Read Biete 1 SAMUELA 25 Bible Online

1 SAMUELA 25 - Biete bible

1 SAMUELA 25

¹Samuela kha a thi a, Israel mi murdihei khah an rikoi bûm a, an sûn a. Khanungchu, Ramah khuaah ama in kôlah khan an phûm tâk a. Kha rizoiah khan Davida chu Paran ramchârah khan a fe a.

²Maon khuaah khan Kaleba richia mi khatkah arming Nabala a om a, Karmel kho kôlah khan mun a nei a, mi richong tak a nit a, bera sângithumkah neh kêl sângkah a nei a. A nupui Abigaili khah nupang beng ivâr mêliṭha tak a nit a. Khannisela, Nabala kha chu mi tikinri tak neh lungril iseh tak a nit a. Nabala khan Karmelah khan a bera mul a voi a.

⁴Davida khan ramchâra rithokah khan Nabalan bera mul a voi iti a lei riat a.

⁵Khanchu, Davida khan tlangvâl sômkah a tir a, tlangvâlhei ziangah khan, “Karmelah fe unla, Nabala ziangah thleng thal unla, ker mingin chibai hang ituh rei.

⁶Nabala ziangah khan hingka hin ti rei, ‘Ni chungah neh ni insungkuahei chungah neh nî nei murdi chungah thlangamna om riseh.

⁷Ni bera mul ivoiin ni om iti ki lei riat a, ni bera vêngtuhei khah ki ziangah hin an om ngai a, an ningsiat îte sin mang ung a, Karmel tlânga an om sung rêng rêng îte ichân mak a.

⁸Ni tlangvâlhei ridon inla nang iril zel an ti. Khasikah khan tlangvâlhei hi lung lei inkham inla; ruaiṭhe sûn takin kin ihong a nit. Ringaiihoi takkan ni nei lam angkah tak kha ni suakhei neh ni malpa Davida hi lei peh roh, Davidan a ti,’ va ti rei,” a ti a.

⁹Davida tlangvâlhei khah an va tlungin chu Davida rimingin kha thu murdi khah Nabala ziangah khan an iril a. Khanungchu, an ngâk tâk a.

¹⁰Nabala khan Davida tlangvâlhei khah a sâm a, “Davida khah tûm ai nit? Jesaia naipa khah tûm ai nit? La reh ngai mang e. Atûn lâiah hin suak itam takka an puhei in ata iro song an itam a nit.

¹¹Ki bu hei, ki tui hei, ki bera mul ivoituhei ranga ki sa that khah tuhei im an init iti khom kî riat phâk inohei hi kî pêk rang?” a ti a.

¹²Davida tlangvâlhei khah an kîr nôk a, Nabala ṭong ti murdi Davida khah an iril a.

¹³Davida khan a mihei ziangah khan, “Nin khandai vong chit rei,” a ti a. Davida khomin a khandai a vong a, mi rizalikah vêlin an zui a, mi rizanikah chu neinun lei ingâk rangin an om a.

¹⁴Nabala suak khatkah khan Nabala nupui Abigaili ziangah khan, “Ringai ta, Davida khan ramchâra rithokin ki pu hong ichibai rangin mi a hong tir a, ani khan a lei ngo a.

¹⁵Nikhomsela, kha mihei khah kin chungah an ṭhat ok a, kin ningsiat îte sin mak a, phûlah kin om lâia munka kin om sung kârkah khan îte ichân mang ung a.

¹⁶Bera enkola an zianga kin om sung kârkah sûn neh zân kin ta rangin dâipui an init ringot a nit.

¹⁷Khasikin, im ni tho rang iṭha takkan ngaitua roh; kin pu chungah neh a insungkua murdihei chungah hin thil ṭhano ai tlung thei a nit. Ani lak hih mi lungril isia, tute irsônpui thei ino a nit a,” a ti a.

¹⁸Abigaili khan rimot takkan ibai thliam rizanikah neh uain ûm inikah neh bera ringakah ri-em inmin thlâm neh bu zêi her sômlei her sarikah neh grep ichâr khû rizakah neh theipui ibai lum rizanikah a lâk a, sakuartung ân pêl a.

¹⁹Khanungchu, â som tlangvâlhei ziangah khan, “Ki matonah fe mai unla, nangni hong zui ki ti,” a ti a. Khannisela, a pasal Nabala kha chu iril mak a.

²⁰A sakuartung chungah a chuanga mual ikot kârah a fe lâiin Davida neh a mihei khah a tong a.

²¹Davida khan a lungrilin, “Hi mi neinun hih ramchârah hin â tlong ringotin kin irung pêk a nit hite; thil iṭha khah thil ṭhanon a ne thung tâk a.

²²Naktûk zîng khovâr ma ngêiin kha miriam pa ta murdi lâia ipa naipang khatka lua khom ki zua a nitin chu Pathianin Davida hi ai lo lo ne lo riseh, kha nêka natinsat khomin ne tho riseh,” a ti a.

²³Khante, Abigaili khan Davida a mun chu a sakuartung ata khah a ṭum zel a, Davida makungah khan a mâia rinêng isikin chubai a ûn a.

