Read Biete 1 SAMUELA 15 Bible Online

1 SAMUELA 15 - Biete bible

1 SAMUELA 15

¹Samuela khan Saula ziangah, “PUMAPA khan a mi Israelhei rêng ranga riak nang inrithu ranga ai tirah khah ki nit. Atûnah hin PUMAPA thusîr khah ringai roh.

²Tinrêngthothei PUMAPA khan, ‘Amalek mihein Israelhei chunga an thil tho, Aigupta ram ata an hong suak lâia an lei doi tliahei khah ki irchik tap a nit.

³Amalekhei idoi rangin fen la, an thil nei murdi zua viat loiin that riai roh. Nupang, ipa, naite rinunêk lâihei, sechalhei, berahei, saringseihei, sakuartunghei an rêngkan ni that riai rang a nit,’ ai ti a nit,” a ti a.

⁴Khangkan Saula khan mipuihei a koi bûm a, Telem khuaah a tep a, Israela mi sipai nuai inikah, Juda mi sipai sîngkah an nit a.

⁵Khanungchu, Saula khah a mihei neh Amalekhei khua punin an fe a, vadung rikam phâizôlah khan ruang an chuan a.

⁶Saula khan Ken mihei ziangah khan, “Suak unla, Amalekhei lâi ata hi rikiang rei; khanonchu, nangni ki that sa duai lôiin,” a ti a. Israela richihei murdi Aigupta rama rithoka an hong suak lâiah khan, Ken mihei khan chu lung an lei înkham a nit. Khanchu, Ken mihei khah Amalek mihei lâi ata an rikiang tâk a.

⁷Saula khan Amalek mihei khah Havilaa rithoka Aigupta nisua tiang idep Sur idênin a doi inê a.

⁸Amalek mihei rêng Agaga khah â ringin a man a, mipui murdihei chu a that riai a.

⁹Khannisela, Saula neh a mihei khan Agaga khah an zua a, bera ṭha ṭhahei, serâtchal iṭha ṭhahei, berate â ṭha murdihei khom khah that mak a, â ṭhano manih an înpâm inohei kha chu an that riai a.

¹⁰PUMAPA thu chu Samuela ziangah a zuang tlung a,

¹¹“Saula rênga ki lei iphun tâk chu ki însîr a nit; nung a ne song a, ki thupêkhei zôm mak,” a ti a. Samuela chu a ning a thik a, zântluanin PUMAPA chu â sam a.

¹²Atûkah chu Samuela khah Saula ritongpui rangin zîng takah a fe a. “Saula chu Karmel khuaah a fe a, amakhan ama riatmaina lungphun a phun a; khanungchu, Gilgalah a fe tâk,” itin Samuela khah an iril a.

¹³Samuela kha Saula ziang tiangah khan a fe a; Saula khan a ziangah, “PUMAPA khan ṭhat nang vur riseh; PUMAPA thupêk angkan kî tho tâk a nit,” a ti a.

¹⁴Khante, Samuela khan, “A nit inteh, so bera neh sial irâm kî riathei soh ingka tliam ai nit tâk?” a ti a.

¹⁵Saula khan, “Ki mihein Amalek mihei ta an hong ilâk pêk a nit. PUMAPA ni Pathian zianga ribôlna ranga mipuihein bera ṭha ṭha neh serâtchal iṭha ṭha an izua a nit; a dang murdi chu kin ithat vang a nit,” a ti a.

¹⁶Samuela khan Saula ziangah, “Dâirek roh, zânin ta ki zianga PUMAPA thusîr nang iril ki ti,” a ti a. Saula khan a ziangah, “Ne sîr pêk roh,” a ti a.

¹⁷Samuela khan, “Nangma ringaiin mi chînte tak angkan ribe man inla, Israel nam pumpui ruaitu kêng nî nit. PUMAPA khan Israelhei rêng rangin riak nang a înrithu a nit.

¹⁸Ani khan nang a tir suak a, ‘Fen la, Amalek mihei mi siatakhei khah that riai inla, an rimang phar mâkah chu doi mai roh,’ nang a ti a.

