Read Biete 1 SAMUELA 12 Bible Online

1 SAMUELA 12 - Biete bible

1 SAMUELA 12

¹Khanungchu, Samuela khan Israel mihei murdi ziangah khan, “Ringai ta u, ki zianga nin thusîr murdi khah ke pom a, rêng rang nangni ki phun pêk tâk a.

²Atûnah hin nangni kâiruai rang rêng nin nei tâk a. Kei chu ki hong tarin, ke bâhei khom a hong ṭuak tâk a, ki naipahei khah nin ziangah an om a. Tlangvâlte ki nita rithokin atûn ten idênin nangni kî kâiruai a nit.

³Hin kî om a nit, thonsual ki neia a nitin chu PUMAPA neh a rêng rithlang maah atûnah hin ne sêl ta rei. Tu serât manih, sakuartung manih, ker chupui ngai im? Tûm ki lêm tâk ngai? Tûm ki nuam ki lo ngai? Ki mit indel rangin tu ziangâm fâkinrûk ki lâk ngai? Khahei khah ki lei itho duai a omin chu nangni thung nôk riai ki ti,” a ti a.

⁴Mipuihei khan, “Ne lêm ngai mak che a, ni nuam khom ne lo ngai mak che; tute kuta rithokin îte lah ngai mak che,” an ti a.

⁵Samuela khan an ziangah, “Ki thonsualna îte mu mak chei iti vuanah hin PUMAPA neh a rêng rithlang khah riatpuitu an nit,” a ti a. Khante, anni khan, “A nit, PUMAPA chu riatpuitu a nit,” an ti a.

⁶Samuela khan, “Mosia neh Arona phuntu neh Aigupta ram ata nin chibulhei ṭhui suaktu khah PUMAPA a nit a.

⁷Khasikin, nin omna munah khan iding ṭian unla, PUMAPA maah, PUMAPA khan nin chungah neh nin chibulhei chunga thil roinpui a lei tho ngai dân khah nangni la hong sûtpui rong.

⁸Aigupta ramah Jakoba neh a insungkuahei an lût nungah khan Aiguptahei khan anni khah an sirde a; nin chibulhei khan PUMAPA an isam a; khanchu, PUMAPA khan Mosia neh Arona a tir a, anni khan nin chibulhei kha Aigupta ram ata an ṭhui suak a, hi munah hin an in-om tâk a.

⁹Khannisela, PUMAPA an Pathian khah an ringil a, khasika khan ani khan Hazor khua sipai ruaitu Sisera kutah neh Filistia mihei kutah neh Moab rêng kutah a pêk a, anni khan an hong doi inê a.

¹⁰Khanungchu, PUMAPA khah an isam a, ‘PUMAPA chu nung kin song a, Baalhei neh Aserihei chubai kin ûn sikin kin lei îsual tâk a nit. Nikhomsela, kin irâlhei kut ata hi ne san isua tan la; khanchu, ni sin thông kin ti,’ an ti a.

¹¹PUMAPA khan Gideona, Baraka, khanung Jeptha neh a nungkhôn taka keimah Samuela ane tir a. Nin irâlhei kut ata nangni sanisuan, izôkriamkan nin iom ngai a nit.

¹²Khannisela, Amonhei rêng Nahasa khah nangmani doi rangin a hong iti nin riat kaneh ki ziangah, ‘Kin chunga roi ne rêlpêk rang rêng kin izong a nit,’ itin PUMAPA nin rêng khah nin nôl a.

¹³“Atûnah hin nin rêng rithlang nin ingên chu ani hih a nit. Atûnah hin PUMAPA khan rêng nangni ai pêk tâk a nit hih.

¹⁴PUMAPA nin Pathian kha nin ṭi a, a rôl nin ringai a, a thupêkhei nin zôm a, nangmani neh nin chunga rêng khah PUMAPA nin Pathian izuitu nin nitin chu tinrêng ṭhâng a ti.

¹⁵Khannisela, PUMAPA rôl khah ringai loi a, PUMAPA thupêk nung nin songin chu nin chibulhein PUMAPA kut an ituang angkah ngirin nangni khomin tuang nin ti.

¹⁶Khasikah khan iding ṭian unla, PUMAPA khan nin mitmua thil roinpui tak a tho rang hi lei en ṭian rei.

¹⁷Khannisela, ṭongṭai ki ta, PUMAPA khan khuarî neh rua sângsari insûr a ti. Khanchu, rêng nin ingên thu-ah hin nin PUMAPA mitmua thil nin ithonsual hi a natinsatzia riang nin ti,” a ti a.

¹⁸Khanchu, Samuela khan PUMAPA chu â sâm a, PUMAPA khan kha nî-ah khan khuarî ân rî a, rua ân sûr a. Khanungchu, mipuihei khan PUMAPA neh Samuela khah an ṭi tâk a.

¹⁹Mipuihei khan Samuela ziangah khan, “Kin thi nona rangin PUMAPA ni Pathian ziangah khan ne ṭongṭai pêk roh. Hi thil ṭhano tak rêng inei ranga kin lei ingên hih kin sual murdi belsâtu a nit tâk hih,” an ti a.

²⁰Samuela khan mipuihei ziangah khan, “Ṭi no rei, hi thil ṭhano tak hih itho chu nin tho ngêi a; nikhomsela, PUMAPA khah nungsong no unla; nin lungril murdin PUMAPA sin khah tho ual rei.

²¹Îte nemna boi neh nangni inzôk thei ino rang chanlamboi pathianhei izuiin pêt no rei, anni khah chanlamboi an nit.

²²Arming roinpui tak sikah hin PUMAPA khan nangni marak no ni a; a miheia nangni siam khah PUMAPA lôm lam tak a nit.

²³Kha bang khom ni mak a, nin ta ranga ṭongṭai ibâng a, PUMAPA chunga sual khah ki ta rangin chu thil rithei ino tak a nit; lampui iṭha neh lampui idik nangni inmu mai ki ti.

²⁴PUMAPA khah ṭi unla, nin lungril murdin iamom takkan a sin tho rei. Nin ta ranga a thiltho roinpuizia hih remai rei.

²⁵Khannisela, isual takka thil nin la tho maiin chu nangmani neh nin rêng khah inrimangin om nin ti,” a ti a.