Read Biete 1 SAMUELA 19 Bible Online

1 SAMUELA 19 - Biete bible

1 SAMUELA 19

¹Saula khan a naipa Jonathana neh a milianhei murdi khah Davida that rangin he a be a. Khannisela, Jonathana khan Davida chu arngai innat tak tak a.

²Khanchu, Jonathana khan Davida ziangah, “Ki pa Saula hin nang ithat a tum a; khasikin, naktûk zîngah chu ridîn inla, mun rithupah ribih ṭian roh.

³Khante, fêng ki ta, ner bîkna phûlah ki pa kôlah va ding ki ta, ni chungchâng thu-ah ki pa risônpui ki ta; im manih kî riat a omin chu nang iril ki ti,” a ti a.

⁴Jonathana khan a pa Saula makungah Davida khah ân pâk a, a ziangah, “Rêng khan a suak Davida chungah hin thil isual tho tlak no riseh. Ni chungah îte thonsual mak a, kha nêkan a thilthohei khah ni ta ranga ṭha korong a nit ual a.

⁵Ithi khom ṭi loiin Goliatha khah a doi a; khante, PUMAPA khan Israelhei murdi saninzôkna roinpui tak ai tho suak pêk a nit. Amakhah nang khomin ni mu a, ni lôm ok a. Îrang sikin im mi ningsiat sin ino chungah khan kut itlâk a, a bi îte om loiin Davida chu nî that rang?” a ti a.

⁶Khangkan Saula khan Jonathana thusîr khah â pom a. Saula khan ṭongrikhâmin, “PUMAPA riming ichingin kî ti a nit, Davida chu ithat rang ni tlak mak e,” a ti a.

⁷Khanchu, Jonathana khan Davida khah a koi a, kha thuhei khah â ril riai a. Khanungchu, Jonathana khan Davida khah Saula ziangah a ṭhui a, matona angkah ngirah khan rêng sin khah a tho nôk tâk a.

⁸Filistia mihei neh ridoina a hong om nôk a. Khanchu, Davida kha arthok suak a, Filistia mihei chu a va doi a, a that iṭhiam a, a maah khan lâizâm an tho tâk a.

⁹Sûnkah chu Saula kha a inah ifei ichôi ṭianka â ṭhung lâiin PUMAPA itir rithla sual khah a chungah a hong tlung a; Davida kha ṭingṭang a tum a.

¹⁰Saula khan â feiah khan Davida khah banga khô de khap a tum a; Khannisela, Davida khah a lei riheng thar a, ifei khah bangah khan ân châikhap tâk a. Davida chu â tlân suak a, a zôk tâk a.

¹¹Kha zân ngirah khan Saula khan Davida in tiang zînga lei iruanga that rangin mi a tir a. Davida nupui Mikali khan, “Vuanzânah hin ni rot non chu naktûk nang an ithat rang a nit,” a ti a.

¹²Khanchu, Mikali khan Davida khah tukverah â ṭhum a; â tlân suak a, a zôk tâk a.

¹³Khanungchu, Mikali khan insung mirmil khah a lâk a, zâlmunah khan ân zâl a; khante, a lu tiangah khan kêlmul lukham a sia a, puanin arkhû a.

¹⁴Davida ṭhui ranga Saulan mi a hong itirhei ziangah Mikali khan, “Dam mak e,” a lei ti a.

¹⁵Khannisela, Saula khan Davida khah anmani ngêiin va en rangin a hong tir kîr nôk a, an ziangah, “A zâlmun pumin ani chu hin hong rizôn unla, keiman lei that ki ti,” a ti a.

¹⁶A mi tirhei khah an va tlungin chu zâlmunah khan mirmil kha a lu tianga kêlmul lukham ikhamin a lei om an mu a.

¹⁷Saula khan Mikali ziangah, “Îtho sik im hingkana ni ne ilêm a, ke râl ni înzôk hi?” a ti a. Mikali khan Saula khah a sâm a, “A zôkna ranga ki san non chu ne that ai tum khate,” a ti a.

¹⁸Davida khah a rot a, a zôk tâk a, Rama khuaah Samuela ziangah a fe a, a chunga Saula thiltho murdi khah â ril a. Khanungchu, amah neh Samuela khah Naiothaah[5] an fe a, amakhan an om tâk a.

¹⁹Saula ziangah khan, “Davida chu Rama khuaa Naiothaah a om,” itin an iril a.

²⁰Khanchu, Davida ṭhui rangin Saula khan mi a tir a. Anni khan zânthla lôm ilâma thusîr suai suai Samuelan â ruai lâi khah an va mu a. Khanungchu, Saula mi tirhei chungah khan Pathian rithla a zuang tlung a, anni khom khan ilâmin neh thusîr suai suaiin an om tâk a.

²¹Kha thu khah Saulan a lei riatin chu mi dang a tir nôk a, anni khom khah ilâmin thu an va sîr suai suai nôk tâk a. Saula khan a voithumnan mi a tir nôk a, anni khom khah ilâmin thu an va sîr sa suai suai tâk a.

²²Khanungchu, ani khom khah Rama khuaah khan a va fe sa tâk a. Seku muna tuisunsua rizat tak khah a va tlung a, “Samuela neh Davida hi taktiang im an iom,” a ti a. Mi khatkah hin, “Rama khuaa Naiothaah an om,” a ti a.

²³Khanchu, Rama khua Naiothaah a va fe a, Pathian rithla a chungah khan a zuang tlung sa tâk a, lamthluanin Rama khuaa Naiotha a tlung idênin ilâm pumin thu â sîr buan buan thiai mai a.

²⁴Ani khomin a silbomhei a khêng a, Samuela maah khan a lâm a, thu â sîr buan buan sa tâk a, kha nî sûntluan neh kha zântluanin korongboin a zâl tâk a. Khasikah khan, “Saula khom kha zânthla ai nit sa tâk mani?” iti hi an isong mai tâk a nit.