Read Biete THUPHUANG 3 Bible Online

THUPHUANG 3 - Biete bible

THUPHUANG 3

¹“Sardis koindang tirtôn ziangah hingka hin riziak roh: ‘Pathian Rithla sarikah neh ârsi sarika neiah khan hingka hin a ti: Ni sinthohei murdi ki riat; ithi ṭiankan iring riming ni irput a nit.

²Har inla, ni thil nei â thi lôk lôkhei khah inring nôk roh. Ni sinthohei rêng rêng khah ki Pathian mit itlung zoi ai om ino a nit.

³Khanchu, inriseia nî om neh ni thu donghei khah ireh maiin zôm inla, ni sual kha rilet roh. Ni har non chu inru angkan zuang ki ta, tikin im nang ki zuang iphôk rang reh no tin e.

⁴Nikhomsela, Sardis khuaa mi ṭhenkah kha chu an silbom innim ino an om, khahei kha chu puan iṭek isilin ki ziangah lêng ngai an ti, khangkana om inrup pial an init a nit.

⁵Â nêtu murdi chu khangkah khan puan iṭekhei insil nîng an ta, ringna lekhabua an riming ichuang khah thâi inboi no ning. Ki Pa neh a vântirtônhei makungah anni chu thlop ki ti.

⁶Rithlan koindanghei zianga thu a îsîr hih riat theina kuar ineiin chu iṭha takkan ringai riseh.’

⁷“Filadelfia koindang tirtôn ziangah hingka hin riziak roh: ‘Mi rithiangtak neh â diktak, Davida chabi neia, tutên khâr thei loi ranga inkhâr ionga, tutên iong thei loi ranga khârtu khan hingka hin a ti:

⁸Ni sinthohei murdi ki riat, râtna ichîntekah bang ni nei ata chu, ki thu ni vong ngit a, tute ikhâr thei ino inkhâr khah ni makungah ki iong a nit.

⁹Ringai ta, Soitana inkhômnaa mi ṭhenkahei, milak bûr, Juda ni loi a Juda ritihei khah hong iṭhuiin ni ke bulah hong inkhûn ki ti; khanchu, khahei khan lung nang ki thlung iti reh tâng an ti.

¹⁰Idiar takka om ranga thu nang kî pêk ni zôm sikin rinêng chunga mihei murdi ifiana ranga rammual pumpuiah dengtheina a zuang tlung tikin kei khomin nang inzôk ki ti.

¹¹Kî zuang zel rang tâk kêng, ni thil nei isai khah vong ngit roh; khanchu, tutên chôiinrisângna rênglukhum ni dong rang khah nang sut no nih.

¹²Â nêtu murdi chu ki Pathian Tempil chopuiin phun ki ta, kha munah khan om mai tâng an ti. Pa Pathian riming anmania khan chuang a ta, Pathian khopui Jerusalem ithar, ki Pathian ziang ata zuang iṭum riming neh ker ming ithar kha anmania riziak ki ti.

¹³Rithlan koindanghei zianga thu a îsîr hih riat theina ranga ikuar ineiin chu iṭha takkan ringai riseh.’

¹⁴“Laodikei koindang tirtôn ziangah hingka hin riziak roh: ‘Amen, Riatpuitu iamomtak neh Diktak, Pathian thil siam murdi bul khan hingka hin a ti:

¹⁵Ni sinthohei ki riat; dâi mak che a, ilum khom lum mak che; nî dâi manih, nî lum manih kî nuam a nit.

¹⁶Lum tak ino, dâi tak ino, ni lum chilchal sikin ki bâia rithokin nang iphît suak ki ti.

¹⁷Ker chong, tinrêng ki nei, îte risam mang e, ni ti a; mi ngaiinsia, lungsiatiom, inriang, mitdel neh korongboi ni nit iti nî irriat ino a nit.

¹⁸Khanchu, ner chong theina rangin rângkachak meia inrithiang tâk ki zianga rithoka richoh rangin nang kî ti a nit. Ni korongboi izakpui iom tak rikhû ranga ni sil rang puan iṭekhei neh ni mu theina ranga mit ina loihei ki ziangah richoh roh.

¹⁹Ki lungthlunghei chu ki rila ki hêm ngai; khasikin, ki thu ôi inla, rilet roh.

²⁰Ringai ta, inkot bula dingin ki îkik hih, tukhomin ki rôl a riat a, inkhâr â ongin chu, a ziangah khan lût ki ta, a ziangah zânbu nêng ki ta, ani khomin ki ziangah nêng a ti.

²¹Â nêtu murdi chu ki rêngṭhungmunah ki ziangah inṭhung ki ti; kei khomin ke nê a, ki Pa ziangah rêngṭhungmunah ki îṭhung angkah hin.

²²Rithlan koindanghei zianga thu a îsîr hih riat theina kuar ineiin chu iṭha takkan ringai riseh.’” itin.