¹⁹A nit inteh, ithôm PUMAPA thu khah zôm iloi a, râllâk thil khah ibô zela ni îbô a, PUMAPA mitmuah thil ṭhano nî tho tâk?” a ti a.

²⁰Saula khan Samuela ziangah, “PUMAPA thu chu ki zôm khate, a ne tir lam angkan ki fe a, Amalek rêng Agaga ki hong man a, Amalek mihei khah ki that riai khate.

²¹Khannisela, ki mihei khan râllâk thil berahei neh serâtchalhei that inrimang vang ranghei lâia â ṭha ṭhahei khah Gilgal khuaa PUMAPA ni Pathian zianga ribôlna lan rangin an hong ilâk a nit,” a ti a.

²²Samuela khan, “PUMAPA khan a thu zôm ai lôm angkan hâlrivâm thillanhei neh ribôlnahei hih ai lôm im ai nit? Ringai roh, Ribôlna nêkan thu zôm khah a ṭhat ual a, berachal itak nêkan a thu pom khah ai ṭhat ual a nit.

²³A chunga rihelna hi dôithiamna sualhei neh munkah a nit a, tuklullianna hi mirmil biakna neh munkah a nit. PUMAPA thupêk ni nôl tâk sikin ani khomin rêng rangin nang ai nuam ual khâi ino a nit,” a ti a.

²⁴Saula khan Samuela ziangah, “A nit, ki îsual tâk a nit. PUMAPA thupêk neh ni thu khah ki lei izôm khâi ino pial a nit. Ki mipuihei ki ṭi a, an thu ki lei iôi tâk a nit.

²⁵Khannisela, atûnah hin ki sual ngaidam inla, PUMAPA chubai ki ûn theina rangin Gilgalah ne fe pui roh,” a ti a.

²⁶Samuela khan Saula ziangah, “Nang fe pui tlak no ning e, PUMAPA thupêk ni nôl tâk a, PUMAPA khomin Israel rêng rangin nang ai nuam bîk khâi ino a nit,” a ti a.

²⁷Khanungchu, Samuela khah ife ranga a hang rihêlin chu Saula khan a puan môr khah a hang itûk a, a thlêr tâk a.

²⁸Samuela khan a ziangah, “Vuaninta rithokah hin PUMAPA khan Israel ram hi ni kut ata a lâk paih tâk a, nangma nêka ṭha ual ziangah ai pêk tâk a nit.

²⁹Israelhei roinpuina Pathian khah riphial no nia, a lungril khom thleng no nih. Ani chu miriam angkana lungril ithleng nôk pai ngai mi ni mak e,” a ti a.

³⁰Saula khan, “Ki lei îsual tâk a nit; nikhomsela, ki mihei lâia ruaituhei neh Israel mipuihei maah hin ki chungah maritna lân lang rangin nang kî ngên a nit. PUMAPA ni Pathian chubai ki ûn theina rangin ne fepui ngêt roh,” a ti a.

³¹Khanchu, Samuela khan Gilgalah a fepui a, Saula khan PUMAPA chubai a ûn tâk a.

³²Samuela khan, “Amalek mihei rêng Agaga khah hin ki ziangah hong ṭhui rei,” a ti a. Khanchu, Agaga khah a ziangah khan iṭi rilônthing pumin a va fe a. Agaga khan a lungrilin, “Thina inrît chu kî zôk tâk chu nîng a ti,” a ti a.

³³Samuela khan, “Ni khandaiin nu itam takkah nai iboia ai siam angkan ni nu khom nupang lâiah nai nei ino mi ni tâng a ti,” a ti a. Khanchu, Samuela khan Agaga khah Gilgal khuaah PUMAPA mâichâm maah khan archan nôi tâk a.

³⁴Khanungchu, Samuela kha Rama khuaah a fe a; Saula kha a in omna Gibea khuaah khan a fe tâk a.

³⁵Samuela khan a thinî dênin Saula khah ithlo nôk khâi mak a; khannisela, Samuela kha Saula sikin ringaisiat takkan ai om a nit. PUMAPA khan Israelhei rêng ranga Saula a lei iphun khah a însîr a nit.