Read Biete 1 SAMUELA 22 Bible Online

1 SAMUELA 22 - Biete bible

1 SAMUELA 22

¹Davida kha Gath khua ata khah a rot a, Adulam kho kôla ipûkah khan a fe tâk a. A urênghei neh a pa insungmihei murdi khan kha munah khan a om iti an lei riatin chu a ziangah an zu fe tâk a.

²Mi inuaisiahei, lâkai ritânghei, lunghoinona neihei murdi a ziangah khan an ribûm a, mi rizalikah vêl an nit a, an ruaitun a om tâk a.

³Davida chu khantaka ta khah Moab rama Mizpaah a fe a; Moab rêng ziangah khan, “Pathianin thil a ne tho pêk rang ki riat mâkah chu ki nu neh ki pahei hih ni ziangah lei om riseh dua,” a ti a.

⁴Khanchu, Davida khan a nu neh a pahei khah Moab rêng ziangah a mâk a, khangkan, Davida khah ipûkah arbîk sung kârkah chu khan an lei om tâk a.

⁵Khanungchu, zânthla Gada khah Davida ziangah a hong a, a ziangah, “Ipûkah hin om ṭian mai no roh; suak inla Judai ramah fe zel roh,” a ti a. Khanchu, Davida khah a suak a, Hereth ramkârah khan a fe tâk a.

⁶Sûnkah chu Saula kha Gibea khuaah itlânga tamarisk thing nuaiah â fei ichôiin â ṭhung a, a kôl vêlah khan a milianhei murdi khah an iding a. Davida neh a zianga omhei kha an mu tak iti Saula an iril a.

⁷Saula khan a milianhei ziangah khan, “Nangni Benjamina mihei o, ringai rei; Davida khan loihei neh grep rikulhei nangni ai pêk chitin a sipai sâng ruaitun hei, riza ruaitun hei nangni ai siam riai rang im ai nit?

⁸Khasikah khan nin ne iphiarrûk im ai nit? Ki naipan Jesaia naipa zianga thu ai thlung ki zianga inlang rêng rêng omak chei ua, lungkâng ner voipui rêng rêng khom omak chei ua, ki naipan ki sinthotu Davida hi ne doi rang neh vuansûn nî angkana ne that ranga ruang ne chuan ranga â thor thu ki zianga inlang nin iom ino a nit,” a ti a.

⁹Saula milianhei kôla ding Edom mi Doega khan a sâm a, “Davida chu Nob khua, Ahituba naipa Ahimeleka ziangah a hong ki mu a.

¹⁰Ahimeleka khan PUMAPA â sôn pêk a, ifah rang a pêk a, Filistia mi Goliatha khandai khom a pêk sa,” a ti a.

¹¹Khanchu, Rêng Saula khan Ahimeleka neh a suapuihei, Nob khuaa thiampu om murdihei khah ân koi vang a, a ziangah an hong a.

¹²Saula khan Ahimeleka ziangah, “Ahimelek ringai roh,” a ti a. Khante ani khan, “Epu hin ki om,” a ti a.

¹³Saula khan a ziangah, “Îtho sik im nangmah neh Davida hin nin ne iphiar rûk? Îtho sik im ibai neh khandaihei ni pêk a, a ta ranga PUMAPA ni lei îsôn pêk? Atûnah hin a ne idoiin, ruang a ne ichuan ṭian tâk a nit,” a ti a.

¹⁴Ahimeleka khan rêng khah a sâm a, “Davida chu ni milian murdihei lâia mi iamom tak a nit. Ani khah ne mâkpa a nit a, nangma vêngtuhei lâia ulian tak, ni rêng ina mi marit iom tak a nit.

¹⁵A dik, a ta rangin Pathian ke sôn pêk, khan a voikhatna chu ni mak e. Nang iphiar rûk chungchâng thu-ah chu rêng khan keimah manih, ki pa insungkuahei rêng rêng manih nen tum no riseh. Hi chungchângah hin chu îte kî riat ino a nit,” a ti a.

¹⁶Rêng khan, “Ahimelek, nangmah neh ni pa insungkuahei nin ithi ngêt rang a nit,” a ti a.

¹⁷Khanungchu, rêng khan a kôla ding sipaihei ziangah khan, “Fe unla, PUMAPA thiampuhei hih that rei; Davida tiang an ṭang a, lâizâm a tho ti an riat chak khoma ki ziangah an îsîr nuam ino a nit,” a ti a. Khannisela, sipaihei khan PUMAPA thiampuhei chungah khan ithat rangin an kut iṭhum nuam mak a.

¹⁸Khanchu, Saula khan Doega ziangah khan, “Nangman thiampuhei hih that roh,” a ti a. Khante, Edom mi Doega khan an rêngkan a that a. Kha nî-ah khan puanzâi rimi thiampu zakua hâk mi sômiriatka ringakah ai that a nit.

¹⁹Khabanah, Saula khan thiampu khua Nob khah khandaiin a rûn a; nupang, ipa, naipang neh rinunêk lâi idênin, serâthei, sakuartunghei, berahei an rêngkan a that infâi riai a.

²⁰Khannisela, Ahimeleka naipahei lâia khatkah arming Abiathara khah a zôk a, Davida ziangah â tlân thal a.

²¹Abiathara khan Saulan PUMAPA thiampuhei a that thu khah â ril a.

²²Davida khan Abiathara ziangah khan, “Edom mi Doega kha, kha nî-ah khan kha munah a om ki mua rithoka khan Saula iril ngêt ngêt a ti, iti kî riat isai tâk a nit. Khasikin, ni pa insungkua murdihei chu keima sika thi an nit.

²³Nang chu ki ziangah om inla, ṭi no roh. Saula khan nangmah neh keimah, ei ruaikan ne that ai tum a nit; khannisela, ki ziangah ni omin chu zôk ni ti,” a ti a.