Read Biete 1 SAMUELA 2 Bible Online

1 SAMUELA 2 - Biete bible

1 SAMUELA 2

¹Hani khah a ṭongṭai a: “PUMAPA chungah ki lungril a lôm tak tak a, Thil a ne tho pêk sikah hin PUMAPA chungah kî lôm tak tak a nit. Ke râlhei chu ki bâiin a phenêng a, Pathian saninringnaah khan kî lôm tak tak a nit.

²PUMAPA angkana rithiang hi omak e; Ama angkana zel omak, Ei Pathian angkana zôkna lungpui dang zel omak e.

³Lârripâk takka ṭong ringam unla, Nin bâia rithokin risong ṭong rêng rêng suak no riseh. PUMAPA chu tinrêng iretu Pathian a nit a, Ani khan mi tin sintho khah ai var ngai a nit.

⁴Mi râthei phelngulhei â khiak a, Mi rât inohei kha a hong inrât ngai a.

⁵Khop ithlâi taka om ngaihei kha ifah rang izongin rilofan an om tâk a. Vonṭâm ituang ngaihei kha khop ithlâiin an om tâk. A nit, nupang iching khan nai sarikah a nei tâk a, Nai itam takka neinu kha kut korongin a om tâk.

⁶PUMAPA khan a that ngai a, ân ring nôk ngai; Mithi khuaah ân fe ngai a, a ṭhui ikhîr nôk ngai.

⁷PUMAPA khan inriangin a siam ngai a, Richongin a siam nôk ngai; Ân tlôm ngai a, a chôiinrisâng nôk ngai.

⁸Inrianghei kha ipil ata a kâiithoi ngai a, Rianginvâihei kha vutpông ata a chôi inrikâng ngai. Ani khan milianhei lâiah ân om ngai a, Roinpuina rêng ṭhungmun ân lua ngai. Leilung ringatna kha PUMAPA ta a nit a, A chungah khan rammual hi a înringat tâk a nit.

⁹A mi rithianghei ke chu a vênginzôk ngai a, Mi siahei chu zîng richel chitah an rimang ngai; Râtna ringotin chu tute nêna chang thei no nih.

¹⁰PUMAPA doituhei chu thlavâiin om an ta, Rivâna rithokin khuarîn doi a ta. PUMAPA khan rammual pumpui roirêl a ta; A rêng kha râtna pêng a ta, A riak inrithu-a râtna kha chôiinrisâng a ti,” a ti a.

¹¹Khanungchu, Elkana kha Rama khuaa a inah khan a kîr nôk tâk a; khannisela, naipangte Samuela kha chu Silo khuaah khan a om mai tâk a, thiampu Elia ruaina nuaiah khan PUMAPA sin a tho tâk a.

¹²Elia naipahei kha mi chanlamboi an nit a, PUMAPA khom marit tho no an nit.

¹³Mipuihei chunga thiampuhei om dân rang angkan khom om ino mi an nit a. Ribôlna thillan mihein an hong lan ikipah hin an isomhei kha sa thurna thîrkut rizum ithumka inṭâk chi chôiin an hong ngai a. Sa suang lâi kha,

¹⁴sa suangna bêlah khan sa thurna thîrkut rizumah khan an zuk sun a, kha sa thurna thîrkut rizumin a hong ithur suak murdi kha thiampu khan ai dong ngai a nit. Khangkah khan Israel mi, Silo khuaa ribôlna lan ranga hong murdi khah an lei itho pêk ngai a nit.

¹⁵Khabanah khan, a thâi khah an hâl maah khan thiampu som khah ihongin ribôlna lantu ziangah khan, “Thiampu ta rang ri-em inmin rang sa ne peh roh; ni sa suang khah nuam mak a, â sel ai nuam a nit,” a ti ngai a.

¹⁶Ribôlna lantu khan a ziangah, “A thâi kha ihâl bak ni sela; khanungchu, nî nuam nuam la lah roh,” itin a lei samin chu thiampu som khan, “Ni mak, atûn ne peh zel roh, ni ne pêk non chu zâlrâtin kî lâk rang a nit,” a ti ngai a.

¹⁷Hi Elia naipahei sualna hih PUMAPA mitmun natinsat tak a nit a; anni khan PUMAPA zianga ribôlna lanhei khah marit viat loiin an tho ngai sikah khan a nit.

¹⁸Kha lâiah khan Samuela kha naipangte ni khom sela, puanzâi rimi, thiampu zakua hâkin PUMAPA sin a tho mai ngai a.

