Read Biete THUPHUANG 9 Bible Online

THUPHUANG 9 - Biete bible

THUPHUANG 9

¹Vântirtôn arngana khan a bekul a hang tum a; khanchu, rivân ata rinênga ṭul ârsi ki mu a. A ziangah khan khurmongboi[5] chabi an pêk a.

²Ani khan khurmongboi khah a zuk iong a, khurkobâi ata khah meikhû ang hi a hong khûk suak zut zut a, kha meikhû sikah khan inî neh boiruak a hong zîng zoi tâk a.

³Meikhûa rithokah khan ikhâi lôm rinêngah an zuang ṭul a, rinênga ainuvêt sinthotheina angkana sinthotheina an pêk a.

⁴An ichala Pathian risinsiana ripu no miriamhei denginthei rangin an phal a; rinênga loisûl rêng rêng hei, thil iring hei neh thingkung iring hei rêng rêng chu iseh loi rangin an iril a.

⁵Khante, risinsiana ripu no miriamhei khah ithat rangin chu thu peh mak a, thla ringaka sung natna intuang rangin an phal pêk a; ainuvêt angkan an mi sê ai nat a nit.

⁶Kha thlarngaka sungah khan chu mihein thina zong an ta, mu no nih; ithi nuam an ta; khanniseh, thina khan marak tâng a ti.

⁷Ikhâihei ilang dân chu ridoina fe ranga sakor an înrifo diam angkah hi a nit; an lu-ah khan rângkachak rênglukhum i-ang hi an khum a, miriam mêl an riput a.

⁸An sam khah nupang sam angkana sei a nit a, an hâ khah sakeibaknei hâ angkah a nit.

⁹Thîr ṭângipho ang lip an nei a, an rithla zâp irî chu sakor tâli itam takkah ridoina buala itlân irî dur dur angkah hi a nit.

¹⁰Ainuvêt angkan rimei an nei a, mi an bel thei a, thla ringaka sung miriamhei innah theina khom an rimeiah khan ai om a nit.

¹¹An ilal chu khurmongboi rili kha a nit a, Hebrai ṭonga arming chu, “Abadona” a nit a, Grik ṭonga arming chu, “Apoluona” a nit, amakhah, “Inrimangtu” itina a nit.

¹²Chung inkhôkna masatak chu a thleng tâk a, atûn chung inkhôkna dang inikah la hong tlung nôk a ti.

¹³Khante, vântirtôn â rukna khan bekul a hang tum a; khanchu, Pathian maa rângkachak mâichâm riki[6] ilika rithokah khan rôl ki riat a.

¹⁴Rôl khan bekul ichôi vântirtôn â rukna ziangah khan, “Eufratis vadunga vântirtôn ilikah ikhuapa omhei khu isua roh,” a ti a.

¹⁵Khanchu, hi kum, hi thla, hi sûn neh hi dârkâra miriam mun ithumka ṭhena munkah ithat ranga inrisiam thlâm vântirtôn ilikahei khah an isua tâk a.

¹⁶An sipai sakor chungchuang mihei khah an tam tlia chu dâp rizanikah an nit iti irilin ki om a.

¹⁷Khante, inlârnaah khan sakorhei neh a chungchuanghei khah hingka hin ki mu: mei angkana sen, safir angkana dum neh kât angkana eng ṭângipho an nei a; kha sakor luhei khah sakeibaknei lu angkah a nit a, an bâia rithokin mei hei, meikhû hei neh kât hei a suak zut zut a.

¹⁸An bâia rithoka hong isuak, mei hei, meikhû hei, kât hei sikah khan miriam mun ithumka ṭhena munkah chu an thi a.

¹⁹Kha sakorhei sinthotheina khah an bâiah neh an rimeiah khan a om a; an rimeihei khah irûl angkah a nit a, lu an nei a, amakhan mi an înnat ngai a nit.

²⁰Hi dengintheina ithat bân miriamhei hin anmani kutsuak chubai iûn kha rilet ual mak a; rângkachak mirmilhei, tangkarua mirmilhei, dâr mirmilhei, lung mirmilhei, thing mirmilhei, anmani isiam - îte mu thei ino, reh thei ino neh lôn thei inohei ibia neh ramrili bia bâng ngir mak a.

²¹Mi that an isong hei, an dôi mang hei, an hurna hei, an inrûkna hei ata khom rilet ual mak e.