Read Biete 1 SAMUELA 14 Bible Online

1 SAMUELA 14 - Biete bible

1 SAMUELA 14

¹Sûnkah chu Saula naipa Jonathana khan a râlthluk chôitu tlangvâl ziangah khan, “Tho ta, varâl tiang Filistia mihei riabukah son la va fe rei,” a ti a. Nikhomsela, Jonathana khan a pa Saula kha chu iril mak a.

²Saula kha Gibea kho kôl inâia Migrona theisen kung nuaiah a om a; a zianga om sipaihei khah mi rizarukkah vêl an nit.

³Khante, Silo khuaa Pumapa thiampu Elia naipa Finehasa nai Ikaboda inzirpuipa Ahituba naipa Ahija kha thiampu zakua hâkin a om a. Jonathana khah a fe iti mipuihei khan reh mak a.

⁴Jonathanan Filistia mihei riabuk a fena ranga a rô ngêt rang Mikmas fena tiangah khan kiangtiang kiangtiang lungpui rido a om a; a khatka riming khah Bozez a nit a, a dang khatka riming khah Sene a nit.

⁵Lungrido khatkah kha mâr tianga om a nit a, Mikmas isong a nit, a dang khatkah kha sim tianga om a nit a, Geba song a nit.

⁶Jonathana khan a râlthluk chôitu tlangvâl ziangah khan, “Tho, sertan ino Filistia sipaihei omnaah son lei fe rei. PUMAPA khan ne san a ta; a ne sanin chu ei roi manih ei tam manih PUMAPA ta ranga khan nêna ne pe intakna îte omak,” a ti a.

⁷Tlangvâl khan a ziangah, “Ni lungrila om lam takkah khan tho roh, ni lungril angkah chia kha ki lungril a nit,” a ti a.

⁸Jonathana khan, “A ṭhat, an ziangah son va fêng ei ta, Filistiahei khan ne lei mu riseh.

⁹Khante, ei ziangah, ‘Nin ziangah kin zuang mâkah chu lei om rei,’ an ne tin chu ei munah khan om ṭian ei ta, an ziangah fe no min e.

¹⁰Khannisela, ‘Kin ziang tiangah hin hong rei,’ an tin chu fêng ei ti, amakhah PUMAPA khan ei kutah a ne ipêk rang a nit, iti ei ta ranga risinsiana nîng a ti,” a ti a.

¹¹Khanchu, an ruaikan Filistia mi râlvêngtu sipaihei mu theina rangah khan an var lang a; Filistiahei khan, “En ta u, Hebrai mihei an ribîkna khur ata an hong suak tâk,” an ti a.

¹²Khanungchu, Jonathana neh a râlthluk chôitu tlangvâl khah an koi a, “Hong rei, hin thil nangni kin iril rang a om,” an ti a. Jonathana khan a râlthluk chôitu tlangvâl ziangah khan, “Ne zui roh; PUMAPA khan anni chu Israelhei kutah a ne ipêk tâk a nit,” a ti a.

¹³Khanchu, Jonathana kha a kut neh ke mangin a lui a, a râlthluk chôitu khan a zui a. Jonathana khan Filistiahei chu a doi a, a makungah khan an itâl dûl dûl a, a râlthluk chôitu khan a hong that thiai a.

¹⁴Khangkan Jonathana neh a râlthluk chôitu khan an that masatak ṭumah khan nôl dungka sung zelah khan mi sôminika vêl an ithat a nit.

¹⁵Filistia mihei murdi tlângrama omhei kha an rilo ân thing tâk a; râlrûntuhei neh sipai riabuka omhei khom iṭi rilônthingin an om tâk a; rinêng â nîng a, lungzîngna natinsat tak a om tâk a.

¹⁶Khante, Benjamin ram Gibea Saula râlvêngtuhei khan an hang thlîr vêl a, Filistia mihei lungzîng ibuai chavaia tlân indar suai suai khah an mu tâk a.

¹⁷Khanchu, Saula khan a sipaihei ziangah, “Atûnah hin ritep unla, tûm arkip ino hang en ta u,” a ti a. An hang ritepin chu Jonathana neh a râlthluk chôitu khah an iom ino a nit iti an mu suak tâk a.

¹⁸Saula khan Thiampu Ahija ziangah khan, “Thiampu zakua khah hong chôi roh,” a ti a. Kha nî-ah khan Ahija khan Israel mihei makungah a hong ichôi a nit.

