Read Biete 1 SAMUELA 27 Bible Online

1 SAMUELA 27 - Biete bible

1 SAMUELA 27

¹Davida khan a lungrilin, “Tikin manih chu Saula kutah hin ki lai thi ngêt rang chu a nit hih; Filistia mihei rama lâizâm itho nêka ṭha ual hi ai om ino rang a nit. Khanchu, Saula khan Israel ram pumpuiah a ne izong hi a beidong tâng a ta; khanchu, a kut ata kî zôk nîng a ti,” a ti a.

²Khanchu, Davida neh a zianga mi rizarukka omhei khah Maoka naipa, Gath rêng Akisa ziangah an fe tâk a.

³Davida kha Gath khuaah Akisa ziangah khan a mihei an insungkua chit neh Davida khom a nupuihei ruai, Jezreel mi, Ahinoami neh Nabala nupui Karmel tlânga om Abigaili hei neh khan an om tâk a.

⁴Davida chu Gath khuah lâizâm a tho ti Saulan a lei riatin chu zong khâi mak a.

⁵Davida khan Akisa ziangah, “Lung nen kham inla, ni rama khua khatka tah hin om mun ne pen la, khan lei om rong. Ni bôi hi îtho rang im rêng khuaah hin ni ziangah ai om mai rang?” a ti a.

⁶Khanchu, Akisa khan Ziglag khua khah a pêk tâk a; khasikah khan Ziglag kha atûn tenan Judai ram rênghei ta ai nit mai tâk a nit.

⁷Davida kha Filistiahei ramah khan kumkah neh thla likah ai om a nit.

⁸Kha sungah khan Davida neh a mihei khah Gesur mihei, Girzi mihei, Amalek mihei irûnin an suak ngai a. Kha namhei khah tianlâi ata Sur ram neh Aigupta ram itlung dapka lei iom ngai an nit.

⁹Nupang, ipa an rêngkan a that riai a, berahei, sialhei, sakuartunghei, saringseihei, an silbomhei a lâk pêk a; khanungchu, a hong kîr nôk a, Akisa ziangah a fe a.

¹⁰Akisa khan, “Vuanah hin taktiang pang im nî rûn?” a ti a. Davida khan, “Judai ram sim tiang hei, Jerameelhei ram hei, Ken mihei omna ramhei,” ai ti pêk a nit.

¹¹Davida khan nupang, ipa an rêngkan a that a, tute Gath a fe a, amah neh a mihei thiltho hang isîr rang khah ai zua ngai ino a nit. Davida khan hingka hin Filistia ramah a om sung kârkah kha chu ai tho mai ngai a nit.

¹²Khannisela, Akisa khan Davida thusîr khah a ôi ngai a, “Ama mi Israelhei khan an nel titak tâk a; khasikin, a ring kongkârkah chu ki sin ai tho mai rang tâk a nit hih,” a ti a.