Read Biete 1 SAMUELA 21 Bible Online

1 SAMUELA 21 - Biete bible

1 SAMUELA 21

¹Davida khah Nob khua thiampu Ahimeleka ziangah khan a fe a. Ahimeleka khan rilônthing pumin Davida khah a lei ritongpui a, a ziangah, “Îtho tâk im ni khât bangin teh ni hong tâk a, champui khom hong nei mak che a,” a ti a.

²Davida khan thiampu Ahimeleka ziangah khan, “Rêngin thil itho rangin thu a ne pêk a, ki tho rang rêng rêng khah tute inreh loi rangin he a ne ibe a nit. Ki tlangvâlhei chu mun khatkah ki înkung pêkah khan ner tongpui rangin kî ti pêk a nit.

³Atûnah hin im ifarua ni kuta om? Ibai thliam ringakah ne pen la, khabanah, thil dang nî nei murdi khom kha,” a ti a.

⁴Thiampu khan, “Ibai narân chu nei mang a, ibai rithiang bang kêng kî nei; ni tlangvâlhei khah nupang chungah an rithiangin chu fah thei ni ti,” a ti a.

⁵Davida khan thiampu khah a sâm a, “Nupang chungah chu kin irthiang korong a nit. Sintum narân itho ranga kin fe lua manah khan ki tlangvâlhei khah rivong rithiang takkan an iom ngai a nit a, vuaninta sintum roinpui tak itho rang vângah hin chu an irvong rithiang nôk ual a nit,” a ti a.

⁶Khanchu, thiampu khan Davida chu ibai rithiang khah a pêk tâk a; a san chu kha munah khan Pathian zianga an ilan tâk ibai ti no chu ibai dang zel omak a; PUMAPA zianga an ilan ibai ilui khah nîn tin ibai itharin an ithleng ngai a nit.

⁷Kha nî-ah khan Saula berapu ulian tak, Doega, Edom mi khah PUMAPA maa a tho tum ilen rangin kha munah khan a lei om a.

⁸Davida khan Ahimeleka ziangah khan, “Ifei manih, khandai manih dôn mak chêm? Rêng sinah khan rimot a nang rai sikin ki khandai neh ki riamrei îte ki hong ichôi phâk ino a nit,” a ti a.

⁹Ahimeleka khan, “Filistia mi Goliatha, Ela phâia nî that tâk khandai kha chu a om; thiampu zakorfual penah, puana rituamin a om. Ni nuamin chu lah roh, kha bang ti no chu a dang omak e,” a ti a. Davida khan, “Kha ban im a la zong a, ne peh roh,” a ti a.

¹⁰Khanchu, Davida khah a thoi a, kha nî-ah khan Saula ṭin lâizâm a tho a, Gath rêng Akisa ziangah a fe tâk a.

¹¹Akisa milianhei khan Akisa ziangah, “Hi mi hih an ram rêng Davida khah ni mak im a? Saulan a sânga sâng a that a, Davidan a sînga sîng a that, itia ilâm puma a chungchâng thu nupanghein lâa an isak dur dur khah ni mak im a kha?” an ti a.

¹²Davida khan kha thuhei khah a lungrilah a vong a, Gath rêng Akisa khah a ṭi tak tak tâk a.

¹³Khanchu, kha mihei makungah khan a om dân ân danglam a, an mitmuah khan invêt pelêm a tho a, khopui kotbâihei khah â huat rak rak a, arkha mulheiah khan â suai â khâi duan duan tâk a.

¹⁴Khanungchu, Akisa khan a milianhei ziangah, “En ta u, mi invêt a nit nin riat ṭian a, îtho rang im ki ziangah nin hong iṭhui hi?

¹⁵Invêt ker sam sik im ai nit hi mi hih ân vêt zia inlang ranga nin hong iṭhui? Hi mi hih ki inah a hong ilût rang na?” a ti a.