna meikhû khah an mun chu a ikhêk a, “Hi khua angkana khopui roinpui dang an om im a?” an ti a.

¹⁹An lu-ah vâivut an phul a, ngaisiatin an ṭâ a, “Khopui roinpui, archongna sika tuikhangliana rikuang ineihei khom lei richong sa thei, a chung ân khôk, a chung ân khôk; dârkâr khatka sungin teh a ram vang tâk zia,” an ti a.

²⁰O rivân hei, mi rithianghei, tirtônhei neh zânthlahei, a ram tâk sikin lôm rei; nin chunga a sinthohei sikin Pathianin kuttum ai tho tâk a nit hi.

²¹Khanchu, vântirtôn irât tak hin bu nôina lung ilianpa tiaka lung a lâk a, tuikhanglianah â vir a, “Babilon kho roinpui chu hingka hin ivir nîng a ta, tutên mu nôk tlak khâi no nih.

²²Seranda rîhei, theile rîhei, bekul irîhei ni sungah ireh nôk ni tlak khâi no nih. Thil isin ithiam imu rang ni sungah om tlak khâi no nia, fasum irî khom ni sungah ireh nôk ni tlak khâi no nih.

²³Meiser vâr khom ni sungah imu rang om khâi no nia, imoi neh a pasal râifân rihu khom ireh rang om khâi no nih. Ner vai mihei khah rammual pumpuia mi lianhei an nit a, ni dôi milakin rammual pumpuia mihei ilêmin an iom ngai a nit kha!” a ti a.

²⁴A sungah khan zânthlahei, mi rithianghei neh rinênga an ithat murdihei thisen suakna a nit sikin Babilon khah denginthei a nit.