Read Biete 1 SAMUELA 17 Bible Online

1 SAMUELA 17 - Biete bible

1 SAMUELA 17

¹Filistia mihei khan ridoi rangin Judai ram sung Soko khuaah an sipai an bûm a; Soko khua neh Azeka kho kâra Efes Damim an iti munah khan ṭangmun an khuar a.

²Saula neh Israel mihei kha an ribûm a, Ela phâiah ṭangmun an khuar a.

³Filistia mihei kha itlâng pangah an om a, Israel mihei kha a râltianga itlâng pangah khan an om a, an kârah khan phâi a om a.

⁴Khante, Filistia mihei ṭangmuna rithokah khan an mi rât, arming Goliatha, Gath kho mi, mûk irukkah neh khâpka risâng hi a hong suak a, Israelhei chu a hong sarai a.

⁵Ani khan dâr lukhum hi a khum a, dâr ṭângipho â hâk a; a ṭângipho rik dân khah her sômringaka sarikah vêla rik a nit a.

⁶Arngalah khan dâr ngalipho arbun a, a dârah khan dâr ifei arva a.

⁷Â fei ngul khah puanpui rikol tiakah a nit a, a fei lu kha thîr her sarika vêla rik a nit. Â pho chôitu sipai khah a matonah a lôn a.

⁸Goliatha khah â ding a, Israel sipaihei khah â khêk khum a, an ziangah, “Îtho rang sik im ridoi ranga nin zuang înrân? Kei chu Filistia mi ki nit a, nangni chu Saula suak nin nit khate! Nin lâiah mi khatkah rithlang unla, ne hong risualpui riseh.

⁹Ani khan a ne nê a, a ne thatin chu nin suak chang kin ti; khannisela, keiman ke nê a, ki thatin chu kin suak chang nin ti.

¹⁰Atûnah hin Israel sipaihei chu kî saraiin kî ot a nit, mi khatkah hong rithlang unla, lei risual rong ung,” a ti a.

¹¹Saula neh Israelhei murdi khan Filistia mi thusîrhei khah an riatin chu iṭin an rilo ân thing tâk a.

¹²Davida chu Jesaia naipa a nit a, Judai ram Bethlehem Efrat mi a nit. Jesaia khan naipa iriatkah a nei a; ani chu Saula inlal lâiah khan a tar ok tâk a.

¹³Jesaia nai ulianhei ithumkah khan ridoinaah Saula khah an zui a. A nai ridoina fehei riming chu a ulian tak Eliaba, â nikna Abinadaba, â thumna Sama hei an nit.

¹⁴Davida khah â thlum tak a nit a, a ulian ithumkahei kha chu Saula ziangah an om a.

¹⁵Davida chu Saula ziang ata Bethlehemah a pa bera enkolin a va fe ngai a.

¹⁶Goliatha khan zîng neh kholoi ikipah hin sûn sômilika sung Israelhei chu a sarai mai ngai a.

¹⁷Sûnkah chu Jesaia khan a naipa Davida ziangah khan, “Bu zêi her sômkah neh ibai thliam sômkah hi chôi inla, ni urênghei ziangah an riabukah va fe zel roh.

¹⁸Khante, dût thâi lûm sômkah hi an pôla sâng ruaitu chôi pêk inla, ni urênghei ingkan im an om hong ridon inla, an thurchi hong reh roh.

¹⁹Rêng Saula neh ni urênghei neh Israel mi murdihei khah Filistia mihei idoiin Ela phâiah an iom a nit,” a ti a.

²⁰Davida chu atûk zîng takah a thoi a, berahei kha enkoltu khatkah a lei inkol a, Jesaia hebe lam angkah khan ifarua khah a chôi a, a fe tâk a. Israel sipaihei kha ridoina muna fe rang an rithok chak a, an lei ipâi dur dur lâi takin ani khan riabuk khah a va tlung a.

²¹Khante, Israelhei neh Filistia mihei chu ridoi rangin an lei inrân a, sipai neh sipai khah ma risongin an lei om a.

²²Davida khan ifarua ai chôi khah fâknêk enkoltu ziangah khan a sia a, sipaihei ziang tiangah khan a va tlân a, a uhei khah chibai a va tûk a.

