Read Biete 1 SAMUELA 28 Bible Online

1 SAMUELA 28 - Biete bible

1 SAMUELA 28

¹Zoro sôt ianka nungah khan Filistia mihei khan an sipaihei khah Israel mihei idoi rangin an bûm tâk a. Akisa khan Davida ziangah, “Nangmah neh ni mihei kha keima ne thlopin nin doi rang a nit iti ni riat khateh na,” a ti a.

²Davida khan Akisa ziangah, “O kin riat, ni bôi thiltho thei dân hih nangmah ngêiin mûng ni ti,” a ti a. Akisa khan Davida ziangah, “A ṭhat! Ne vêngtu detin nang siam ki ti,” a ti a.

³Samuela kha a thi tâk a, Israel murdi khan an sûn a. Ama khua ngêi Rama khuaah khan an phûm tâk a. Saula khan thlasân ithiamhei neh dôithiamhei khah a ram ata a ûmisua riai tâk a.

⁴Filistia mihei khah an ribûm a, Sonam khuaah khan ṭangmun an va khuar a. Saula khan Israel mi murdi a bûm a, Gilboah khan ṭangmun a khuar a.

⁵Saula khan Filistia sipaihei khah a mun chu a ṭi a, arlo ân thing tâk a.

⁶Khanchu, PUMAPA â sôn tâk a. Khannisela, PUMAPA khan rimangin manih, Urim neh Thumim imangin manih, zânthla mangin manih sâm khâi mak a.

⁷Khanungchu, Saula khan a milianhei ziangah, “Mithi sôn ithiam nupang ne zong pêk unla, a ziangah fêng ki ta, lei isôn rong,” a ti a. Anni khan a ziangah, “Endor khuaah mithi sôn ithiam nupang khatkah a om,” an ti a.

⁸Khanchu, Saula khah rivoh dangin arvo a, puan danglam a sil a, zânah khan mi dang inikah iṭhuiin nupangnu ziangah khan an fe tâk a; a ziangah khan, “Rithla ne sôn pêk inla, ni zianga arming kî sâm tak khah ne koi suak pêk roh,” a ti a.

⁹Nupangnu khan a ziangah, “Ringai ta, Saula thiltho khah ni riat a, îtho rang im ki thina rangin ki ringah châng nî kam rang hi?” a ti a.

¹⁰Khanungchu, Saula khan ṭong arkhâm a, “PUMAPA ringna chingin kî ti a nit, hi thil sikah hin ni chungah kuttum tlung no nih,” a ti a.

¹¹Khanchu, nupangnu khan, “Tûm nang ki koi suak pêk rang?” a ti a. Saula khan, “Samuela ne koi suak pêk roh,” a ti a.

¹²Nupangnu khan Samuela a hang mun chu â khêk rak a, Saula ziangah, “Ithôm ni ne ilêm, Rêng Saula ni nit ṭian a,” a ti a.

¹³Khante, rêng khan nupangnu ziangah, “Ṭi no roh. Im nî mu tâk?” a ti a. Nupangnu khan Saula ziangah, “Rinênga rithoka pathian hong isuak kî mu a nit,” a ti a.

¹⁴A ziangah, “Im a ang?” a ti a. Nupangnu khan, “Tarpa hi a hong suak a, zakorfual â hâk,” a ti a. Khanungchu, Saula khan Samuela a nit iti a riat a, a mâia rinêng isikin chubai a ûn a.

¹⁵Samuela khan Saula ziangah, “Îtho rang im hingkana ni ne înbuai? Îtho rang im izuang nôk ranga ni ne îsam?” a ti a. Saula khan, “Ke lung ai zîng tak tak a nit, Filistia mihei khan an ne doi a, Pathian lak khan nung a ne song tâk a, zânthla mangin manih, rimangin manih khom ne sâm khâi mak a; khasikah khan ki tho rang ne ril rangin nang kî koi tâk a nit,” a ti a.

¹⁶Samuela khan, “Khangkana PUMAPA khan nung nang a song a, ne râl a hong chang tâk iti ireh ṭiankan îtho rang im thu ni ne irdon?

¹⁷Keima manga a îsîr angkah khan ni chungah ai tho tâk a nit khah. PUMAPA khan ni kut ata ram khah nang a lâk pêk a, Davida khah ai pêk tâk a nit.

¹⁸PUMAPA thupêk zôm loi a, Amalekhei chungah a ningthikna natinsat tak angkah khan len mak che a. Khasikah khan atûnah hin ni chungah hi thil hih ai tho tâk a nit.

¹⁹Kha bang khah ni mak, PUMAPA khan nangmah neh Israelhei khom khah Filistia mihei kutah pêng a ta. Naktûkah hin nangmah neh ni naipahei chu ki ziangah hong om tâng nin ta; PUMAPA khan Israel sipaihei khom khah Filistia mihei kutah pêng a ti,” a ti a.

²⁰Khanungchu, Samuela thusîr sikin Saula chu a ṭi tak tak a, voikazelin rinêngah â lîr a, â tâl ṭian tâk a. Sûn neh zân îte a fâk viat no sikin ritha rivun rêng rêng nei khâi mak a.

²¹Khante, nupangnu khah Saula ziangah a fe a, â lung a dong tak tak iti a riat a; khanchu, a ziangah, “Ringai ta, epu ne somnu hin nî ti murdi khah ki ôi a, ki thi le thi itin ki zianga ni thusîrhei khah ki îpom a nit.

²²Atûnah hin ringaiihoi takkan nang khomin ne somnu thu chu ôi roh dua. Bu ichînteka lua nang inrifûk pêk ki ta; khanchu, ni kîr nôk tikah ritha ni nei theina rangin fah ngêt roh dua,” a ti a.

²³Khannisela, Saula khan nuam mak a, “Îte fah no ning e,” a ti a. Khannisela, a milianhei khom khan fâk izong rangin an tur ngit a, an thu khah a ôi tâk a. Khanchu, rinêng ata kha a thoi a, zâlmunah khan â ṭhung tâk a.

²⁴Nupangnu khan serâtte ai vâi intak ngit khah a that a. Khanungchu, ibaidi a lâk a, â met a, chol pol ino bairiam a siam a.

²⁵Saula neh a milianhei makungah khan khalai a va do a, an lei fâk tâk a. Khanungchu, an thoi a, kha zân ngirah khan an fe tâk a.