Read Biete 1 SAMUELA 18 Bible Online

1 SAMUELA 18 - Biete bible

1 SAMUELA 18

¹Saula neh Davida an risôn kha an mong tâk a. Kha rizoiah khan Saula naipa Jonathana khan Davida chu arngai innat tak tak a. Jonathana khan ama ringna lung a înkham angkah dôrkan Davida khah lung ân kham a.

²Saula khan kha nî-a rithokah khan Davida khah a ziangah ân om zel tâk a, a pa ina infe khah phal khâi mak a.

³Khangkan, Jonathana khan ama ringna angkah chian Davida khah lung a thlung sikin rualrichanna thuthlung a thlung tâk a.

⁴Khanchu, Jonathana khan a zakorfual a ihâk lâi khah a khêng a, Davida a pêk a, a râlthluk neh a khandai, a phel neh a kongkhithei khom a pêk a.

⁵Saulan a tirna kipah Davida khah a fe a, thluan a tlung mai a; khanchu, Saula khan a sipai ruaitu rangin a siam a; amakha Saula milianhei neh mi murdi khomin ṭha an ti tak tak a.

⁶Davida khan Goliatha a that zoia a hong kîr nôk a, sipaihei neh munka in tiang an hongah khan Israel khotina nupanghei la saka ilâm pumin khuangte neh têngrep isukin, râiifân takkan rêng Saula don rangin an hong suak a.

⁷Khante, nupanghei khan ilâm puma la sakin an ridonliang a: “Saulan a sânga sâng a that a, Davidan a sînga sîng,” an ti a.

⁸An la sak khah Saula khan ringai nuam mak a, a ning a thik ok a, “Davida chu a sînga sîng ithattun an ringai a, kei chu a sânga sâng bang ithattun an ner ngai a. Hingkan a nitin chu ani hih rêngin an isiam ngêt rang a nit hite,” a ti a.

⁹Khanchu, Saula khan kha nî-a rithokah khan Davida khah mitmul sunin a nei tâk a.

¹⁰Atûkah khan Saula chungah khan Pathian itir rithla sual khah a hong tlung a, insungah khan invêt angkan a chiar buan buan tâk a. Davida khan sûn danga a tho ngai lam angkan ṭingṭang a tum a; Saula khan â fei a chôi ṭian a.

¹¹Saula khan a lungrilin, “Banga son Davida lei ikhô de khap rong,” a ti a. Khanchu, voinikah sar Davida khah â khô a; khannisela, â khô fengin Davida khah a lei rikiang thar thar a.

¹²Davida ziangah PUMAPA a om sik neh Saula a mâk tâk sikin Saula khan Davida chu a ṭi a.

¹³Khanchu, Saula khan a ziang ata Davida chu a thon pai a, a sipai sângka chunga ruaitun a siam a. Davida chu sipaihei ma ruaiin a lûtin a suak a.

¹⁴A sinthona kipah thluan a tlung mai a, PUMAPA chu a ziangah a om mai a.

¹⁵Saula khan Davida tlukzia a mun, a ṭi ual ual tâk a.

¹⁶Khannisela, Israelhei neh Judahei murdi khan ruaitu thluan itlung tak a nit sikin Davida chu an ringai innat tak tak a.

¹⁷Khanungchu, Saula khan Davida ziangah, “Ringai ta, nainu ulian ual Merabi hi nupuiin nang innei ki ti; sipai ihâi neh iamom takin ne thlop khap inla; PUMAPA rang ridoinahei chu doi roh,” a ti a. Saula khan, “Keiman a chungah kut tlâk loiin Filistia mihein a chungah kut tlâk lem riseh,” itin ai ngaitua a nit.

¹⁸Davida khan Saula ziangah, “Tu ngân im ki nit a, Israelhei lâiah ki pa insungkua khom hih im an nit a, rêng imâkpa ki hang nitna rang khah,” a ti a.

¹⁹Nikhomsela, Saula nainu Merabi khah Davida innei zoro a hong nitin chu Meholat mi Adriela nupui rangin a pêk tâk a.

²⁰Khannisela, Saula nainu Mikali khan Davida chu lung a thlung a; Saula khan a riatin chu a lôm ok a.

²¹Saula khan a lungrilin, “Â ôkna châng a hong nit theina rang neh Filistia mihein a chungah kut an tlâk theina rangin Mikali hi chu Davida lei innei rong,” a ti a. Khanchu, Saula khan a voiniknan Davida ziangah, “Vuanah hin ke mâkpa ni chang rang a nit,” a ti a.

²²Khanungchu, Saula khan a milianhei khah idâireka Davida chu risônpuia, a ziangah, “Rêng chu ni chungah a lôm ok a, a milianhei murdi khomin nang an ringai innat a; atûnah hin rêng imâkpaa om hih ni ta rangin ai ṭhat a nit,” iti rangin thu a pêk a.

²³Khanchu, kha thu khah Davida kuar riatah an isîr a. Khante, Davida khan, “Mi inriang neh tute înlut ino keima angkana hin rêng imâkpa hang ini rang khah thil te pai nin isôn mani?” a ti a.

²⁴Saula milianhei khan Davida ṭong tihei khah an isîr pêk a.

²⁵Khanchu, Saula khan anni khah Davida ziangah, “Rêng khan â râlhei phuba lâknan Filistia mihei servun rizakah ti no chu man îte lah no nih,” va ti rangin thu a pêk a. Khangkah khan Saula khan Davida khah Filistia mihei kuta inthat ai phanrûk a nit.

²⁶Saula milianhei khan kha thu khah Davida an hang irilin chu rêng imâkpa a hang nit rang khah Davida khan a lôm ok a. Rinei nî sûn ranga khit khah a la tlung maah khan,

²⁷Davida neh a mihei khah an fe suak a, Filistia mihei rizanikah an va that a. Khante, Davida khan an iservun a hong chôi a; khanchu, rêng imâkpa a nit theina rangin rêng khah rikip takkan a pêk a. Khanchu, Saula khan a nainu Mikali khah nupuiin ân nei tâk a.

²⁸Saula khan Davida ziangah khan Pathian a om iti a riat infel tâk a; khabanah, a nainu Mikali khan Davida chu lung a thlung tak tak iti a riat a.

²⁹Khanchu, Saula khan Davida chu a ṭi ual ual tâk a; Saula chu a dam sung kârkah Davida râl a nit tâk a.

³⁰Khangkan Filistia sipaihei khah hong rithok suakin, an hong doi ngai a; khannisela, an ridoi ikipah Davida chu Saula milian danghei murdi nêkan thluan a tlung ual ngai a. Khasikah khan Davida riming khah a hong inthang tâk a.