Read Biete 1 SAMUELA 11 Bible Online

1 SAMUELA 11 - Biete bible

1 SAMUELA 11

¹Thlaka nungah chu Amon mi rêng Nahasa khah Gilead rama Jabes khua doi rangin a hong rithok a, a hong hual khap a. Khante, Jabes mi murdi khan Nahasa ziangah khan, “Kin ziangah thu thlung inla; khanchu, ni sin thông kin ti,” an ti a.

²Amon mi Nahasa khan an ziangah, “Hingka hin a nit nin zianga thu ki thlung rang chu; nin mit changtiang murdi ikhel suak riai ki ta; khanchu, Israel mi murdi mualinphoiin om nin ti,” a ti a.

³Jabes khuaa ulianhei khan a ziangah, “Israel ram murdia mi kin hang tir theina rangin sûn sarikah ne peh roh. Ne saninzôk rang tute an om non chu ni ziangah hong ripeh suak kin ti,” an ti a.

⁴Khangkan, an mi tirhei khan Saula omna khua Gibea khah an hong tlung a, mipuihei kha lungiseh takkan an ṭap ngûi ngûi a.

⁵Saula kha a serât ihôlin loia rithokin a hong tlung a, “Îtho tâk im mipuihei hi an iṭap?” a ti a. Jabes khuaa mihei thusîr khah an iril a.

⁶Kha thu khah a riat kaneh chu Saula chungah khan Pathian rithla a zuang tlung zel tâk a, natinsat takkan a ning khah â mur tâk a.

⁷Khanchu, serâtchal bopkah a that a, a sa khah archan nôi a, Israel ram murdiah khan mi ân sem a, “Tukhom Saula neh Samuela hong zui nuam ino kangân chu an serâtchalhei kha hingkana tho nîng a ti,” iti â ril riai a. Khangkan Israel mipuihei khan PUMAPA chu an ṭi tâk a, inrual takkan an hong rithok suak tâk a.

⁸Saula khan Bezek munah khan a bûm vang a; Israel mi nuai ithumkah an nit a, Juda mi sîngithumkah an nit.

⁹Jabes khua hong itir mihei ziangah khan, “Nin mipuihei ziangah khan naktûk sûnlâi tak a nit ma ngêiin san isua nîng an ti, iti va ril rei,” a ti a. Khante, an mi hong tirhei khah an kîr nôk a, Jabes mihei khah an irilin chu an lôm tak tak a.

¹⁰Nahasa ziangah, “Naktûkah hin ni ziangah hong ripêng kin ta, kin chungah ni nuam lam lamin la tho ta roh,” an ti a.

¹¹Atûk zîngah khan Saula khan mipuihei khah pôl ithumkan a siam a; kôlrisam kaneh irâlhei riabuk khah an lût a, Amon mihei kha sûnlâi tak idênin an that a. An that bânhei kha an rithek indar riai a, an fang an malin lâizâm an tho tâk a.

¹²Khanungchu, mipuihei khan Samuela ziangah, “Saulan kin chungah roi rêl no nih iti tuhei khah taktiang im an iom tâk? Kha mihei khah hong ṭhui roh, lei that rong ung,” an ti a.

¹³Khannisela, Saula khan, “Vuansûn kherah hin chu tute that rang ni mak e; PUMAPA khan Israelhei ân zôk nî sûn kêng a nit a,” a ti a.

¹⁴Khanungchu, Samuela khan mipui ziangah khan, “Tho ta u, Gilgala lei fe rei u,” a ti a.

¹⁵Khanchu, mipui murdi khah Gilgalah khan an fe tâk a; Saula chu Gilgalah khan PUMAPA maah rêngin an siam tâk a. Amakhan PUMAPA maah ringeina thillanhei an lan a; khanchu, kha munah khan Saula neh Israel mi murdi khah an lôm tak tak a.