Read Biete THUPHUANG 20 Bible Online

THUPHUANG 20 - Biete bible

THUPHUANG 20

¹Khante, vântirtôn khatkah rivâna rithoka zuang iṭum ki mu a, khurmongboi chabi neh zingziri lianpa a chôi a.

²Dragon, Rûlpui itar, Diabola neh Soitana khah a man a, kum sângka rangin a khuap tâk a.

³Kum sângkah a vun mâkah chu nam tin a lêm khâi nona rangin khurmongboiah a paiiṭhul a, a khâr a, â kal khap tâk a. Kha nungah khan chu zoro tôiteka rangin isua nôk nîng a ti.

⁴Khante, rêngṭhungmun ki mu a, a chunga ṭhunghei khah roi irêl thei rangin richamneina ipen an om a. Jisua thu an inpuang sik neh Pathian thu sika an lu an itanpêkhei rithla khah ki mu a. Anni khan sarâng neh arlim chubai ûn mak a, sarâng risinsiana an ichalah manih, an kutah manih omak a. Khahei khah an hong ring nôk a, kum sângka rangin Krista neh roiirêlin an om tâk a.

⁵Mithi danghei kha chu kum sângkah a vun mâkah chu la ring nôk mak a. Amahih thoinôkna masa chu a nit.

⁶Thoinôkna masaa ṭanghei chu an rithiangin an ham ai ṭhat a nit. Khahei chungah khan chu thi nikna khan richam nei khâi mak a; Pathian neh Krista ta ranga thiampu nîng an ta, amah neh kum sâng roi rêl an ti.

⁷Kum sângkah a vun tikin chu soitana khah â tângna rithokin isua nîng a ta,

⁸rammual kil ilika nam tin rithekhei, Gog neh Magog chu hong lêm a ta, ridoinaah ṭhuibûm a ta; an tam tlia chu tuikhanglian rikama ṭiai zâkah an nit.

⁹Rinêng pumpui idâpin an hong a, mi rithianghei kulpui neh khopui lung ai thlung khah an hual a. Nikhomsela, rivâna rithokin mei a zuang ṭum a, anni khah a kâng inrimang tâk a.

¹⁰Khanchu, anmani lêmtu Diabola khah, sarâng neh zânthla lem an paiiṭhulna, mei neh kât dîlah khan an paiiṭhul tâk a; amakhan sûn zânin dengthei tuang kumkhua tâng an ti.

¹¹Khante, rêngṭhungmun ivâr roinpui tak neh a chunga ṭhung ki mu a, a makunga rithokin rinêng neh rivân lâizâm an tho a, imu rang om khâi mak a.

¹²Khanchu, mithihei, mi lian neh mi chîn, rêngṭhungmun maa ngîr ki mu a, lekhabu zuathei an phar a; khante, lekhabu zuat dang, ringna lekhabu khom an phar ki mu sa a. Khanchu, mithihei khah kha lekhabua an sintho chit riziak inchuang angkah takin an chungthu irêl a nit a.

¹³Khanchu, tuikhanglian khan a sunga mithi omhei khah â sua a, thina neh mithi khua khom khan an sunga mithi an îkolhei khah an isua sa a; mi tin an sintho angkah chitin an chungthu irêl a nit tâk a.

¹⁴Khanungchu, thina neh mithi khua khah meidîlah an paiiṭhul tâk a.

¹⁵Hi meidîl hih thi nikna chu a nit. Tukhom Ringna lekhabua an riming chuang ino chu meidîlah khan an paiiṭhul tâk a.