Read Biete THUPHUANG 22 Bible Online

THUPHUANG 22 - Biete bible

THUPHUANG 22

¹Khante, vântirtôn khan ringna tui dung a nen en a, krustal angkana ri-el a nit, Pathian neh Berate rêngṭhungmuna rithoka zuang iluang suak a,

²khopui inlâina taka lamilianah a luang a, a vapang kiangruaikan ringna thing, â râ chi dang dang sômleiinikah nei a om a, thla tin voikah â râ a, a kumah voi sômlei voi nikah â râ ngai a; kha thing nâhei khah nam tin indamna a nit.

³Khopuiah khan vânisal thil rêng rêng om khâi no nih; amakhan Pathian neh Berate rêngṭhungmun a om a, a suakhei khan chubai ûn an ta,

⁴A mêl mu mai an ta; an ichalah khan arming chuang sâng a ti.

⁵Zân om khâi no nia, meiser neh inî khom nang khâi no nih; Pumapa Pathian khan elinvâr tâng a ta, kumkhuantluangkan inlal tâng a ti.

⁶Khante, vântirtôn khan ki ziangah, “Hi thuhei hih iiam ai omin a idik a nit. Zânthlahei zianga ama Rithla petu Pumapa Pathian khan thil hong itlung zel ranghei khah a suakhei in-en rangin a vântirtôn ai tir a nit.

⁷Ringai ta, kî zuang zel rang tak a nit; Hi lekhabua rillôkna thu zômhei chu an ham a ṭhat e,” a ti a.

⁸Keimah Johana hih, hi thil murdihei imutu neh iretu ki nit. Ki riata ki mu zoi kaneh chu kha thilhei nen entu vântirtôn ke bulah khan chubai iûn rangin ke bok a.

⁹Ani khan ki ziangah, “Khangkan chu tho no roh, kei khom nangmah neh ni suapui zânthlahei neh hi lekhabu thu pom murdihei suak champui kêng kî nit hih, Pathian chubai ûn roh,” a ti a.

¹⁰Khanchu, ani khan ki ziangah, “Hi lekhabua rillôkna thuhei hih ip no roh, hihei murdi hong tlungna rang hih â nâi teng tâk a nit.

¹¹Mi fel ino chu fel inon om mai sela, mi porinchehei chu porinchen om mai sela; mi fel chu ifelin om mai sela, mi rithiang chu rithiangin om mai riseh,” a ti a.

¹²“Ringai ta, Jisuan, kî zuang zel rang tâk a nit; mi tin an sintho angkah chita peh rangin loman ki ziangah a om.

¹³Keimah Alfa neh Omega, a masatak neh a nungkhôntak, a bul neh a mong ki nit” a ti a.

¹⁴An puan risûnfâihei chu an ham a ṭhat e; khopui sungah ilûtin ringna thingkunga thei irâ khah fah thei an ti.

¹⁵Khopui putiang chu uihei,[13] dôithiamhei, ridi siahei, mi thathei, mirmil ibiahei, milak itho nuamhei neh mi lêmsiahei murdi khah om an ti.

¹⁶“Keimah Jisua hin, hi thuhei hih koindanghei nin zianga inpuang rangin ki vântirtôn ki zuang itir a nit. Davida bulpui neh a chi, sikhovâr ivârtak ki nit,” a ti a.

¹⁷Khante, Rithla neh Imoi khan, “Hong roh,” an ti a. Â riakan, “Hong roh,” ti sa ngêt riseh. Tuirihâl kangân chu hong sela, ringna tui hih â nuam murdîn â tlongin hong in riseh.

¹⁸Keimah Johana hin, hi lekhabua rillôkna thu ria kangân chu ikhir takkan ken riat: tukhomin hi thuhei hih a bôkin chu, hi lekhabua dengintheina isîrhei hih a chungah Pathianin bôk pêk a ti.

¹⁹Khante, tukhomin hi rillôkna lekhabua thuhei hih a paiin chu, hi lekhabua riziak a dongtum ringna thingkunga thei irâ neh khopui Rithianga an dong rang khah Pathianin indok a ti.

²⁰Hi thuhei inpuangtu hin, “A nit, kî zuang zel rang tâk a nit,” a ti a. Amen, Pumapa Jisua, zuang ta roh.

²¹Pumapa Jisua lungkhamna khah mi tin[14] ziangah om riseh, Amen.