Read Biete RUTHI 4 Bible Online

RUTHI 4 - Biete bible

RUTHI 4

¹Boaza khah kulpui kotbâi rimu khômna munah khan a hang fe a, â ṭhung a. Khanungchu, Elimeleka suapui bul, a chungchâng thu Boazan a îsîr khah a hong a, Boaza khan, “Suapuipa, hin hong inla, hong iṭhung ta,” a ti a. Khante, ani khah a hong a, â ṭhung tâk a.

²Boaza khan kha khua mi ulianhei lâia mi sômkah a bûm a, an ziangah, “Hin hong iṭhung rei,” a ti a, an hong iṭhung tâk a.

³Khante, a suapuipa ziangah khan, “Moab ram ata khah Naomi chu a hong kîr nôk tâk a. Ei suapuipa Elimeleka ram khah izuar a tum a.

⁴Khangkan ni ziangah, ‘Hi â ṭhunghei mitmuah neh ei ulianhei mitmuah hin nangman richo roh. Ner tlan nuamin chu ritlan inla; khannisela, ner tlan nuam non chu ki riat theina rangin ne ril roh, nangmah ti no chu tute artlan rang rua dang lak omak a; nangma banah chu keimah hi ki nit,’ iti a nang inria a nangin ki riat a,” a ti a. Ani khan, “Keiman ritlan ki ti,” a ti a.

⁵Boaza khan, “A ṭhat; khannisela, Naomi kut ata ram khah ner tlanin chu mithi insung riming dâi loia richon luatu rang an la om thei maina rangin numei, Moab nupang Ruthi khom khah nupuiin ni nei sa rang a nit,” a ti a.

⁶An suapui bul khan, “Khangkan a nitin chu ki irtlan thei ino rang a nit. Ki naihein an hong lua theino rang sikin artlan theitu ki nitna chu nangman chang ta roh. Nangman ritlan roh, keiman chu ki irtlan thei ino a nit hih,” a ti a.

⁷Tianlâiah khan Israelhei lâiah thil an richôkin manih, an ritlanin manih a namindet dân chu hingka hin a nit: â zuartu khan a pheikok khek a ta, archotu ziangah a pêk rang a nit. Khangkan Israelhei lâiah thil tinrêng an îndet ngai a nit.

⁸An suapui bul khan Boaza ziangah, “Nangman ni ta rangin richoh roh,” a ti a. A pheikok a khek a, Boaza khah a pêk a.

⁹Khanungchu, Boaza khan khuaa ulianhei neh mipuihei murdi ziangah khan, “Vuanah hin Elimeleka neh a naihei ruai Kiliona neh Mahlona thil nei murdi chu Naomi kuta rithokin ki irchôk tâk a nit iti riatpuitu nin nit.

¹⁰Kha bang khah ni loiin, mithi riming khah dâi loia richon luatu siam pêk rangin neh mithi khah a urênghei lâiah neh a omna khua kul kotbâiah arming a boi nona rangin Moab nupang Ruthi, Mahlona nupui chu ki nupui rangin kî nei sa tâk a nit, iti hih vuanah hin nangmani hi â retuhei nin nit,” a ti a.

¹¹Khante, kul kotbâia mipui murdi neh khuaa ulianhei khan, “Riatpuituhei kin nit. Ni ina nupang hong ilût chu Rakili neh Leaii, Israel insungkua indingtu inikahei angkah khan PUMAPA khan siam riseh. Khante Efrat panam sunga mi roinpui hong nin la, Bethlehemah khan riming inthang takkan hong om roh.

¹²Khante, PUMAPA khan hi nungâk ata richi nang peh sela, ni insungkua chu Tamarin Juda ai nei pêk Pereza insungkua angkah hong ni riseh,” an ti a.

¹³Khanchu, Boaza khan Ruthi khah a ṭhui a, a nupui a hong nit tâk a. PUMAPA khan ṭhat a vur a, nai a vong a, naiipa a nei tâk a.

¹⁴Khante, nupanghei khan Naomi ziangah khan, “PUMAPA chu inpâkin om riseh! Ani khan suapui risam loiin nang ân om a; ni tupa riming chu Israelhei lâiah hin hong inthang riseh.

¹⁵Ne moinu khan lung nang a thlung a, naiipa sarika nêkan khom ni ta rangin ai lut ual a nit. Ani khan ringna thar nang ithlun pêk rang neh ni tar nunga nang idontu rang tûpa, nang ai nei pêk tâk a nit,” an ti a.

¹⁶Naomi khan naite khah a lâk a, â ṭângah â pom a, a hong donsui tâk a.

¹⁷An bungtualbôm nupanghei khan naite riming khah Obeda an sak a. Khanchu, mi tinrêng ziangah, “Naomin nai ipa a nei tâk,” itin an isîr a. Obeda khah Davida pa Jesaia pa a nit.

¹⁸Pereza richihei Davida tena ridot dân chu hingka hin a nit: Pereza, Hezrona, Rama, Aminadaba, Nasona, Salmona, Boaza, Obeda, Jesaia, Davida hei an nit.