Read Biete RUTHI 1 Bible Online

RUTHI 1 - Biete bible

RUTHI 1

¹Tianlâia Israelhein rêng an la nei maa, roirêltuhein roi an la rêl lâiah khan Israel ramah ṭâmpui a tlâk a. Khante, Judai ram Bethlehema mi khatkah Moab rama om rangin a nupui neh a naipahei inikah neh an fe a.

²Kha mi riming khah Elimeleka a nit a, a nupui riming khah Naomi a nit a, a naipahei ruai riming khah Mahlona neh Kiliona an nit. Judai rama Bethlehem khuaa Efrata panama mi an nit. Moab ramah khan an fe a, amakhan an om mai tâk a.

³Khante, Moab ramah khan Elimeleka chu a thi a, a nupui Naomi neh a naipahei ruai bang khah an nit tâk a.

⁴A naipahei khan Moab ram nupang nupuiin an nei seng seng a, khatka riming khah Orpi a nit a, a dang riming khah Ruthi a nit a. Kum sômkah vêl an om nungin,

⁵Mahlona neh Kiliona khom khah an thi nôk tâk a, Naomi chu a pasal neh a naihei khom om khâi loiin a khât bangin a om tâk a.

⁶Zoro itena sôt nunga manih chu PUMAPA khan a mihei khah ṭhat a vur a, fâknêk inṭum takkan an om tâk iti thu Naomi khan a lei riat a; khanchu, â moihei neh Moab ram ata kîr rangin an risiam tâk a.

⁷Khanchu, a omna ata khah â moihei ruai neh khan an suak a, Judai rama kîr nôk rangin an fe tâk a. Nikhomsela, lama an lôn lâiah khan,

⁸Naomi khan â moihei ruai ziangah khan, “Nin nuhei inah kîr nôk seng seng ta rei; ki chungah neh a lei ifam tâkhei chunga lungkhamna nin inlang lam angkah takah hin PUMAPA khan nin chungah lungkhamna inlang riseh.

⁹PUMAPA khan nin ruaikan pasal ineia vângsakna nin tong theina rangin lung nangni inkham riseh,” a ti a. Khanchu, Naomi khan a fôp a, â thla tâk a. Nikhomsela, anni chu an ṭap ngûi ngûi a,

¹⁰an tarpi ziangah khan, “Fe no ning ung e, ni mihei zianga ni kîrna takah nang zui sâng kin ti,” an ti a.

¹¹Naomi khan, “Ki nainuhei kîr nôk ngêt rei. Îtho rang sik im nin ne izui rang? Nin pasal rang nai ipa nangni ki lai nei pêk thei rang nin isôn mani?

¹²Ki nainuhei nin in tiang kîr nôk ngêt rei; pasal la nei nôk rangin kei laka ki ûnlian tâk a. Sabeina ki la nei itin vuanzân zel pasal ineiin, nai ipahei nei khom inlang,

¹³an puitling ten nin ingâk rang mani? Pasal nei loiin nin iom mai rang mani? Ni thei no nih, ki nainuhei, PUMAPA kut ki chungah a zuang tlâk tâk a, nangmani ta rangin ke lung ai nat tak tak a nit,” a ti a.

¹⁴Khante, an ṭap nôk ngûi ngûi a; khanungchu, Orpi khan a tarpi khah a fôp a; in tiang a kîr nôk tâk a; nikhomsela, Ruthi khan chu a tarpi khah â tûk khap a.

¹⁵Khanchu, Naomi khan, “Ruthi, ne moi champuinu kha a chihei ziangah neh a pathian ziang tiang a kîr nôk tâk a; nang khom ama lômin kîr nôk ta roh,” a ti a.

¹⁶Nikhomsela, Ruthi khan, “Nangma ṭhen rang neh nangma nang zui loia kîr nôk rangin ne thlêm kêng kêng khâi no roh; ni fena takah fêng ki ta, ni omna takah om ki ta, ni chihei chu ki chihei nîng an ta, ni Pathian chu ki Pathiana nîng a ti.

¹⁷Ni thina takah khan thîng ki ta; amakhan ne la phûm sa zel riseh. Nangmah neh keimah hih thina ti no thil dangin a ne ṭhen rangin chu PUMAPA khan ai lo lo ne lo riseh, kha nêka natinsat khomin,” a ti a.

¹⁸Khanchu, Naomi khan Ruthi khan amah izui a tum ngit iti a riatin chu a dâirek tâk a.

¹⁹Khanungchu, an ruaikan Bethlehem idênin an fe tâk a. Bethlehem an tlungin chu anni sikin a kho pumin an inîng sup sup tâk a; nuhei khan, “Amahih Naomi khah ai nit na?” an ti a.

²⁰Naomi khan an ziangah, “Naomi ne ti khâi no rei, Marai ne ti ta rei. Tinrêngthotheia khan lung siat iom takkan a ne isiam tâk a nit.

²¹Vângsak inṭum takkan hin taka ta ki suak a; nikhomsela, PUMAPA khan kut iben thakkan a ne hong iṭhui kîr nôk a nit hi. Tinrêngthothei PUMAPA khan ki chungah a lunghoi nona ân lang tâk a, inkhôkna ki chungah â thlun nungah hin, îtho rang im Naomi nin ne lai ti mai hi na?” a ti a.

²²Khangkah khan a nit Naomi chu â moinu Moab mi Ruthi neh Moab rama rithoka an hong dân chu a nit. Bethlehem an hong tlung khah barli ât phut chak lâi a nit.