Read Biete 1 SAMUELA 20 Bible Online

1 SAMUELA 20 - Biete bible

1 SAMUELA 20

¹Khanungchu, Davida kha Rama khuaa Naiotha ata khah a rot a, Jonathana ziangah a fe a, “Ingân im kî tho a, im ki thon châi? Ni pa chungah hin ingân im kî thonsuala hingkana ne that ai tum hi?” a ti a.

²Jonathana khan, “Nang that no ni a, thi tlak no tin e. Ki pa khan ne ril loiin îte rêng rêng lian riseh chîn riseh khom tho ngai mak e, îtho sikin im hi thu hih ki ziangah ai ip rang, ip tlak no nih,” a ti a.

³Khannisela, Davida khan a sâm a, “Ni pa khan lung ni nen kham dân hi a riat infel riai a; khasikin, ‘Jonathana khan hi thu hi chu reh kher no riseh; khanonchu, a lungril a nat rai lôiin,’ ai ti khom a nit thei. Khasikin, PUMAPA riming ichingin ni ziangah ṭong ki irkhâm a nit, thina neh kin kâr chu kalkah bang a nit,” a ti a.

⁴Khanungchu, Jonathana khan, “Nî nuam murdi chu nang tho pêk mai ki ti,” a ti a.

⁵Davida khan Jonathana ziangah, “Naktûk hi thlathar ruaiṭhe a nit a, rêng zianga khalai rikhîl ngêt rang ki nit a. Khannisela, ṭha nitin chu naktûkkhat kholoi idênin phûlah ribih rangin fêng ki ti.

⁶Ni pa hin kî om ino a nit iti hi a hong riat suak duai a nitin chu, ‘Davida khan a khua Bethlehema va fe vak a ne ngên ngit a; an insungkua rang an kum tin ribôl zoro a nit a,’ lei tin la.

⁷Ani khan, ‘A ṭhat,’ a tin chu kî zôk nîng a ta; khannisela, a ning a thikin chu thil ṭhano tho ai tum a nit iti reh zel roh.

⁸Ringaiihoi takkan lung nen kham inla, ki zianga ni thuthlung siam khah vong mai roh. Khannisela, pualoina nei ki nitin chu nangman ne that zel roh. Îtho rang im ne that rangin ni pa ziangah ne ṭhui kher kher rang?” a ti a.

⁹Jonathana khan, “Khangkah thil kha ingaitua khom ngaitua no roh. Ni chungah thil ṭhano tho ki pan a tum iti ki riat ngânin chu nang ki iril ino rang nî iam im ai nit?” a ti a.

¹⁰Khanungchu, Davida khan Jonathana ziangah, “Ni pan inrum takkan nang lei sâm ta duai ngân sela, tûn im ne ril tâng a ti?” a ti a.

¹¹Jonathana khan Davida ziangah, “Thoi inla, phûlah la va fe rei,” a ti a. Khanchu, phûlah khan munkan an va fe tâk a.

¹²Jonathana khan Davida ziangah, “PUMAPA Israelhei Pathian chu ne repuitu ni riseh. Naktûk neh naktûkkhat hingka tik hunah hin ki pa hang risônpui ki ta, ni chungchâng thu â ṭha tiang a nitin chu ni ziangah mi tirin nang hong iril ki ti.

¹³Khante, ki pan ni chungah thil ṭhano tho a tum a, nang ki hong iril ino a, ni zôkna rang lampui nang ki zong pêk non chu PUMAPA khan a ne ilo lo ne lo sela, kha nêka natinsat khomin kuttum ne tho riseh. PUMAPA chu ki pa zianga ai om ngai angkan ni ziangah om riseh.

¹⁴Ki ring kongkârkah, ni thuthlung rithiang vong ngit inla, ki chungah iamomin om roh; khannisela, ki thi duai tâk a nit khom a,

¹⁵Kumkhuakan ki insungkuahei khah lunginkham bâng no roh. PUMAPA khan ne râlhei murdi rinêng chung ata ân rimang vang tenan khom,

¹⁶ei ruaika thuthlung hi ikhiakin om no riseh. Ikhiakin a omin chu PUMAPA khan kuttum nang ai tho rang a nit,” a ti a.

¹⁷Â thar vangin Jonathana khan ama lungthlungna chingin Davida ziangah ṭong arkhâm nôk a; ama ringna lung ai thlung angkah chian Davida khah lung ai thlung a nit a.

¹⁸Khanungchu, Jonathana khan a ziangah, “Naktûk hi thlathar ruaiṭhe a nit a; ni ṭhungmun a rong rang sikin ni omno a îlang ngêt rang a nit a.

¹⁹Naktûkkhat a îlang ual rang a nit; khasikin, matona ner bîkna ngai mun ngirah khan fe zel inla; lungbuk riliah khan ribih ṭian roh.

²⁰Kâptin itho angkan a kôlah ki thal ithumkah hong kâp ki ta.