²³Khante, anmani â sôn mai lâiah khan Goliatha khah Filistia mihei sipai pôl lâi ata a hong suak a, matona a tho ngai lam angkah ngirah khan Israelhei khah a sarai a. Amakhah Davidan a riat a.

²⁴Israel mi murdihei khan kha mi khah an hang mun chu iṭin lâizâm an tho a.

²⁵Israel mihei khan, “Kha miriam hong isuakah khah nin mûm? Israel mihei isarai rangin a hong isuak a nit ngêt. Tukhom kha mi that kangân chu rêngin loman natinsat takin vur a ta, a nainu khah nupuiin innei a ta; khante, a pa insungkuahei khah Israelhei lâiah hin sia chôi no nih,” an ti a.

²⁶Davida khan a kôla dinghei khah ardon a, “Hi Filistia mi hih ithat a, Israelhei riming siatna inboitu khah im ipe ai nit rang? Hi sertan ino Filistia mi hih tu ngân im ai nit a, Pathian iring sipaihei ai sarai rêng rêng hi?” a ti a.

²⁷Mipuihei khan an sâm a, “Â thattu tak chu kin iti angkan isin pêk nîng a ti,” an ti a.

²⁸Khante, a ulian tak Eliaba khah Davida chungah khan a ning a thik thut a, a ziangah, “Hin im ni zuang itho? Ramkâra ni bera omhei tu ngân im ni în-enkol hi? Ni lârripâkzia neh ni lungril ṭhat nozia kî riat a nit. Ridoi ien rang ringota nî zuang pipai a nit,” a ti a.

²⁹Davida khan, “Ingân im ki tho a? Ṭongbâika lua ki irdon thei ino rang im ai nit,” a ti a.

³⁰Mi dang tiang a ngat a, a ṭongridon ngaingir khah ardon a; mipuihei khan matona an sâm lam angkah takin an sâm korong a.

³¹Mi ṭhenkan Davida thusîr khah an riatin Saula ziangah an isîr pêk nôk a, ani khan a koi a.

³²Davida khan Saula ziangah, “Kha Filistia mi sikah khan tute lungril indôp no riseh. Keimah fêng ki ta, va doi ki ti,” a ti a.

³³Saula khan Davida ziangah, “Nangman chu Filistia mi khah la doi thei hi no tin e, thuarbapte bang kêng ni la nit a. Ani chu a thuarbap lâi ata ridoi mi a nit a,” a ti a.

³⁴Davida khan Saula ziangah, “Ni bôi hin ki pa bera ki enkol ngai a; sakeibaknei manih, ivom manih a hong a, bera lôm lâia berate an man heiah hin

³⁵Ker zûl a, ker sualpui a, berate khah an bâi ata kî sanisua ngai a nit. Sakeibaknei manih, ivom manih nê sê ranga a hong khomah hin â bakmulah ki lei mana ki îtôk that ngai a nit.

³⁶Sakeibaknei neh ivomhei ki that tâk ngai a, kha sertan ino Filistia mi, Pathian iring sipai hong isaraitu khom khah khangkan kî tho rang a nit.

³⁷Sakeibakneihei neh ivomhei ata ne sanisuatu PUMAPA khan kha Filistia mi kut ata khah a ne isansuak rang a nit,” a ti a. Khanchu, Saula khan Davida ziangah, “A ṭhat, fe roh, PUMAPA chu ni ziangah om riseh,” a ti a.

³⁸Saula khan Davida khah ama râlthlukin ân rivo a, dâr lukhum ân khum a, ṭângipho ân hâk a.

³⁹Davida khan a râlthluktla chungah khan Saula khandai khah a vong a; khangkah khan a la tho risin ngai no sikin chângpui thei mak a. Khanungchu, Davida khan Saula ziangah, “Hingka hin chu risualpui thei no ning e, hingka hin ki lai tho risin tlak ngai ino kêng a nit a,” a ti a. Khanchu, Davida kha arkhek riai tâk a.

⁴⁰A bera rol a chôi a, vadunga lungichêng ringakah a rût a, a choliah khan arva a. A vailungdêng khah a chôi a, Goliatha kha a va nâi tâk a.

