Read Biete 1 SAMUELA 29 Bible Online

1 SAMUELA 29 - Biete bible

1 SAMUELA 29

¹Filistia mihei khan an sipai murdihei khah Afek munah an bûm riai a; Israel mihei khan Jezreel phâia tuipût kôlah ṭangmun an khuar a.

²Filistiahei rêng ringakahei khah an sipai riza têl têlhei, sâng têl têlhein an fe zun zun a, Davida neh a mihei khan Akisa lômin nung an khûl a.

³Filistia sipai ruaituhei khan an mu a, “Hi Hebraihei hin im an itho?” an ti a. Akisa khan Filistia ruaituhei ziangah khan, “Amah hi Davida, Israelhei rêng Saula milian a nit, zoro sôt takkah ki ziangah a om tâk a. Ki ziangah a hong ribei ata atûn ten khomah hin â sualna îte ki lai mu no a nit,” a ti a.

⁴Khannisela, Filistia ruaituhei kha Akisa chungah an ning a thik a, a ziangah, “Kha mi khah ni khua pêkah khan tirkîr nôk roh. Ridoinaah khan kin ziangah hong sa no riseh. Khanonchu, ridoinaah khan ei irâlhei tiang ṭang duai a ta, a pu neh ringei nôkna rangin ei mihei lu lâng a ti.

⁵Hi Davida hih ni mak im, nupanghein ilâm pum a, ‘Saulan a sânga sâng a that, Davidan a sîng a sîng,’ itia a chungchâng thu lâa an isak kha?” an ti a.

⁶Khanungchu, Akisa khan Davida kha a koi a, a ziangah, “Israelhei Pathian ringna chingin kî ti a nit, mi dik tak ni nit a, sipaihei lâia ki zianga ni fe a, ridoinaa ni ne idoipui chu kî nuam tak tak a nit. Ki ziangah ni zuang nî ata vuani dênin ni chungah îte ṭhat nona rêng rêng kî mu tlak ino a nit. Khannisela, rêng danghei hin nang an îham ino a nit.

⁷Khasikin, Filistiahei hin an ilung an nen hoina rangin kîr nôk inla, lungihoi takkan fe roh dua,” a ti a.

⁸Davida khan Akisa ziangah, “Epu, im kî thonsual tâk? Ni ti lam angkan ni zianga ki om sung kârkah vuani tenah hin ki thonsualna ni mu non teh, îtho rang sikin im, ki pu neh rêng irâlhei khah doi loiin kî kîr nôk rang tâk?” a ti a.

⁹Akisa khan a sâm a, Davida ziangah, “Â dik, ki mitmuah khan Pathian vântirtôn angkah dôran nî ṭhat a nit. Khannisela, Filistia rêng danghei hin, ‘Ridoinaah kin ziangah fe sa no riseh,’ an ti ngit a.

¹⁰Khasikah khan ni zianga hong sa ni pu Saula somhei neh hin zîng takah thoi unla, khua a vâr kaneh nin rot rang a nit,” a ti a.

¹¹Khanchu, Davida neh a mihei kha Filistia rama kîr nôk rangin zîng takah an suak tâk a, Filistia mihei kha chu Jezreelah an fe tâk a.