¹⁹Saula khan thiampu â sôn mai lâiah khan Filistia mihei riabuk tianga ibuai suai suai khah ân rik ual ual tâk a. Khanchu, Saula khan thiampu ziangah, “Pathian isôn zoro om khâi mak e,” a ti a.

²⁰Khanungchu, Saula neh a zianga mipui iom murdihei khah an ribûm a, Filistia mihei ibuai lunginzîng takka anmani neh anmani ridoia khandaia rithathei idoi rangin ridoinaah khan an fe tâk a.

²¹Filistia mihei ithlop a, anni zianga an riabuka lei ife tâk Hebrai mi ṭhenkahei khom khah Saula neh Jonathana zianga om Israel mihei tiang an hong ṭang nôk tâk a.

²²Khangkah ngirin Efraim tlângrama Israel mi ribi murdihei khom khan Filistia mihei lâizâm an tho iti an lei riat a, anni khom ridoinaa ṭang san Filistiahei an lei rizûl a.

²³Beth-Aven ikhêl rakkan an doi a. Khangkan, PUMAPA khan kha nî-ah khan Israelhei chu ai saninzôk a nit.

²⁴Kha nî-ah khan Israel mihei khah ṭâmsôlin an rizal a, Saula khan, “Ke râlhei chungah phuba ki lâk mâkah tukhom vuansûnah hin fâk izong kangân chu vânisalin om riseh,” itin ṭongrikhâmin mipuihei chu ṭong ikhir tak a pêk sikin tutên a sûn itlungin fâk rêng rêng îte zong mak a.

²⁵Mipui murdihei khan ramnuai an va tlung a, khuaitui a lei om a.

²⁶Ramnuai khah khuaituiin a sip a, khan tutên ritem viat mak e; mipuihei khan Saula vânisâm khah an iṭi a nit.

²⁷Khannisela, Jonathana khan a pa Saulan mipuihei khah vânisâm ṭonga a lei iṭhi lâi khah reh sa mak a; khanchu, â rol chôiah khan khuaithlâr khah a sun a, a fâk tâk a. Voikazelin a hong har huai huai tâk a.

²⁸Khanchu, mipui lâia mi khatkah khan a ziangah, “Ṭâmsôlin kin irzal neng chu a nit a; khannisela, ni pa khan mipuihei hi, ‘Vuaninta fâk izong kangân chu vânisalin om riseh,’ itin ṭong ikhir tak a ne ipêk a nit,” a ti a.

²⁹Jonathana khan, “Ki pa hin kin mihei lungzîng ai sak a nit hite o! En ta, khuaitui ichîntekah ki hang irtem khomah hin ki hang har huai tâk zia hih!

³⁰“Mipuihei hin an râllâk thil an imu kangân chu vuanah hin an nuam nuamin fah thei vâng sela chu Filistia mihei chu an ithat natinsat ual rang a nit,” a ti a.

³¹Kha nî-ah khan Israel mihei khan Filistia mihei khah an inê a, Mikmasa rithokin Aijalon idênin Filistia mihei khah an rizûl a. Israel mihei chu ṭâmsôlin an rizal tak tak tâk a.

³²Khanchu, mipuihei khan an râllâk thil khah ibô zelin an ibô a, bera hei, sechal hei, serâtte hei an man a, a mun zelah khan an that a, a sa khah thisen la kop ṭian kan an fâk a.

³³Saula ziangah, “Ringai roh mipuihei khan thisen ikop ṭianka sa fan PUMAPA chungah thil an thonsual tâk,” itin an iril a. Saula khan, “Dik ino takkan thil nin itho a nit, hi munah hin lung ilianpa ne hong inlum pêk rei,” a ti a.

³⁴Khanungchu, Saula ngir khan, “Mipui lâiah fe unla, an ziangah, ‘Mi tinin serât neh bera hin hong kâi sela, that sela, fah riseh. A thisen ikop ṭianka fan PUMAPA chungah thil an thonsual rang ni mak e,’ ti rei,” a ti a. Khanchu, kha zânah khan mi murdi khan mahni serâtchal an hong kâi chit a, khan an that tâk a.

³⁵Saula khan PUMAPA rang mâichâm a siam a, amakhah PUMAPA ranga a mâichâm siam masa tak a nit.