¹⁹Khabanah khan kum tin a nu khan zakorfualhei â ṭhui pêk a, kum tin ribôlna thillanhei ilan ranga a pasal neh an fe kipah a chôi pêk ngai a.

²⁰Khante, Elia khan Elkana neh a nupui khah ṭhat a vur a, “PUMAPA zianga nin ilan tâk nin nai mun ithûl rangin hi nupang hih PUMAPA khan nai dang peh riseh,” a ti a. Khanungchu, an in tiang an kîr tâk a.

²¹PUMAPA khan Hani khah ṭhat a vur a, naiipa ithumkah neh nai nupang inikah a nei nôk a. Naipang Samuela kha PUMAPA maah khan a hong seilian tâk a.

²²Elia kha a hong tar ok tâk a; Israel mihei chunga a naihei thiltho murdi neh Ritongna Puan-In kotbâi kôla sinthotu nupanghei an lei zâlpui ngai thuhei khah a lei riat a.

²³Khanchu, an ziangah, “Ithôm hingkana thilhei nin itho hi? Mi tinin nin thiltho dân ṭhanohei an ne sîr pêk a.

²⁴Ki naipahei tho khâi no rei. PUMAPA mihein an îsîr inlum kî riat khah â ṭhano tiang korong a nit.

²⁵Mi khatkan mi dang chungah â sualin chu PUMAPA khan ân zôk ngai a; khannisela, PUMAPA chungah mi â sualin chu tu nim inzôk tâng a ta?” a ti a. Khangkah tenan khom an pa thu ôi nuam ual mak a; khasikin, PUMAPA khan anni khah ithat a tum tâk a.

²⁶Naipang Samuela kha a hong thuar tîr tîr a; Pathian neh miriam mit itlungin a om a.

²⁷Elia ziangah khan Pathian mi khatkah a hong a, a ziangah PUMAPA thu a hong ithlun a, “Nin chibul Arona neh a insungkuahei khah Aigupta rama Faroa bôia an om lâiah khan Arona ziangah ki înlâr ni mak im a?

²⁸Khante, nam murdi lâi ata ki mâichâma fe a, namhoi ihâl a, ki makunga thiampu zakua hâk rangin ki thiampu ranga ani khah ki înkung ai nit ino mani? Ni chibulhei kha Israel mihei hâlrivâm thillanhei kî pêk ni mak im a?

²⁹A nit inteh, ithôm ki mihei lan ranga ki înkung ki zianga ribôlna thillan, ki dongtum ranga ki înkung thillan kha rizuk takkan nî thlîr hi? Ithôm keima nêka ni naipahei ni inlut ual a, anmani rivâi inthâina ranga ki mi Israelhei ribôlna thillan â ṭha ṭha khah an imang hi?

³⁰Keimah, PUMAPA Israelhei Pathian hin ni insungkuahei neh ni panamhei kha kumkhuakan ki thiampu changin, ki makungah om mai nin ti itin ki lei inkung a. Khannisela, atûn chu om tlak khâi no tin u kî ti a nit. Ne chôiinrisâng murdi chu chôiinrisâng ki ta, ne musit murdi chu musit ki ti.

³¹Ringai roh, ni insungkua neh ni panama vânglâihei murdi ken rimang rang nikhua khah a hong itlung thiai tâk a nit; khanchu, ni inah hin tar rikûla dam rêng rêng om khâi no nih.

³²Khanchu, Israel mihei vângsakna kî vur murdi khah rizuk takkan thlîr ni ta, inṭop rikhêl takkan om ni ta; khante, ni inah khan hâiitara dam rêng rêng om no nih.

³³Khanniseh, ner chihei lâiah khatkah chu zuang ki ta, ani khah thiampu changin ki sin thông a ti. Khannisela, ani khah a mitdel a ta, sabei idongin om a ti. Ni ina zuang isuak danghei murdi chu an vânglâi takin sârthi korongin thîng an ti.

³⁴Khante, ni naipahei ruai Hofnia neh Finehasa chunga thil hong itlung rang kha ni ta rangin risinsiana nîng a ta, sûnka sungin an ruaikan thi seng seng an ti.

³⁵Thiampu iamom tak ki ta rangin inding ṭha nôk ki ta, ani khan ki lungdo angkah takin sin thông a ti. Sungkua det takin inding ki ta, kumkhuakan ki riak inrithu-a makungah khan sin thông a ti.

³⁶Hingka hin nîng a ta, ni ina la om murdihei khah tangka neh ibai ingênin kha thiampu ziangah khan fêng an ta, chibai ûn an ta, ibai ichînteka lua ifah rang ki mu theina rangin thiampu sin îkhôk manih nen tho roh, tîng an ti,” a ti a.