²⁴Davida kebula bok pumin a ziangah, “Keiman epu, keimah ngêiin pualoina chu pêl ki ti, ringaiihoi takkan ner ngai pêk roh.

²⁵Ringaiihoi takkan mi chanlamboi Nabala khah îte ringaiin ringai no roh; arming angkah chia chia hi a nit a, Nabala an ti naman, ân tlo a nit hih, keimah ni bôinu lakin ni tlangvâl hong tirhei lak khah ki lei imu no a nit a.

²⁶Khasikin, atûnah hin Epu, PUMAPA ringna neh ni ringna chingin kî ti a nit, PUMAPA khan thisen isua loi rang neh ni kuta phuba lah loi rangin nang a siam a, atûnah hin ne râlhei neh ni chunga thilṭhano tumhei murdi chu Nabala angkan kuttum itho ni riseh.

²⁷Khante, ringaiihoi takkan Epu, hi ni ta ranga thilpêk ki hong ichôi hih ne ham pêk inla, ki pu tlangvâlhei hi ipe ni riseh.

²⁸Ne somnu thonsualna hi ringaiihoi takkan izâ roh. PUMAPA khan insungkua det takin nang inding ngêt ngêt a ti, PUMAPA rang ridoinahei ni doi sikin, ni dam sung kârkah nangmaah khan sualna rêng rêng imuh rang om no nih.

²⁹Nangma rizûl rang neh ni ringna inrimang rangin mihei hong rithok man sela, ni ringna chu PUMAPA ni Pathianin vênginzôk riseh. Ne râlhei ringna kha chu sâilia sâilûm ilôn pai ngai angkan ani khan lônpai a ti.

³⁰PUMAPA khan ni ta rang thil iṭha a lei înkung murdi ni chungah a tho tikah, Israelhei rênga nang a siam tikah khan,

³¹A sik om loia thisen ni isua no a, phuba nî lâk viat ino hi ni ta rangin lunghoi nona manih, insîrna manih rêng rêng ni tlak no nih. PUMAPA khan ni chungah thil iṭha a tho tikah khan ringaiihoi takkan ne somnu hi ringil tlak no roh,” a ti a.

³²Davida khan Abigaili ziangah khan, “Vuaninta ne lei idon ranga nang itirtu PUMAPA Israelhei Pathian chu inpâkin om riseh.

³³Ni bengvârna khah ṭhat ivurin om sela, thisen isua thiamno changna ata nen zôktu neh keima kuta phuba la loia ne siamtu nangmah chu ṭhativurin om roh.

³⁴Nangmah hin ne lei don thap zel non la chu PUMAPA Israelhei Pathian ringna chingin kî ti a nit, naktûk khovâr tenah khin chu Nabala kha naipang khatka lua khom zua pêk tlak no ning e,” a ti a.

³⁵Khanungchu, Davida khan a thil hong chôi pêkhei khah a lâk a, a ziangah khan, “Thlangam takkan ni in tiang kîr nôk ta roh; ni thu khah ki ôi a, ni ngênna kha nang ke pom pêk dua,” a ti a.

³⁶Abigaili chu Nabala ziangah a hang fe a; khante, a inah khan rêng ruaiṭhe angkah dôrkan ruai a lei iṭhe a, ân rui ok sikin Nabala khah a fân vur vur a. Khasikin, atûk khovâr mâkah chu îte iril mak a.

³⁷Khanungchu, zîng tiang Nabala inrui khah a hong harin chu a nupui khan kha thu khah a hang iril a; a lungril a ṭhông rak a, a nang khap tâk a.

³⁸Sûn sômka nungah khan PUMAPA khan Nabala chungah kut a tlâk a, a thi tâk a.

³⁹Davida khan Nabala a thi ti a riatin chu, “Nabalan a ne musitna sika Nabala chunga phuba la a, a suak hih thil ṭhano tho loia ne khaptu PUMAPA chu inpâkin om riseh. Nabala thil ṭhano tho chu PUMAPA khan ama chung ngirah a îṭhum pêk tâk a nit,” a ti a. Khanungchu, Davida khan Abigaili khah a nupui ranga va biak rangin mi a tir a.

⁴⁰Davida somhei khan Karmela Abigaili ziangah an va tlungin chu, “Davida khan a nupui ranga nang iṭhui rangin a ne itir a nit,” itin ani khah an biak a.

⁴¹Abigaili kha a mâia rinêng isikin â bok a, “Ringai ta u, â somnu ki nit a, ki pu somhei ke risuh rangin ki irsiam ṭian a nit,” a ti a.

⁴²Khanchu, Abigaili khah a thoi zel a, sakuartung chungah a chuang a, a nungâk ringakahei neh khan Davida mi tirhei khah an zui a, a nupuiin a om tâk a.

⁴³Davida khan Jezreel mi, Ahinoami a lei nei sa tâk a; khanchu, Abigaili neh khan a nupuiin an om seng seng tâk a.

⁴⁴Kha lâiah khan Saula khan a nainu Mikali, Davida nupui kha, Galim khua mi Laisa naipa Paltia a lei înnei pial tâk a nit.