Read Biete THUPHUANG 19 Bible Online

THUPHUANG 19 - Biete bible

THUPHUANG 19

¹Kha rizoiin chu rivânah mipui itam takka khêk irî ki riat a, “Halleluia! Saninringna hei, roinpuina hei, sinthotheina hei ei Pathian ta a nit.

²A roirêlna chu â dikin ai fel a nit. Ani khan nochizuar inthang, ân rêna sika rinêng iseh ngai chu, thiamno ân chang tâk. A suakhei thisen â suapêk ngai sikin phuba ai lâk tâk a nit hi,” an ti a.

³Khante, an ikhêk nôk a, “Halleluia! A kângna khû chu kumkhuantluangkan tor mai a ti,” an ti a.

⁴Khanchu, upa sôminikah ilikahei neh mîring ilikahei khah an ibok a, rêngṭhungmuna ṭhung Pathian khah chubai an ûn a, “Amen, Halleluia,” an ti a.

⁵Khante, rêngṭhungmuna rithokin rôl a hong suak a, “Nangni a suak, mi lian neh mi chîn, ama ṭituhei o, ei Pathian hi inpâk rei,” a ti a.

⁶Khanchu, mipui itam takka rôl angkan neh tuikhanglian irî vung vung angkan neh khuaripui irî angkan ki riat a, “Halleluia, Pumapa ei Pathian Tinrêngthotheia khan roi a rêl e.

⁷Râiifânin lôm ei ti u, a roinpuina chôiinrisâng ei ti, Berate nupui nei zoro a nit tâk hi, a nupui rang khom arsiam zoi diam tâk.

⁸Puan zâirimi ṭek ritle takin an inrivo tâk,” itin. Puan zâirimi khah mi rithianghei thil iṭha thohei hi a nit.

⁹Vântirtôn khan ki ziangah, “Riziak roh, Berate rineina ruaiṭhea ifialhei chu an ham a ṭhat e,” a ti a. Amah ngirin ki ziangah, “Hi thuhei hih Pathian thu dik a nit,” a ti sa a.

¹⁰Khanchu, a ke bula bokin chubai ki ûn tâk a. Ani khan ki ziangah, “Hingkan chu tho no roh, kei khom nangmah neh Jisua thutak ipomtu, ni suapuihei neh munka nin suak champui kêng kî nit. Pathian chubai ûn roh,” a ti a. Thutak Jisua iphuang khah thu sîrna rithla[10] a nit.

¹¹Khante, rivân ar-ong a, sakor ngoi ki mu a, a chunga chuang riming kha “Iamioma neh Diktaka,” a nit, ani khan idik takka roi irêlin irâl ai doi ngai a nit.

¹²A mithei khah meichok angkah a nit a, a lu-ah rênglukhum itam takkah a khum a, tute iriat ino amah bangin ai riat riming riziak a nei a.

¹³Zakorfual, thisena ichian zochit[11] â hâk a, arming chu “Pathian Thu-ah” a nit.

¹⁴Rivân sipaihei puan zâirimi iṭeklang neh ritle iarka rivohei khan sakor ngoi chunga chuangin an zui a.

¹⁵A bâia rithokin khandai ingaihtak beneirim a hong suak a, amakhan nam tin inê a ta, thîr irolin an chungah roi rêl a ti. Amahih a nit Pathian Tinrêngthotheia ningthikna inrik tak uain sômna khura chîlpoltu rang chu.

¹⁶A puanah neh â elpuiah khan, “Rênghei Rêng neh pumahei Puma,” itia riming riziak a om a.

¹⁷Khante, vântirtôn khatkah inî-a ngîr ki mu a, vânlâizôla iva vuang ngai murdi ziangah rôl iring takkan “Pathian ruaiṭhe roinpuitak rikhîl rangin hong ribûm rei.

¹⁸Hong unla, rênghei sa, sipai ulianhei sa, sipaihei sa, sakor neh a chunga chuanghei sa, mi murdi suak neh suak nino, mi lian neh mi chînhei sa nin fâka rang,” a ti a.

¹⁹Khanchu, sarâng neh rinênga rênghei neh an sipaihei khah sakor ngoi chunga chuang neh a sipaihei idoi rangin an ribûm ki mu a.

²⁰Sarâng khah an man a, zânthla lem, a mitmua sinrikhêl isin ngai khom khah an man a. Kha zânthla khan a sinrikhêl thohein sarâng nambar ineihei neh arlim chubai iûn ngaihei khah ai lêm ngai a nit. Sarâng neh zânthla lem khah an ruaikan an iringin kâta kâng meidîlah khan an paiiṭhul tâk a.

²¹Sakor chunga chuang bâia rithoka khandai hong isuak khan mi danghei khom khah ithat an nit a; ivahei khan an sa khah ikhop takkan an fâk tâk a.