Read Biete THUPHUANG 2 Bible Online

THUPHUANG 2 - Biete bible

THUPHUANG 2

¹“Efesi khua koindang tirtôn ziangah hingka hin riziak roh: ‘A kut changtianga ârsi sarika chôi a, rângkachak meiser siana sarikahei lâia rilong maiah khan hingka hin a îsîr a nit:

²Ni sinthohei ki riat, ni sin zâlsong tlia hei, ni diar tlia hei, mi sual ner ngai theino tlia hei, tirtôn ni loia tirtôn ritihei khah ni fia a, a lem an nit iti ni riat tâk tlia hei khah ki riat.

³Ni diar tak tak a, ker ming sikin ni tuang a, rizal mak che.

⁴Nikhomsela, demna nang ki la nei: a tîra lung ni ne ithlung angkah khan lung ne thlung khâi mak che.

⁵Itenâm ni îlîr tâk ringaitua ta; rilet inla, a tîra ni sintho angkah kha tho nôk ta roh. Ner let non chu ni ziangah zuang ki ta, ni meiser khah a mun ata kî thînpai rang a nit.

⁶Nikhomsela, Nikolahei sintho, ki nel lam angkah taka nî nel hi ni ṭhatna a nit.

⁷Rithlan koindanghei zianga thu a îsîr hih riat theina kuar ineiin chu iṭha takkan ringai riseh. Â nêtu murdi chu Pathian paradisa om ringna thing irâah khan ifâ ki ti.’

⁸“Smurna khua koindang tirtôn ziangah hingka hin riziak roh: ‘A masatak neh a nungkhôn tak, a thia hong iring nôk tâkah khan hingka hin a îsîr a nit:

⁹Ni tuangnahei ki riat, nen riang fapa chu ni irchong a nit. Juda tak ni loi a Juda riti, Soitana inkhômnaa mihein nang an isîrinsiat tlia khah ki riat.

¹⁰Ni tuang ranghei hih ṭi no roh. Ringai ta, nin lâia mi ṭhenkah chu tâng ina khumin, Diabola khan nangni ai fia rang a nit; sûn sômka sung tuang nin ti. Thina dênin iamiom takkan om mai roh; khanchu, chôiinrisângna rênglukhum, ringna khah nang pêng ki ti.

¹¹Rithlan koindanghei zianga a îsîr hih riat theina kuar ineiin chu iṭha takkan ringai riseh. Â nêtu murdi chu thi nikna khan îte lo thei no nih.’

¹²“Pergamos koindang tirtôn ziangah hingka hin riziak roh: ‘Khandai bêneirim ingaihtak ineiah khan hingka hin a îsîr a nit:

¹³Soitana ṭhungmun omna munah khan ni om iti ki riat; nikhomseh, ker ming ne tûk ngit a, ki riatpuitu iamiom tak Antipa, Soitana omna muna an that lâi khomah khan, ni ne iamna hih phial mak che.

¹⁴Nikhomsela, ichînteka demna nang ki nei: Nin lâia mi ṭhenkah Balaama inriseina pom ngit an om. Ani khan Balaka kha Israel naihei suala ṭhuiinrimang dân ân risei a, Israel naihei kha mirmil biakna sa fah rangin neh riditna suala lîr rangin ai ṭhui a nit.

¹⁵Khangkah ngirin, nin lâiah Nikolahei inriseina pom ngit nin om a.

¹⁶Khasikin, rilet rei, nin rilet non chu ni ziangah zuang ki ta, ki bâia khandaiah hin ki zuang idoi rang a nit.

¹⁷Rithlan koindanghei zianga thu a îsîr hih riat theina kuar ineiin chu iṭha takkan ringai riseh. Â nêtu murdi chu Manna rithup pêng ki ta, lung ivâr khom pêng ki ti; kha lungah khan mi dang tutên an iriat ino, â dongtu bang riat rang riming ithar ai chuang a nit.’

¹⁸“Thuatira koindang tirtôn ziangah hingka hin riziak roh: “Pathian Naipa, meichok angkana mit inei a, dâr ritle angkana kepha neiah khan hingka hin a ti:

¹⁹Ni sinthohei ki riat, lung ni ne thlung tlia hei, ni iamom tlia hei, ni sintho tlia hei, ni diar tlia hei, a tîra nêkan atûna ni sintho ṭhat ual tâk tlia hei khom ki riat.

²⁰Nikhomsela, demna nang ki nei; kha nupang, Jezebeli, zânthla ritinu khah ner ngai thei sikin. Ani khan ki suakhei mirmil biakna sa ifaa ridi song rangin ân risei a, a ṭhui inrimang ngai.

²¹A sual ata riletna rangin zoro ki pêk a; khanniseh, riditna sual khah ithla nuam mak e.

²²Ringai roh, natna zâlmunah pai ki ta, an thil song khah an rilet non chu ân rêpuihei khom dengtheina rikhêl takin lungzîng sak ki ti.

²³Ama zuituhei khom that ki ti; khanchu, koindanghei murdîn keimah hih mihei lungril neh ngaituana reh riaitu ki nit iti riang an ti. Nin rêngkan nin sintho angkah chitin nangni pêng ki ti.

²⁴“Nikhomsela, nangmani Thuatira khuaa mi, a danghei murdi khan chu hi inriseina ṭhano hih ipom mak chei a, ‘Soitana thu rithup inthûk,’ an itihei khom nin ipom no sikin phurik dang îte nangni bôk pêk no ning kî ti a nit.

²⁵Ki zuang nôk mâkah chu nin inei isa khah vong ngit rei.

²⁶Â nêtu, a mong idêna ki lungdo sin chu nam tin chunga richamneina pêng ki ti.

²⁷Nam tin chungah khan thîr irol imangin roi rêl a ta, ipil bêl angkan ito khoi chit a ti.

²⁸Pa zianga rithoka ki dong sikhovâr khah peh sâng ki ti.

²⁹Rithlan koindanghei zianga thu a îsîr hih riat theina kuar ineiin chu iṭha takkan ringai riseh.