⁴¹Filistia mi khah a hong rithok a, Davida kha a hong pun a; â pho chôitu khah a matonah a lôn a.

⁴²Filistia mi khan a hei en a, Davida khah a hei mun felin chu a musit ok a; tak imar pam, mit meng enihoi tak, thuarbapte bang a nit a.

⁴³Khanchu, Filistia mi khan Davida ziangah khan, “Ui im ni ne isôn, irol neh ni ne hong ipun kha,” a ti a. Khanchu, Filistia mi khan a pathian riming ichingin Davida khah vâni a sâm tâk a.

⁴⁴Davida ziangah khan, “Hong roh tho, ni sahei khah chunga vuang ivahei neh ramsahei lei infah hi rong,” a ti a.

⁴⁵Davida khan a sâm a, “Nangman chu khandaihei, ifeihei ichôiin ni hong rithoka; khannisela, keiman chu Tinrêngthothei, Israelhei Pathian, nî musita rimingin ki hong irthok a nit.

⁴⁶Vuanah hin PUMAPA khan nangmah hi ki kutah a ne ipêk rang a nit; nang that ki ta, ni lu nang kî tan pêk rang a nit. Filistia sipaihei ruak khah vuanah hin chunga vuang ivahei neh ramsahei ki înfâk rang a nit. Khanungchu, rinêng chunga mi murdi hin Israelhei lâiah hin Pathian a om iti reh tâng an ti.

⁴⁷Khante, hintaka arbûmhei murdi hin PUMAPA khan a mihei saninzôkna rangah hin khandaihei manih, ifeihei manih nang mak e, iti mûng an ti. Ridoina chu PUMAPA ridoina a nit a, ani khan ki kutah hin nangnihei hi a ne ipêk rang a nit,” a ti a.

⁴⁸Goliatha khah a hong rithoka Davida doi ranga a hong nâi tîr tîra lâiah khan Davida kha Filistia sipaihei inrânna tiangah khan Goliatha doi rangin rimot takkan â tlân a.

⁴⁹Davida khan a choli a zuk ipûr a, lung sâilûm a zuk lâk a, a vailungdêngah khan Goliatha khah a hang dêng a. A chaldor takkah a hang dêng a, â chalah khan lung sâilûm khah a lût a, Goliatha kha a khup takin â lîr tâk a.

⁵⁰Khanchu, Davida khan khandai chôi loiin, Goliatha kha vailungdêng neh lung sâilûmin a that tâk a.

⁵¹Khanungchu, Davida khah â tlân a, Goliatha khandai khah a kok ata kha a thuat a, a lu a tan a, a that tâk a. Filistia mihein an râlpa khah a thi iti an riatin chu lâizâm an tho tâk a.

⁵²Israel mi neh Juda mihei khah an thoi a, huaizâm an isam a, Filistia mihei khah Gath idênin neh Ekron kul kotbâi idên rakkan an rizûl tâk a. Filistia mi popliamhei khah Saraima rithoka Gath neh Ekron idênin lamthluanin an idal rem rum a.

⁵³Israel mihei khan Filistia mihei rizûl khah an hong kîr nôk a, an riabuk khah an irok a.

⁵⁴Davida khan Goliatha lu khah a lâk a, Jerusalemah a chôi a; khannisela, Goliatha râlthluk kha chu a puan inah a sia a.

⁵⁵Saula khan Goliatha doi ranga Davida a fe khah a mun chu a sipai ruaitu Abnera ziangah khan, “Abner hi thuarbapte hi tu nai im ai nit?” a ti a. Abnera khan, “O rêngpa, kî riat tlak ino kêng,” a ti a.

⁵⁶Saula khan, “Khanchu, fen la, hi thuarbapte hih tu nai im ai nit ridon infel roh,” a ti a.

⁵⁷Khanchu, Davida khah Goliatha a that zoia a hong kîr nôkah khan Abnera khan Saula ziangah a ṭhui a. Davida khan Goliatha lu khah a la chôi ṭian a.

⁵⁸Khante, Saula khan a ziangah, “Tlangvâl, tu nai im nî nit?” a ti a. Davida khan a sâm a, “Bethlehem mi, ni bôi Jesaia naipa ki nit,” a ti a.