Read Biete THUPHUANG 5 Bible Online

THUPHUANG 5 - Biete bible

THUPHUANG 5

¹Khante, rêngṭhungmuna ṭhungtu changtiangah khan, lekhabu zuat kiangtiang kiangtianga riziak, risinsiana sarika pip khap ki mu a.

²Vântirtôn irât tak ki mu sa a, ani kha rôl iring takkan, “Tûm lekhabu zuat hih â phar a, risinsianahei hih â ong thei â om?” itin tlâng â sam a.

³Nikhomsela, lekhabu zuat khah â phara, â en thei rivânah tute omak a, rinêngah neh rinêng nuaiah khom tute omak a.

⁴Lekhabu zuat khah â phar a, â en theirua tute an om no sikin ki ṭap ngûi ngûi a.

⁵Khanchu, upahei lâia khatkan ki ziangah, “Ṭap no roh. Ringai ta, Juda nama sakeibaknei, Davida bulpui khan risinsiana khah iong rang neh, lekhabu zuat khah iphar rangin â nê tâk,” a ti a.

⁶Khante, mîring ilikah neh upahein an ihual, ân lâina rêngṭhungmunah khan, Berate ithat tâk i-ang â ding ki mu a. Berate khan mit sarikah neh riki sarikah a nei a; kha mit sarikahei kha chu Pathian rithla sarikah, rinêng chung pumpuia tir isuahei khah an nit.

⁷Berate khah a fe a, rêngṭhungmuna ṭhungtu changtianga lekhabu zuat khah a va lâk a.

⁸Lekhabu zuat khah a lâk kaneh chu, mîring ilikahei neh upa sôminika ilikahei khah Berate makungah khan an ibok a; perkhuang neh rângkachak berbu, namhoia sip an chôi chit a, kha namhoi khah mi rithianghei ṭongṭaina a nit.

⁹La thar an sak a, “Nangmah, lekhabu zuat kha ilaa, Risinsiana iong tlâk ni nit e; Ithatin ni om a, ni thisenin, Nam tina mihei, chi tina mihei, ṭong tina mihei, mi murdi, Pathian ta rangin ner chôk tâk a.

¹⁰Kin Pathian sin itho rangin khuanetuiah neh thiampuhein ni siam tâk a; Rinêng chungah hin roi rêl an ti,” itin.

¹¹Ki en mai a, rêngṭhungmun neh mîringhei neh upahei vêlah khan vântirtôn lôm, a sînga sîng, a sânga sâng itam takka rôl ki riat a.

¹²Khahei khan rôl iring takkan, “Berate ithat tâk chu, Sinthotheina hei, richongna hei, vârna hei, râtna hei, Chôiinrisângna hei, roinpuina hei, imûn rup a nit e,” an ti a.

¹³Khanchu, mîring tinrêng, rivâna mi hei, rinênga mi hei, rinêng nuai mi hei, tuikhanglian neh a sunga om murdi hei khêk irî khom ki riat a, “Rêngṭhungmuna ṭhungtu neh Berate ziangah khan, Inpâkna hei, chôiinrisângna hei, roinpuina hei, sinthotheina hei, Kumkhuantluangkan dong mai riseh,” an ti a.

¹⁴Mîring ilikahei khan, “Amen” an lei ti a, upahei khom khan ibokin chubai an ûn a.