Read Biete 1 SAMUELA 13 Bible Online

1 SAMUELA 13 - Biete bible

1 SAMUELA 13

¹Saula chu kum sômithumka mi a nitin ân lal phut a; Israelhei chungah khan kum inikah ân lal a.

²Saula khan Israelhei mi sângithumkah arthlang a; sânginikah kha Mikmasa neh Bethel tlângramah ama lômin a ziangah an om a, sângkah kha Benjamin rama Gibea khuaah Jonathana ziangah an om a. A dang murdi kha chu anmani in chitah ân fe a.

³Jonathana khan Geba muna Filistia sipai mun khah a doi inê a, Filistia mihei murdi khan amakhah an lei riat a. Khanungchu, Saula khan Hebrai mihei murdi ridoinaa koi rangin mi a tir a, an ram pumpuiah khan bekul ân tum a.

⁴Israelhei murdi khan Saula khah Filistia sipai mun a doi inê iti neh Israel mihei chu Filistia mihein nel titakin an nel iti thuhei an lei riat tâk a. Khanchu, mipuihei khah Saula ziangah Gilgalah an ribûm riai tâk a.

⁵Filistia mihei khom Israelhei idoi rangah khan an ribûm riai a; tâli sîngithumkah, sakor chungchuang mi sângirukka, sipaihei chu tuikhanglian rikama ṭiai zâka tam an nit. Anni chu Beth-Aven sak tiang panga Mikmas munah khan an fe a, ṭangmun an khuar a.

⁶Khanungchu, anni khan natinsat takkan an hong doi a, Israel mihei chu an hong epde tâk a. Israel mi ṭhenkah chu ipûkheiah, khursungheiah, lungpui kârheiah, tuisunsuaheiah an ribîk a.

⁷Hebrai mi ṭhenkahei chu Jordan râla Gad neh Gilead ramheiah lâizâm an tho a. Saula chu Gilgalah a la om mai a, a zianga om mipuihei khah iṭi rilônthingin an om a.

⁸Samuelan he a be lam angkan sûn sarikah Samuela chu a ngâk a; khannisela, Samuela chu Gilgalah khan la zuang mak a. Mipuiin Saula khah an mâk thiai tâk a.

⁹Khanchu, Saula khan, “Hâlrivâm thillan rang neh ringeina thillan ranghei khah hin ki ziangah hong chôi rei,” a ti a. Khangkan hâlrivâm thillan khah a lan tâk a.

¹⁰Hâlrivâm thillan a lan zoi kaneh, Samuela chu a zuang tlung tâk a. Lei idona, lei ichibai rangin Saula khah a hong suak a.

¹¹Khannisela, Samuela khan, “Im ni lei itho tâk na?” a ti a. Saula khan, “Mipuihei khan an ne mâk thiai tâk a, nang lak chu ni sûn inkung nî-ah khan zuang tlung khâi mak che a; khabanah, Filistia mihei lak chu Mikmas munah an ribûm vang tâk iti ki riat a.

¹²Khasikah khan, ‘Filistia mihei khan Gilgalah hin an ne zuang idoi rang tâk a nit a, PUMAPA lungkhamna lak la zong mang a,’ ki ti a. Khasikah khan hâlrivâm thillan kha lan ino thei ino ki nit,” a ti a.

¹³Samuela khan Saula ziangah khan, “Ni thiltho dân hih intlo dân a nit, PUMAPA ni Pathianin thupêk nang ai pêk khah nî zôm ino a nit. Nî zôm ni sela chu PUMAPA khan Israelhei chungah hin nen lalna hi kumkhuakan a îndet rang a nit.

¹⁴Khannisela, atûn chu nen lalna hih mong tâng a ti. PUMAPA thupêk ni zôm no sikin PUMAPA khan ama lungril riput mi zong a ta, a mihei chungah ruaitu inih rangin ai siam rang a nit,” a ti a.

¹⁵Samuela khah a thoi a, Gilgal ata khah a rot tâk a. Saula kha a sipaihei omna munah a feah khan mihei khan an zui a. Gilgala rithokin Benjamin ram hual Gibeah khan an fe a. Saula khan a zianga sipai la omhei khah a tep a, rizarukka vêl an nit a.

¹⁶Saula neh a naipa Jonathana neh an zianga mi la omhei khah Benjamin rama Gibea khuaah ṭangmun an khuar a; Filistia mihei khan chu Mikmasaah khan ṭangmun an khuar a.

¹⁷Khante, Filistia sipaihei ṭangmuna rithokin pôl ithumkah an hong suak a, pôl khatkahei khan Shoal rama Ofra tiang ipanin an fe a;

¹⁸Pôl khatkah kha Beth Horon tiang ipanin an fe a; pôl khatkah kha Zeboim phâi idep neh ramchâr tiang ipanin an fe a.

¹⁹Israelhei ram pumpuiah khan thîrisuk ngai rêng rêng omak a; Filistia mihei khan, “Hebrai mihei hin khandaihei manih, ifeihei manih an siam duai lôiin,” an ti sikin thîrisuk inthiam khah an iphal ino a nit.

²⁰Israel mihei khan an kodâlhei, tutlohei, reipuihei, kôidahei, lângkol thîrhei a môlin chu icher inngaih rangin Filistiahei ziangah an ife ngai a nit.

²¹Kha an lângkolthîr neh kodâl cher inngaihna man khah sekel mun ithumka ṭhena mun inikah a nit a, reipui neh tutlo cher inngaihna man khah sekel mun ithumka ṭhena munkah a nit.

²²Khangkah khan an ridoi nî-ah khan Saula neh Jonathana banah chu Israel sipaihei tutên khandai manih ifei manih nei mak a.

²³Filistiahei khan Mikmas fena tiang lei iruang rangin sipai lôm khatkah kha an tir a.