Read Biete 1 SAMUELA 1 Bible Online

1 SAMUELA 1 - Biete bible

1 SAMUELA 1

¹Efraim tlângrama Rama khuaa om Efraim nama mi khatkah arming Elkana a om a. Ani khah Zufa panama, Tohua ruia mi Elihua nai Jerohama naipa a nit.

²Elkana khan nupui inikah a nei a. Hani neh Penini an nit. Penini khan naihei a nei a; khannisela, Hani khan chu nai nei mak a.

³Elkana khah Rama khua ata Silo khuaah khan Tinrêngthothei PUMAPA chubai iûn rang neh ribôlna thillanhei ilan rangin kum tin a fe ngai a. Amakhan Elia naipahei ruai Hofnia neh Finehasa khah PUMAPA thiampun an om a.

⁴Elkanan ribôlna thillan a lan ikipah a nupui Penini khah dongtum khatkah neh a naihei murdi khah dongtum a siam pêk chit ngai a.

⁵Hani kha chu lungthlung tak tak khom sela, PUMAPA khan nai nei thei loiin a siam sikin dongtum khatkah bang ai siam pêk ngai a nit.

⁶Nai a nei theino sika a beidongna inribôk ual rangin amah lei risiakpui ngainu Penini khan a lei musitin, a lei êsêl ngai a.

⁷Khangkan kum tin a nit mai a, PUMAPA inah an fe kipah Penini khan Hani khah beidong ngaisiat a sak ngai a, khasikah khan Hani khah iṭap iṭapin bu khom ne nuam ngai mak a.

⁸Khante, a pasal Elkana khan a ziangah, “Hani, ithôm nî ṭap? Ithôm bu ni nêk no? Ithôm beidong ngaisiata nî om? Naipa sômka nêk khomin ni ta rangin kî ṭhat ual ai nit ino mani?” a ti ngai a.

⁹Sûnkah chu Silo khuaa PUMAPA inah bu an nêk a, an nêk zoiin chu Hani khah a thoi a. Kha lâiah khan thiampu Elia kha PUMAPA biak in kotbâi chopui bulah â ṭhungna ngaiah khan â ṭhung a.

¹⁰Hani khah â lung a dong tak tak a; khanchu, PUMAPA ziangah a ṭongṭai a, ringaiinseh takkan a ṭap a.

¹¹Hingka hin ṭong ân kung a, “O Tinrêngthothei PUMAPA, ni bôinu tlômzia hih ne reh pêk inla, ner ngil tlak no roh. Ni bôinu hi nai ipa ni ne pêkin chu kha nai khah a damsung kârkah ni ta rangin serinran ki ta, a sam rêng rêng khom iep[1] ni tlak no nih,” a ti a.

¹²Hani kha PUMAPA zianga a ṭongṭai mai lâiah khan Elia khan a mûr châng khah a lei richik a.

¹³Hani khan a lungrila ai ṭongṭai a nit a; a mûr chu a châng a, a rôl chu iria ni mak a, khasikah khan Elia khan zu a înrui inin a iam a.

¹⁴Khanchu, Elia khan a ziangah, “Itena sôt im inrui maia nî om rang hi? Ni uain inrui khah inboi ta roh,” a ti a.

¹⁵Hani khan, “Epu, inrui mang e, nupang beindong riangvâi tak ki nit a; uain khom, zu khom in viat mang e, PUMAPA ziangah ki lungril kî phor kêng ai nit.

¹⁶Ni bôinu hih nupang chanlamboiin be no roh. Ki lungrila sipiliam ki lungdongna neh ki ngaisiatna ki îsîr a nit hi,” itin a sâm a.

¹⁷Elia khan, “Rithlaringam takkan fe roh, Israelhei Pathian khan ni thil ngên khah nang peh riseh,” a ti a.

¹⁸Hani khan, “Ni bôinu hin ni mitmuah ditsakna dong mai riseh,” a ti a. Khanungchu, nupangnu khah a fe tâk a, buhei a nêk a, beidong mêl riput khâi mak a.

¹⁹Atûk zîngah chu Elkana neh a insungmihei khah zîng takah an thoi a, PUMAPA an isôn zoiin chu Rama khuaa an inah an fe nôk tâk a. Elkana khan a nupui Hani chu a pôl a; PUMAPA khan Hani ṭongṭaina khah a sâm tâk a.

²⁰Khanchu, Hani khan nai a vong a, nai ipa a nei a; “PUMAPA zianga kî ngên a nit,” itin arminga khan Samuela[2] a sak a.

²¹Elkana neh a insungkuahei murdi kha PUMAPA zianga an kum tin ribôlna thillan ilan rang neh an ṭonginkung ilen ranga Silo khuaa an fe zoro a hong tlung nôk tâk a.

²²Khannisela, hi zoroah hin chu Hani chu fe sa mak a. A pasal ziangah khan, “Kei chu naiten rinu ne a bâng mâkah chu hong sa no ning e, rinu ne a bâng tenan PUMAPA inah ṭhui ki ta, amakhan a damsung kârkah chu ai om mai rang tâk a nit,” a ti a.

²³A pasal Elkana khan a ziangah, “A ṭhat, ṭha ni ti lam angkah takin tho roh; rinu ne nen bâng idênin insungah om inla; PUMAPA khan ni ṭonginkung lo nang intluk pêk riseh,” a ti a. Khanchu, rinu ne ân bâng mâkah chu Hani kha insungah a om a, a naipa khah a don a.

²⁴Rinu ne ân bâng tenan chu baidi her sômkah neh uain ûmka chôiin neh serâtchaltuai kum ithumka mi kâiin Hani khan a naipa khah Silo khuaa PUMAPA inah khan a fepui tâk a; naipang kha a la naiinpang ok a.

²⁵Serâtchaltuai khah an that zoiin chu naipangte khah Elia ziangah an ṭhui a.

²⁶Hani khan a ziangah, “O Epu, ni ringna chingin kî ti a nit, keimah hih Epu, hi muna ni kôla ding a PUMAPA zianga lei iṭongṭaitu nupang khah ki nit.

²⁷Hi naipang ingênin kî ṭongṭai a nit a; PUMAPA khan kî ngên khah a ne pêk tâk a.

²⁸Khasikah khan kei khomin PUMAPA ziangah kî lan a nit. A damsung kârkah PUMAPA ta ranga serinran nîng a ti,” a ti a. Khanungchu, kha munah khan PUMAPA khah chubai an ûn tâk a.