Read Biete THUPHUANG 8 Bible Online

THUPHUANG 8 - Biete bible

THUPHUANG 8

¹Berate khan risinsiana a sarina khah a hang iong kaneh chu dârkâr ritenkah vêl rivân ân thim val a.

²Pathian makunga ngîr vântirtôn sarikahei khah ki mu a, an ziangah bekul sarikah an pêk a.

³Vântirtôn dang, rângkachak berbu chôi, rêngṭhungmun maa rângkachak mâichâmah khan a hong a, mi rithianghei ṭongṭaina bôkna rangin namhoi ihâl rang itam takkah an pêk a.

⁴Vântirtônhei kuta namhoi ihâl khû khah mi rithiang ṭongṭainahei neh Pathian makungah a fe tâk a.

⁵Vântirtôn khan berbu khah a lâk a, mâichâma mei ri-al khah a khâtin a rût a, rinêngah a pai iṭhul a. Khanchu, rôl a hong suak a, khua a hong irît a, khothlâr arlek a, nînuhei a hong inîng dur dur tâk a.

⁶Khante, vântirtôn sarikahei khan bekul an ichôihei khah itum rangin an risiam tâk a.

⁷Vântirtôn â khatna khan a bekul a hang tum a, irial neh mei, thisen neh ripol rinêngah a ṭul tâk a. Khanchu, rinêng mun ithumka ṭhena munkah neh thingkung mun ithumka ṭhena munkah chu a kâng inrivâm a, loisûl iringhei murdi khom a kâng sa vang tâk a.

⁸Vântirtôn â nikna khan a bekul a hang tum a, thil im manih, itlâng ilianpa chok vung vung angkana hi tuikhanglianah an pai iṭhul a.

⁹Khanchu, tuikhanglian mun ithumka ṭhena munkah chu thisen a chang tâk a, tuikhanglian sunga mîring iom murdi mun ithumka ṭhena munkah chu an thi a, rikuanghei khom mun ithumka ṭhena munkah chu a siat tâk a.

¹⁰Vântirtôn â thumna khan a bekul a hang tum a; ârsi lianpa, meiser angkana chok luai luai hi rivân ata a zuk ṭul a, vadung murdi mun ithumka ṭhena munkah neh tuikuanghei kha a del a.

¹¹Kha ârsi riming khah, “Â khâ,” a nit. Khanchu, tui mun ithumka ṭhena munkah chu a hong khâk tâk a, a khâk tâk sikin kha tui iin mi itam takkah an thi tâk a.

¹²Vântirtôn â lina khan a bekul a hang tum a, inî mun ithumka ṭhena munkah, ithla mun ithumka ṭhena munkah, ârsihei mun ithumka ṭhena munkah chu a siat a, khahei khah mun ithumka ṭhena munkah chu a zîng tâk a. Khanchu, sûn mun ithumka ṭhena munkah chu ivâr om khâi mak a, zân khom khangkah ngirin a nit a.

¹³Khante, ki hang en a, vânlâizôlah musimpui a zuang vuang duai duai a, iring takkan â râm a, “Vântirtôn ithumkahein an bekul an tum tenan chu rinênga omhei chung chu ân khôk rang vang na! Ân khôk rang vang na! Ân khôk rang vang na!” a ti a.