Read Biete THUPHUANG 7 Bible Online

THUPHUANG 7 - Biete bible

THUPHUANG 7

¹Kha rizoiin chu, rinêng kil ilika tah vântirtôn iding ki mu a, rinêng chungheiah, tuikhanglian chungheiah, thingkungheiah ithli rêng rêng a râng nona rangin ithli ilikahei kha a man khap a.

²Vântirtôn dang, Pathian iring risinsiana chôi, sua tianga hong isuak ki mu a. Ani khan vântirtôn ilikah Pathianin rinêng neh tuikhanglian iseh theina ai pêkhei khah rôl iring takkan â sam a,

³“Ei Pathian suakhei ichalah kin richik zoi mâkah chu rinêng hei, tuikhanglian hei, thing hei khah iseh hi no rei,” a ti a.

⁴Israela nâi, nam sômlei nam inikahei lâia mi an ichala an irchik zâk chu, mi nuai lei sîngilikah neh sângilikah an nit iti an îsîr ki riat; hingka hin:

⁵Juda nama mi sîng lei sânginikah, Reubena nama mi sîng lei sânginikah, Gada nama mi sîng lei sânginikah,

⁶Asera nama mi sîng lei sânginikah, Naftali nama mi sîng lei sânginikah, Manasea nama mi sîng lei sânginikah,

⁷Simeona nama mi sîng lei sânginikah, Levia nama mi sîng lei sânginikah, Isakara nama mi sîng lei sânginikah,

⁸Zebuluna nama mi sîng lei sânginikah, Josefa nama mi sîng lei sânginikah, Benjamina nama mi sîng lei sânginikah risin iseh tâk an nit.

⁹Kha rizoiin chu ki hang en a, mipui tam rikhêl tep zoi ino, nam tina mihei, chi tina mihei, ram tina mihei, ṭong tina mihei ki mu a, puan iṭek isila itûm ibânhei ichoiin, rêngṭhungmun neh Berate makungah an ngîr a.

¹⁰Khahei khan rôl iring takkan, “Saninringna hih ei Pathian, rêngṭhungmuna ṭhungtu neh Berate zianga rithok a nit,” itin an ikhêk a.

¹¹Vântirtônhei murdi khah rêngṭhungmun neh upahei neh mîring ilikahei vêlah khan an ngîr a, rêngṭhungmun maah khan an ibok a:

¹²“Amen, Inpâkna hei, roinpuina hei, vârna hei, Lômthu sîrna hei, chôiinrisângna hei, sinthotheina hei, râtna hei, Kumkhuantluangkan ei Pathian ta a nit, Amen,” itin Pathian chubai an ûn a.

¹³Khante, upahei lâia khatkan ki ziangah, “Hi puan iṭek isilhei hih tuhei mani, taka rithoka hong im an init?” itin a ner don a.

¹⁴Keiman ki sâm a, “Epu, reh mang e, Nangman ni riat,” ki ti a. Ani khan, “Hihei hih nuamlona inrît tak ata hong izôkhei khah an nit a, an puanhei risûn fâi a, an silbomhei Berate thisena risûn ṭek tâkhei a nit hih.

¹⁵Khasikah khan, Pathian rêngṭhungmun maah an om a, a Tempilah khan a sûn a zânin a sin an itho ngai a nit; khante, rêngṭhungmuna ṭhungtu khan a puan in an chungah a zar a.

¹⁶An von ṭâm khâi no nia, an tui khom rihâl tlak khâi no nih, nîsân em khâi no nia, ilumin denginthei khâi no nih.

¹⁷Rêngṭhungmun inlâinaa om Berate chu anmani enkoltu nîng a ta, ringna tuikuangheiah ṭhui a ti. Khanchu, Pathianin an mit ata mitrithli murdi rûnfâi pêk a ti,” a ti a.