Read Biete THUPHUANG 21 Bible Online

THUPHUANG 21 - Biete bible

THUPHUANG 21

¹Khante, rivân ithar neh rinêng ithar ki mu a; rivân masa neh rinêng masa khah a boi tâk a, tuikhanglian khom om khâi mak a.

²Khopui Rithiang, Jerusalem ithar khah, imoiin a pasal idon ranga a irvo diam ngai angkan rizoi diamkan, Pathian ziang rivân ata zuang iṭumin ki mu a.

³Rêngṭhungmuna rithokin rôl iring tak ki riat a, “Ringai ta, atûn chu Pathian omna in khah miriam lâiah a zuang om tâk: “An lâiah om a ta, a mihei nîng an ti. Pathian ngêi chu an ziangah om a ta, an Pathian nîng a ti.

⁴An mit ata mitrithli murdi rûnfâi a ti. Thina om nôk khâi no nia, Lusûn hei, ṭapna hei neh natna hei khom om khâi no nih; Thil iluihei chu a boi[12] tâk,” a ti a.

⁵Khanchu, rêngṭhungmuna ṭhung khan, “Atûn chu thiltinrêng ki siam inthar tâk,” a ti a. Khabanah, “Riziak roh, hi thuhei hih iiam a omin a îdik a nit,” a ti sa a.

⁶Khante, ki ziangah, “A zuang tlung tâk, keimah Alfa neh Omega, a bul neh a mong ki nit. Tui rihâlhei kangân chu ringna tuikuanga rithokin â tlongin pêng ki ti.

⁷Â nêtuhei kangân chu hihei hih ki zianga rithokin dong an ti: Keimah an Pathian nîng ki ta, anmani ki naihei nîng an ti.

⁸Khannisela, mi thâidôphei, iam inohei, porinchehei, mi thathei, fel inohei, dôithiamhei, mirmil ibiahei, milakbûrhei murdi omna rang mun chu mei neh kâta kâng meidîl khah a nit; amakhah thi nikna chu a nit,” a ti a.

⁹Khante, berbu sarikah, dengintheina nungkhôntak sarika sip ichôi vântirtôn sarikahei lâia khatkah khah ki ziangah a hong a, “Hong inla, Berate nupui, â moi khah nang lei inmûng ki ti,” a ne ti a.

¹⁰Khanchu, Rithla khan itlâng risâng ilianpa sîpah a ne ṭhui a, Jerusalem, khopui Rithiang khah Pathian ziang rivân ata zuang iṭum khah a nen en a.

¹¹Khopui khan Pathian roinpuina a khum a, ar-el dân chu lungmantam jaspar lung, krustal angkana vâr a nit.

¹²Kulpui bang isa tak neh risâng tak a nei a, kha kulpui khan dâikot sômleiinikah a nei a, dâikothei khah vântirtôn sômleiinikan an ngâk a. Dâikotheiah khan Israel nam sômleiinikahei riming a chuang a.

¹³Kha dâikothei khah sak tiang ithumkah, mâr tiang ithumkah, sim tiang ithumkah, thlang tiang ithumkah an om chit a.

¹⁴Khopui kulpui bang khan ringatna lungphûm sômleiinikah a nei a, kha lungphûmheiah khan Berate tirtôn sômleiinikahei riming a chuang a.

¹⁵Khante, vântirtôn ne sôntu khan khopui neh a dâikothei neh a kulpui rikhîna rangin rângkachaka siam rikhîna rol a chôi a.

¹⁶Khopui khah kil ilika nei, a dung neh a khang ar-el bang a nit a; vântirtôn khan rikhîna rolah khan arkhî a; kilomitar sânginikah rizalika sei a nit. A dung neh a khang neh arsâng tlia khah artia nat a.

¹⁷Vântirtôn khan rikhîna rol ai chôi ngirah khan kulpui khah arkhî nôk a, arsâng tlia khah mûk riza lei sômilikah ilikah a nit.

¹⁸A kulpui khah jaspar lunga siam a nit a, khopui khah lîmlâi angkah dôra rithiang rângkachak rithianga siam a nit.

¹⁹Khopui kulpui lungphûm khah lungmantam chi dang dang a nit a. Lungphûm â khatna khah jaspar lung a nit a, â nikna khah safir lung a nit a, â thumna khah ageit lung a nit a, â lina khah emeral lung a nit a,

²⁰arngana khah oniks lung a nit a, â rukna khah karnelian lung a nit a, â sarina khah kuarts lung a nit a, â riatna khah beril lung a nit a, â kuakna khah topaz lung a nit a, â sômna khah kalsidon lung a nit a, â sômleikhatna khah tarkois lung a nit a, a sômleiinikna khah amethis lung a nit.

²¹Dâikot sômleiinikahei khah sâilungvâr sômleiinikah, thlâp khatkah chita siam an nit. Kha khopui lamilian khah rângkachak rithiang, lîmlâi angkana ri-el a nit.

²²Khopui sungah khan Tempil mu mang a. Pumapa Pathian Tinrêngthothei neh Berate khah an Tempil a nit.

²³Khopui elinvâr rangin inî neh ithla nang mak a; Pathian roinpuina khan a el invâr a, Berate khah a meiser a nit.

²⁴A vârah nam tin lêng an ta, rinênga rênghei khomin an roinpuina hong chôi inlût an ti.

²⁵A dâikothei khah ri-ong mai tâng a ta, khâr tlak khâi no nia, zân om khâi no nih.

²⁶A sungah khan nam tinin an roinpuina neh chôiinrisângna hong chôi inlût an ti.

²⁷Thil inim îte hong lût thei tlak no nia, thil porinche sinhei neh milakbûrhei hong lût thei tlak no nih; Berate ringna lekhabua an riming ichuanghei bang lût thei an ti.