Read Biete 1 SAMUELA 24 Bible Online

1 SAMUELA 24 - Biete bible

1 SAMUELA 24

¹Saula kha Filistia mihei a va ûm rizûl zoi nungah khan, “Davida chu Engedi ramchârah a om,” itin an iril a.

²Khanchu, Saula khan Israel mi murdihei lâi ata sipai iṭha rithlang suak ngat mi sângithumkah a ṭhui a, ramkêlhei lêngna ngai lungpui bil tiangah khan Davida neh a mihei izongin an fe tâk a.

³Khante, lam lâiah khan bera rikul ipûk omna hi a va tlung a, Saula chu rithiar rangin a va lût a. Khante, Davida neh a mihei khah ipûk sungril tiangah khan an om a.

⁴Davida mihei khan a ziangah, “Ringai ta, PUMAPA khan ni ziangah, ‘Ne râl kha ni kutah nang pêng ki ta, a chungah ṭha ni ti lam angkah takin thông ni ti,’ ai ti sûn khah a nit tâk hih,” an ti a. Khanungchu, Davida khah a thoi a, idâirek kan Saula puanmôr khah a va ât tan a.

⁵Khannisela, nakanah chu Saula puanmôr a vai ât khan Davida lungril a sun ok a.

⁶Khanchu, a mihei ziangah khan, “PUMAPA riak inrithu ki rêngpa chungah kut ilek tlak loi rangin PUMAPA khan nen om riseh. Ani khah PUMAPA riak inrithu a nit sikin a chungah kut ke lek tlak loi rang a nit,” a ti a.

⁷Khanchu, Davida khan kha thu-ah khan a mihei a khap a, Saula an va doi rang kha phal khâi mak a. Saula kha ipûk ata khah a suak a, a fe nôk tâk a.

⁸Khanungchu, Davida khan a zui a, “Rêngpa, ki Rêngpa,” itin Saula khah â sam a. Saula kha a hang rihêlin chu Davida khan a mâia rinêng isikin chubai a ûn a.

⁹Davida khan Saula ziangah, “Ringai ta, ‘Davidan ni siatna rang ai zong a nit,’ itia mihein ni zianga an îsîr khah îrang im nî ôi ngai hih?

¹⁰Enta vuanah hin PUMAPA khan ipûk sung ngêiah hin ki kuta nang a lan zia hih ni mit ngêiin ni mu thei a, ki mi ṭhenka khan nang ithat rangin an ne tir a; khannisela, ki PUMAPA riak inrithu ni nit sikin nang kî zua a nit.

¹¹Kha bang khom ni loiin, Epa en ta hih ni puanmôr kî chôi ṭian a nit. Nang kî that thei a nit a; khannisela, ni puanmôr kî ât a nit. Amahin thil ṭhano neh thonchâina omak iti neh ki ringna ila tumin ne zong ne zong man inla ni chungah isual mang iti reh ngêt ngêt roh dua.

¹²PUMAPA khan nangmah neh ei chungthu hi rêl sela, PUMAPA khan ki chunga ni thilthoah khan kuttum nang tho riseh. Khanniseh, keiman chu ni chungah kut rêng rêng tlâk no ning e.

¹³Tianlâi thuvâr, ‘Mi suala rithokin sual a hong suak ngai,’ iti ni riat a. Khasikah khan ni chungah kut tlâk no ning e.

¹⁴Israel rêng kha tu zongin im a hong isuak? Tu ngân im a irzûl? Ui ithi manih, a nit nole uirik te kha manih ai zong?

¹⁵PUMAPA khan rêl sela, tukhôk im â dik ino ei init ithlûk riseh. Ki chungthu hi ngaitua sela, ne thlop sela, ni kut ata ne sanisua riseh,” a ti a.

¹⁶Davida khan Saula ziangah hi thu hih a ti zoiin chu Saula khan, “Nangmah, ki naipa Davida kha ni nit na,” a ti a. Saula chu a ṭap ngûi ngûi tâk a.

¹⁷Khanungchu, Davida ziangah khan, “Nangmah ne dik a, keimah ki îdik ino a nit. Nangman chu ki chungah thil iṭha ni tho a, keiman chu thilṭhano ni chungah kî tho a nit.

¹⁸Vuanah hin ki chungah thil iṭha ni thozia ni înlang a nit; PUMAPA khan ni kutah a ne pêk khoma ni ne ithat ino a nit.

¹⁹Mîn â râl mu ngân sela, izôkriam kan a îsua nuam rang mani? Khasikin, vuaninta ki chunga ni thil tho hih PUMAPA khan thil iṭhan nang thung riseh.

²⁰Ringai ta, atûnah hin Israel rêng la ni ngêt ni ta, ni roirêl nuaiah ram chu iding mai a ti, iti kî riat tâk a nit.

²¹Khasikin, ki pa insungkua riming rimang phara a om nona rangin ke nunga ker chihei izua rangin PUMAPA rimingin ṭongrikhâm roh,” a ti a.

²²Khanchu, Davida khan Saula ziangah ṭong arkhâm tâk a. Khanungchu, Saula kha a in tiang a kîr tâk a, Davida neh a mihei chu an ribîkna ngai munah khan an fe nôk tâk a.