²¹Khanungchu, ke som ziangah, ‘Fen la, thalhei khah va zong roh,’ itin tir ki ta. Ke som ziangah khan, ‘En roh, thalhei khah ni sîr tiangah khan a om, lan la, hong roh, ki tin chu PUMAPA ringna chingin kî ti a nit,’ ni ta rangin ningbei iomin iṭi rang îte ai om ino nîng a ti.

²²Khannisela, ke som ziangah khan, ‘En roh, thalhei khah nangma khêl tiangah son a om,’ ki tin chu ropat zel roh; PUMAPA khan nang ai tir infe nîng a ti.

²³Ei ruaika kâra thu ei ithlung chungchâng thu-ah khan chu PUMAPA khan ei ruaika kârah kumkhuakan nen det pêk mai a ti,” a ti a.

²⁴Khanchu, Davida khah phûlah khan arbîk tâk a. Thlathar ruaiṭhe nî-ah khan, rêng Saula khah khalai rikhîl rangin a hong a,

²⁵sûn danga â ṭhungna ngai pial bang kôla â ṭhungnaah khan â ṭhung a. Jonathana khah Saula ridîn a maton takah â ṭhung a, Abnera khah Saula kôlah â ṭhung a; Davida mun kha chu a rong a.

²⁶Nikhomsela, Saula khan kha nî-ah khan chu îte ti mak a, a lungrilin, “A chungah thil im manih a tlung a, a irthiang ino ni ngêt a ti,” a ti a.

²⁷Atûk nôk nî thlathar ruaiṭhe tûk nî-ah khan Davida mun khah a la rong mai a; khanchu, Saula khan a naipa Jonathana ziangah khan, “Ithôm Davida hih mizân neh vuanah hin khalai rikhîl rangin a hong no hi?” a ti a.

²⁸Jonathana khan Saula khah a sâm a, “Davida khan Bethlehema fe a ne ngên ngit ngit a,

²⁹‘Ringaiihoi takkan nen fe roh, khuaah khan kin insungkua ribôlna ruaiṭhe kin inei rang a nit a, ki urênghei khan iom sa rangin an ner cha ngit a; khasikin, lung ni nen kham theiin chu nen fen la, ki urênghei la va mu rong,’ a ti a. Khasikah khan kêng khalai rikhîlna ama munah hin ai om ino a nit,” a ti a.

³⁰Khanungchu, Jonathana chungah khan Saula ning khah a hong thik tâk a, a ziangah, “Invêt pa! Atûnah hin Jesaia naipa Davida khah ni mualinphoina rang neh ni nu mualphoi isak rangin ni thlop iti kî riat a nit.

³¹Davida hi, hi rinêngah a om sung kârkah chu hi ramah hin rêng chang no tin e, iti nî riat ino mani? Atûnah hin fen la, hin va ṭhui roh, a thi ngêt rang a nit,” a ti a.

³²Jonathana khan a pa Saula khah a sâm a, a ziangah, “Îtho sikin im ithat ai nit rang? Îngân im ai tho?” a ti a.

³³Khatenan chu Saula khan ithat itumin Jonathana khah â feiin â khô a; khasikah khan Jonathana khan a pan Davida khah ithat a lei itum ngit a nit iti a riat tâk a.

³⁴Khanungchu, Jonathana kha khalai rikhîlna ata khah ningithik takkan a thoi a, kha nî, thlathar ruaiṭhe sûn niknî-ah khan îte fah khâi mak a. A pa Saula khan Davida mualphoi a sak tak tak sikin arngai a siat tak tak a.

³⁵Atûk zîngah khan Jonathana kha naipangte ṭhuiin phûl tiang Davida neh an mun inkungah khan a fe tâk a.

³⁶A naipang ṭhui ziangah khan, “Itlân inla, ki thal kâphei khah va zong roh,” a ti a. Naipang khah â tlân lâiah khan, a pen tiangah khan thal khah a kâp a.

³⁷Naipang khan Jonathana thal kâp tlâkna mun a va tlungin chu Jonathana khan naipang ziangah, “Thal khah ni khêl vitah son a om dua.

³⁸Khan iding ṭian no roh; rimot inla, rivuak no roh,” a hei ti a. Naipang khan thal khah a rût a, a pu ziangah a hong chôi tâk a.

³⁹Khannisela, naipang khan îte reh mak a, Jonathana neh Davida bang khan thil omzia khah an riat a.

⁴⁰Jonathana khan a naipang khah a riamreihei a pêk a, a ziangah, “Fenla, khuaah lei hang chôi roh dua,” a ti a.

⁴¹Naipang khah a fe zoi nung kaneh chu Davida kha a omna mun lungbuk rili ata khah a hong thoi a, arkhûk a dil a, a mâia rinêng isikin voithumkah â bok a. Jonathana neh an ruaikan an ririam a, an ṭap a; Davida khah Jonathana nêkan a lungril a nat ual a.

⁴²Khanungchu, Jonathana khan Davida ziangah, “Thlangam takkan fe roh dua. PUMAPA khan ei ruaika thuthlung chu nangmah neh ei kârah neh ker chihei neh ner chihei kârah kumkhuakan indet mai riseh,” a ti a. Khanchu, Davida khah a thoi a, a fe tâk a; Jonathana chu khuaah khan a kîr nôk tâk a.