Read Biete 1 SAMUELA 26 Bible Online

1 SAMUELA 26 - Biete bible

1 SAMUELA 26

¹Zif mi ṭhenkahei kha Gibea khuaah Saula ziangah an fe a, “Davida chu Judai ramchâr kôl Hakila tlângah khan a irbîk ṭian a nit,” itin an va ril a.

²Khanchu, Saula khan Israel mihei lâi ata sipai rithlang ngat mi sângithumkah iṭhuiin Zif ramchârah Davida zong rangin a fe zel tâk a.

³Saula khan Hakila tlânga lampui kôlah khan riabuk a khuar a. Davida chu ramchârah khan a om mai a. Saula chu ama zongin ramchârah a hong iti a riatin chu,

⁴enthlâttuhei a tir a, Saula chu ai hong tak tak a nit iti an riat infel tâk a.

⁵Khanungchu, Davida khah a thoi a, Saula riabuk khuarnaah khan a fe a, Davida khan Saula neh a sipai ruaitu Nera naipa Abnera zâlna khah ân dang a. Saula chu riabuk sungah khan a zâl a, a vêlkan a mihei khan om mun an inrifûk a.

⁶Khanungchu, Davida khan Hit mi Ahimeleka neh Joaba unaipa Abisaia ziangah, “Atu hîm ki zianga Saula riabuka fe rang chei u,” a ti a. Joaba neh Abisaia hei nu chu Zeruii a nit. Abisaia khan, “Keimah ni ziangah khan zuang ki ti,” a ti a.

⁷Khanchu, kha zânah khan Davida neh Abisaia kha Saula riabukah an fe a, Saula chu riabuk inlâina takah khan a lei zâl a, a lu tiangah khan â fei kha rinêngah â dôt mut a. Abnera neh sipaihei khah a vêlkan an lei zâl a.

⁸Abisaia khan Davida ziangah, “Vuanah hin Pathianin ne râl khah ni kutah nang ai pêk a nit hih; khasikin, ifeiah hin voikan rinênga hin la hang sun de khap rong dua, voinika sun nang no nih,” a ti a.

⁹Khannisela, Davida khan Abisaia ziangah, “A chungah kut tlâk no roh, PUMAPA riak inrithu chungah kut itlâka thiam ichang thei tute zel omak e,” a ti a.

¹⁰Davida ngir khan, “PUMAPA ringna chingin kî ti a nit, PUMAPA khan Saula chungah kut tlâk a ti, thi ngai balama a thi nî hong itlungin manih, a nit nole chu ridoinaah fêng a ta, thîng a ti, iti kî riat a nit.

¹¹PUMAPA riak inrithu chungah khan kut ni tlâk no rangzia chu o! Â fei neh a tui ûm kha chu lâng ei ta; khanchu, fêng ei ti,” a ti a.

¹²Khanchu, Davida khan Saula luthluna fei neh tui ûm khah a lâk a, an fe tâk a, tutên mu mak a, tute â ria a, â har omak a. PUMAPA khan inik taka ân in sikin an iin thlar korong a nit.

¹³Khanungchu, Davida kha kiangtiang râlah khan a fe a, itlângsîpah â ding a, an kâr chu ilah tak a nit a.

¹⁴Davida khan sipaihei neh Abnera kha, “Abner ni hang riat thei im?” itin â sam a. Abnera khan, “Tûm â pâi diai a, rêng inṭhangtu khah tu ngân im ni nit kha?” a ti a.

¹⁵Davida khan Abnera ziangah, “Abner, Israelhei lâia mi hâi tak ni mak chêm a? Îtho tâk im rêng, ni pu khah ni rung inzôk no? Atûnah khan rêng ni pu that rangin tu manih riabukah a zuang lût khate.

¹⁶Abner, ni sinnaah lo nî sam a nit. PUMAPA ringna chingin kî ti a nit, PUMAPA riak inrithu ni pu khah ni rung inṭhat no sikin ithi zel inrup ni nit. Rêng luthluna fei neh tui ûm iom khah taktiang im ai om tâk hang en ngân ta,” a ti a.

¹⁷Saula khan Davida rôl khah a hang riat a, “Nangmah ni nitna, ki naipa David?” a ti a. Davida khan, “O Rêngpa, epu keimah ki nit,” a ti a.

¹⁸Davida ngir khan, “Îtho rang sikin im epu ni suak hih ni ne irzûl mai? Îthil im kî tho? Îm ki thonsual ai om?

¹⁹Rêngpa epu, ki thusîr rang hi ringai roh. Ne doi ranga ni lungril chok thoitu khah PUMAPA a nitin chu, a zianga thillan khan a lungril indanglam ngêt a ti; khannisela, miriam naihei an nitin chu PUMAPA maah vânisalin om riseh. Anni khan PUMAPA ram ata khah ram dang pathianhei bang chubai ki ûn theina rang ramah khan an ne iûm rizûl a nit a.

²⁰Khasikin, ki thisen chu PUMAPA mu phâk loi ram dang rinêngah luang no riseh. Îtho rangin im Israel rêng khah keima angkana uirikte that rangin ai hong? Îtho rangin im varung iman ranga itlângheiah ramrivâk ngai mihei angkana a hong isuak hi?” a ti a.

²¹Saula khan, “Thil kî thonsual tâk a nit. Ki naipa David hong kîr nôk ta roh. Vuanzânah hin ki ringna ni zua sikin kut rêng rêng nang itlâk tum khâi no ning e. Thil invêt tak ki lei tho tâk a, ki lei ithonsual ok tâk a nit,” a ti a.

²²Davida khan a sâm a, “O Rêngpa ne fei hin a om, tlangvâl khatkah hong sela, hong lah riseh.

²³PUMAPA khan mi tin an fel neh an iamom man chu ai pêk ngai a nit. Vuanah hin PUMAPA khan nangmah hi ki kutah a ne pêk a; khannisela, PUMAPA riak inrithu chungah ki kut ki îlek nuam ino a nit.

²⁴Vuaninta ni ringna nang ki irngai inlut pêk angkah takah hin PUMAPA khan ki ringna ner ngai inlut pêk sela, lungzîngna murdi ata hi ne sanisua riseh,” a ti a.

²⁵Saula khan Davida ziangah, “Ki naipa David, Pathianin ṭhat nang vur riseh. Ni sinthona kipah manchang suak mai ni ti,” a ti a. Khanchu, Davida kha a fe tâk a, Saula khom a in tiang a kîr nôk tâk a.