Read Biete RUTHI 3 Bible Online

RUTHI 3 - Biete bible

RUTHI 3

¹Zoro itena nunga manih chu Naomi khan Ruthi ziangah, “Ki nainu ni ta ranga vângsakna ranga ṭha nang ngaitua pêk ki ti.

²Â som nungâkhei lâia sin ni va thona ngaipu khah ei suapui, ei rêlrui rimanpui Boaza a nit. Ringai roh vuan kholoiah hin barli khah rîzôlah ai zâp infâi rang a nit.

³Risil inla, siriak rithu inla, ni puan iṭha takheiah khan rivo inla; khanungchu, a rîzôlah khan zu fe roh; khannisela, a fâka a in zoi mâkah chu ni om iti inreh tlak no roh.

⁴Khante, a zâl tenan chu a zâlna khah richik inla, a in tenan chu lût inla, a ke tiang puansil lîk inla, a pheithluanah khan zâl roh,” a ti a.

⁵Ruthi khan, “Ni ti lam angkah takin thông ki ti,” a ti a.

⁶Khanchu, Ruthi khah rîzôlah khan a zu fe a, a tarpin â ril lam angkah takin a tho tâk a.

⁷Boaza khan bu a nêk a, a in zoiin chu a râiifân takkan bu pông kôlah khan a fe a, a zâl tâk a. Khante, Ruthi chu a fe zâi zâi a, a ke tiang puansil khah a lîk a, a pheithluanah khan a zâl tâk a.

⁸Zânlâiah khan Boaza chu a har rak a, arhêl a, a pheithluana nupang izâl ṭian a mun chu arngai arkhêl ok a.

⁹“Tûm nî nit?” a ti a. Ani khan, “Ne somnu Ruthi ki nit; ki panama kin rêlrui rizompui tak ni nit a; khasikin, ne somnu hih ni puansil ne tlângpui roh,” a ti a.

¹⁰Khante, Boaza khan, “Ki nainu, PUMAPA khan ṭhat nang vur riseh. Tlangvâl inriang manih, richong manih ni zui no dânah hin matona nêkan hi nungah hin ni insung chungah ṭhatna ni înlang ual a nit.

¹¹Atûnah hin, ki nainu ṭi no roh; ni ti lam angkah takin ni chungah thông ki ti, khosunga mi murdi hin nupang ifel tak ni nit iti an iriat rong a nit.

¹²A nit, ni suapui ner nâipui chu ki nit; nikhomsela, keima nêka ner nâipui ual a om a.

¹³Vuanzân chu hin riak inla, zîngah ani khan ni chunga suapui tho tum rang khah a tho nuamin chu a ṭhat, tho riseh; khannisela, suapui tho tum khah nang a tho pêk nuam non chu, PUMAPA Pathian iring riming ichingin ki irkhâm a nit. Keiman suapui tho tum rang khah nang tho pêk ki ti. Atûn chu zâl inla, zîng idênin om roh,” a ti a.

¹⁴Khanchu, zîng idênin a pheithluanah khan a zâl tâk a; khante, Boaza khan rîzôlah khan Ruthi khah a zuang iti mîn an riat rang khah a nuam no sikin Ruthi khah zîng takah tute la riat man â thoi tâk a.

¹⁵Boaza khan a ziangah, “Ni puan rizêm khah lan la, hin hong do roh,” a ti a. Khanchu, a do a, barli khah khamlu rukkah arta a, a siam pêk a, ân pêl a; khanchu, Ruthi khan khua tiang a bu pêlin a hong kîr tâk a.

¹⁶A tarpi ziang a tlungin chu, “Ki nainu im ni ang?” a lei ti a. Ruthi khan Boazan a chunga thil a lei itho pêk murdi khah â ril a.

¹⁷“Hi barli khamlu rukkah hi a ne pêk a. ‘Ni tarpi ziangah khan kut korongin fe no tin e,’ a ne iti a nit,” a ti a.

¹⁸Naomi khan a ziangah, “Ki nainu ingkan im thil a hong om rang iti ni riat mâkah chu ngâk ngêi ngêi roh. Vuansûnah hin hi thil hih ân fel zoi mâkah chu Boaza khah ringam no nih,” a ti a.