Read Biete RUTHI 2 Bible Online

RUTHI 2 - Biete bible

RUTHI 2

¹Khante, Naomi khan a pasal suapui, Elimeleka panama mi richong tak suapui a nei a, arming chu Boaza a nit.

²Khante, sûnkah chu Ruthi khan Naomi ziangah, “Loi tiang fêng ki ta, lung ne lei inkhamtuhei tak fânung la var tik rong dua,” a ti a. Naomi khan, “O, ki nainu fe roh,” a ti a.

³Khanchu, Ruthi khah a fe tâk a, bu âttuhei inungah a lôn a, an mit kâra rel buvuihei khah artik bûm a. Khante, kha a loi fena khah Elimeleka panama mi Boaza loi a lei nit rop a.

⁴Sûnkah chu Bethlehema rithokin Boaza chu loi khah a zuang tlung a, bu âttuhei ziangah khan, “Nin ziangah PUMAPA om riseh,” a ti a. Khante, anni khan, “PUMAPA khan ṭhat nang vur riseh,” itin an sâm a.

⁵Khanchu, Boaza khan â som, bu âttuhei ruaitu ziangah khan, “Ani hih taktianga nungâk im ai nit?” itin ardon a.

⁶Bu âttuhei ruaitu khan, “Moab nungâk, Moab ram ata Naomi zianga hong sa a nit.

⁷‘Lung nen kham inla, nin fânung hih bu âttuhein an fathlu an bûm zoiin ritik ki ti,’ a ti a. Khanchu, a zuanga, iṭu-ah itôiteka a hang irngam ti no chu zînga rithokin a la irtik ngit ngit mai a nit,” itin a sâm a.

⁸Khanungchu, Boaza khan Ruthi ziangah, “Ki nainu loi dangah fânung izongin fe non la, hin taka ta hih rithon no roh, ke som nungâkhei ziangah hin om mai roh.

⁹An bu ât hih en ṭian inla, an inung sui mai roh; tlangvâlhei kha nang sarai loi rangin thu kî pêk diam tâk a nit; khante, ni tui arhâl ikipah tui bêla tlangvâlhei tuichôi isai khah va in ngai roh,” a ti a.

¹⁰Ruthi khah â khûn a, nuai isikin â bok a, a ziangah, “Nam dang ki nit a, nangman hingkana ni ne iriat nuam a, lung ni ne înkham hih ingka tliam ai nit tâk?” a ti a.

¹¹Boaza khan a sâm a, a ziangah, “Ni pasal thi nî-a rithoka atûn tena ni tarpi chunga ni sinthohei murdi mihein an ne sîr pêk riai a; khante, ni pa neh ni nu neh ni suakna ram imaraka ni lai riat ngai inohei zianga ni hong dânhei khom kî riat riai a nit.

¹²PUMAPA khan ni sintho tâkhei khah nang thung sela, PUMAPA Israelhei Pathian zôkna ranga arthla nuai ni hong irbêl khan ni sin ṭhat man khah itam takkan nang peh riseh,” a ti a.

¹³Ruthi khan, “Epu, lung ni nen kham tak tak reng na! Ne som nungâkhei lâia mi nino khom inlang, lungkham takka ni ne îsôn hih ki ta rangin lungngamna lian tak a nit,” itin a sâm a.

¹⁴Khante, bu nêk zoron chu Boaza khan Ruthi ziangah, “Hin hong inla, ibai hih hong fah roh, ne bai thliamhei khah uain thûrah ichia roh,” a ti a. Khanchu, bu âttuhei lâiah khan â ṭhung a; Boaza khan buzêi khah a sem sa a, a fâk a, a khop kan a fâk nung khomin a bân a la nei mai a.

¹⁵Khante, fânung izong ranga arthok nôk nungah khan Boaza khan a tlangvâlhei ziangah, “Fathlu lar khôm nona muna mi khom ritik riseh ngo no rei.

¹⁶Khante, fathlu têla mi khom khah ridok pêk unla, mah pêk thiai rei, rût riseh, ngo no rei,” itin thu a pêk a.

¹⁷Khanchu, Ruthi khan fânung khah kholoi idênin artik a; khante, a irtik isai khah a chîl a, barli her sômkah (Efa khatkah) vêl a nit a.

¹⁸Khante, barli khah a pêl a, khuaah khan a kîr nôk a; a tarpi ân mu a; khabanah bunêk lâia a fâk bân khom khah arsapa a tarpi a pêk a.

¹⁹Khante, a tarpi khan a ziangah, “Tu loia fânung im ni va irtik? Taktiang im sin ni va itho? Lung nang lei inkhamtu chu Pathianin ṭhat vur riseh,” a ti a. Khanchu, Ruthi khan a tarpi ziangah, “Vuansûna sin ki va thona riming chu Boaza a nit,” itin â ril a.

²⁰Naomi khan â moinu ziangah, “PUMAPA, â ring neh â thi chunga a lungkhamlianna dâi ual ngai ino khan Boaza chu ṭhatvur riseh,” a ti a. Naomi ngir khan a ziangah, “Kha mi khah ei rinâipui, ei suapui kêng ai nit,” a ti a.

²¹Khanungchu, Ruthi khan, “A nit khate na, ki ziangah khom ki bu hih an ât zoi riai mâkah chu ke somhei lâiah hin hong ṭang mai roh, a ne iti a nit,” a ti a.

²²Naomi khan â moinu Ruthi ziangah, “A nit ki nainu, Boaza loia, a nungâkhei lôm lâia sin nî tho chu ṭha ual a ti. Loi dangah ni fen chu mîn nang an sarai lôiin,” a ti a.

²³Khanchu, Ruthi khan barli neh bu ât zoi idênin Boaza som nungâkhei lâi bangah khan fânung izong a fe mai tâk a. Khante, a tarpi ziangah khan a om mai a.