Read Biete 1 SAMUELA 16 Bible Online

1 SAMUELA 16 - Biete bible

1 SAMUELA 16

¹PUMAPA khan Samuela ziangah, “Israel mihei rêng ranga kî nuam khâi ino Saula sikah hin itena sôt im ringaiinsian nî om rang hi? Ni siriak bûrah khan riak thun insip inla, Bethlehem mi Jesaia ziangah fe roh; a naipahei lâia mi rêng rangin ki irthlang diam tâk a nit,” a ti a.

²Samuela khan, “Ingkan im ki fe thei rang? Saulan a lei riatin chu a ne ithat rang kêng,” a ti a. PUMAPA khan, “Serâtte kâi inla, ‘PUMAPA zianga ribôl ranga zuang ki nit,’ ti roh.

³Ribôlnaa khan Jesaia khah koi inla, ni tho rang kha nang iril ki ti. Mi arming nang ki îril rang tak kha rêng rangin riak nen rithu rang a nit,” a ti a.

⁴Khanchu, Samuela khan PUMAPA ti lam angkah khan a tho a, Bethlehemah khan a fe tâk a. Kho ulianhei khan rilônthing pumin an lei don a, “Ṭhat tiang thua zuang im ni nit hi?” an ti a.

⁵Ani khan, “Ṭhat tiang thua a nit. PUMAPA zianga ribôlna lan ranga zuang ki nit. Rithâr unla, ribôlnaah ki ziangah hong sa rei,” a ti a. Ani khan Jesaia neh a naipahei khom khah rithâr a, ribôlnaa hong rangin a fial a.

⁶Khante, an hong tlungin chu, Samuela khan Jesaia naipa Eliaba khah a lei en a, a lungrilin, “Hi mi PUMAPA maa ding hi PUMAPA irthlangah chu ni ngêt a ti,” a ti a.

⁷Khannisela, PUMAPA khan Samuela ziangah, “A mêlṭhat manih, a dung risâng dân manih, en no roh. Ani hi chu kî nuam ino a nit. Keiman chu miriam en dân angkan kî en ino a nit. Miriamin chu putianga lang dân an en ngai a, PUMAPA khan chu lungril ai en ngai a nit,” a ti a.

⁸Khanungchu, Jesaia khan a naipa Abinadaba a koi a, Samuela ziangah a hong ṭhui a; khannisela, Samuela khan, “Hih khom hi PUMAPA irthlang la ni mak e,” a ti a.

⁹Khante, Jesaia khan Sama a hong ṭhui nôk a, Samuela khan, “Hih khom hi PUMAPA irthlang la ni mak e,” a ti a.

¹⁰Khangkan Jesaia khan a naipahei sarikah kha Samuela makungah khan a hong ṭhui a. Samuela khan Jesaia ziangah, “Hihei hihPUMAPA irthlang ni mak,” a ti a.

¹¹Khanungchu, Samuela khan Jesaia ziangah, “Hin ni naihei an om rikip riai im?” a ti a. Jesaia khan, “Â thlum tak a la om a; khannisela, bera enkol a nit,” a ti a. Samuela khan, “Vân koi inla, a hong tlung mâkah chu ribôlna ei ilan ino rang a nit,” a ti a.

¹²Khanchu, Jesaia khan a vân koi a, Samuela makungah a hong ṭhui a. Ani chu tak imar tak, mit meng enihoi tak, mêl iṭha tak a nit a. PUMAPA khan Samuela ziangah, “Thoi inla, riak inrithu roh, ani hi a nit,” a ti a.

¹³Khanchu, Samuela khan riak bûr khah a lâk a, a urênghei maah khan Davida chu riak ân rithu tâk a. Voikazelin PUMAPA rithla khah Davida chungah a zuang tlung a, kha nî-a rithokah khan a ompui mai tâk a. Khanungchu, Samuela kha Rama khuaah a kîr nôk tâk a.

¹⁴PUMAPA rithla khan Saula khah a mâk tâk a, PUMAPA itir rithla sual khan ani chu ân buai ngai a.

¹⁵Saula somhei khan a ziangah, “Ringai ta, Pathian itir rithla sualin nang a înbuai a nit.

¹⁶Khasikin, Epu thu ne pen la, ṭingṭang tum ithiam tak lei zong rong ung. Khanchu, rithla sual khan nang a man ikipah kha mi khan ṭingṭang nang tum pêk a ta, hong ṭha nôk zel ngai ni ti,” an ti a.

¹⁷Saula khan â somhei ziangah khan, “Â tum ithiam tak kha ne zong pêk unla, ki ziangah hong ṭhui rei,” a ti a.

¹⁸A zianga om tlangvâl khatkah khan a sâm a, a ziangah, “Bethlehem kho mi Jesaia naipa ki mu tâk a, kha mi khah irîhoi tum ithiam tak a nit. Khabanah, ani khah mi hâi neh mêl iṭha tak, sipai iṭha tak neh thusîr ithiam tak a nit a, a ziangah PUMAPA khom ai om a nit,” a ti a.

¹⁹Khanchu, Saula khan Jesaia ziangah khan mi a tir a, “Ni naipa Davida, bera enkola om ngai khah ki ziangah hong tir roh,” itin mi a tir a.

²⁰Jesaia khan sakuartung, ibai neh uain ûm ipêl neh kêlte a lak a, a naipa Davida kutah Saula peh rangin ân chôi tâk a.

²¹Davida khah Saula ziang a va tlung a, a makungah a va ding a. Saula khan a lei kan tak tak a, a râlthluk chôitu rangin a lei rithlang tâk a.

²²Khanungchu, Saula khan Jesaia ziangah, “Davida hi ki ziangah om riseh, ki mit ai tlung a nit,” itia ril rangin mi a tir a.

²³Khangkan Pathian itir rithla sual khan Saula a man ikipah Davida khan ṭingṭang a lâk a, ân per pêk a. Khanchu, rithla sual khan a mâk ngai a, Saula chu a hong har a, a hong iṭhat nôk ngai a nit.