³⁶Saula khan a mihei ziangah, “Zânah Filistia mihei zu rûn ei ta, zîng khovâr idênin irok ei ta, lei that vang rei u,” a ti a. Anni khan, “Ṭha ni ti lam takkan tho roh,” an ti a. Khannisela, thiampu khan, “Pathian lei isôn bak hi rei,” a ti a.

³⁷Khanchu, Saula khan Pathian â sôn a, “Filistia mihei chu ki zui doi rang im? Nêna ne pêng ni tîm?” a ti a. Khannisela, kha nî-ah khan Pathianin sâm mak a.

³⁸Khanungchu, Saula khan mipui ruaitu murdihei ziangah khan, “Hin hong unla, vuanah hin îthil tak im ei ithonsual imu tum ei ti u.

³⁹Israelhei saninzôk ngaitu PUMAPA ringna chingin ṭong ki irkhâm a nit, thil isual ithotu tak chu ithat ngêt rang a nit, ki naipa Jonathana khom ni sela,” a ti a. Nikhomsela, tutên îte ti viat mak a.

⁴⁰Khanungchu, Saula khan an ziangah, “Nangmani a ranin om unla, keimah neh ki naipa Jonathana hi a ranin om kin ti,” a ti a. Mipuihei khan Saula ziangah, “Ṭha ni ti lam angkah takin tho roh,” an ti a.

⁴¹Khanchu, Saula khan PUMAPA Israelhei Pathian ziangah khan, “PUMAPA vuanah hin îtho sik im ni ne isâm ino tâk? PUMAPA Israelhei Pathian, hi lungiserheiah hin ne sâm roh. Thil thonsualtu khah keima manih Jonathana manih a nitin chu Urim a hin ne sâm inla; khannisela, ni mi Israelhei tiang a nitin chu Thumim a hin ne sam roh,” a ti a. Sâmna khah Jonathana neh Saula chungah khan a ṭul tâk a; mipuihei chu an rilîm tâk a.

⁴²Khanungchu, Saula khan, “Keimah neh ki naipa Jonathana kârah ithlei ni riseh,” a ti a. Khanchu, Jonathana chungah khan a ṭul tâk a.

⁴³Saula khan Jonathana ziangah, “Îtak im nî tho, isîr roh,” a ti a. Jonathana khan, “Ke rol môrin khuaitui ichîntekah ki irtem a nit; hin ki om, ithi rangin ki irsiam thlâm a nit,” a ti a.

⁴⁴Saula khan a ziangah, “Ithat ni nit no a nitin chu Pathianin ai lo lo ne lo riseh,” a ti a.

⁴⁵Nikhomsela, mipuihei khan Saula ziangah khan, “Israelhei lâiah hin saninzôkna roinpui tak thosuaktu Jonathana hih ai thi rang na? Thi tlak no nih, PUMAPA ringna chingin kin iti a nit, a samzâi khatkah khom hi rinêngah hin thla viat no nih; vuanah hin Pathianin ai thopui a nit hih,” an ti a. Khangkan mipuihei khan Jonathana chu thi loi rangin an inzôk tâk a.

⁴⁶Kha rizoiin chu Saula khan Filistia mihei rizûl khah arngam a, an kîr tâk a; Filistia mihei khom anmani omna ram tiang an fe tâk a.

⁴⁷Saula khah Israelhei chungah rêng a hong chang nungah khan kil tina â râl Moab mihei, Amon mihei, Edom mihei, Zoba rênghei, Filistia mihei khah a doi a. Â thlêkna tiang tiangah khan â nê thiai mai a.

⁴⁸Ihâi takkan a doi a, Amalek mihei ten khom â nê a. Israelhei chu anmani sirdetuhei kut ata ai sanisua a nit.

⁴⁹Saula naipahei khah Jonathana, Isvia neh Malkisua hei an nit a. A nai nupang ulian ual khah Merabi a nit a, a naipang ual kha Mikali a nit.

⁵⁰A nupui khah Ahinoami, Ahimaaza nainu a nit. A sipai ruaitu tak kha Abnera a nit a, Saula pangâk Nera naipa a nit.

⁵¹Saula pa Kisa neh Abnera pa Nera khah Abiela naipahei an nit.

⁵²Saula dam sung kârkah chu Filistia mihei neh khan natinsat takkan an ridoi mai ngai a. Khasikah khan Saula khan mi rât manih mi hâi manih ai mu murdi chu a sipaiah ai lâklût ngai a nit.