Read Biete 1 SAMUELA 3 Bible Online

1 SAMUELA 3 - Biete bible

1 SAMUELA 3

¹Naipang Samuela khan Elia ruaina nuaiah PUMAPA sin khah a tho ngai a. Kha lâiah khan PUMAPA ata thucha a tlung khat invâng a; inlârna khom kha om lile mak a.

²Khante, Elia, a mit khom izîng tâk, îte mu ṭha thei khâi ino khah ama chontanah khan a zâl a.

³Samuela chu Pathian Thuthlung Bôm omna mun, biak inah khan a zâl a. Khovâr ma, meiser la chok mai lâiah khan,

⁴PUMAPA khan Samuela khah a koi a. Samuela khan, “Epu hin ki om,” a ti a.

⁵Khante, Elia ziangah khan a va tlân a, “Hin ki om ni ne ikoi mani?” a ti a. Khannisela, Elia khan, “Nang koi mang e, va zâl nôk ta roh,” a ti a. Khanchu, Samuela khah a fe a, a va zâl nôk tâk a.

⁶PUMAPA khan Samuela khah a koi nôk a. Kha lâiah khan naipang Samuela khan PUMAPA ikoi a nit iti reh mak a, PUMAPA khan a ziangah thu lan puang tlak ngai mak a. Khanchu, Samuela khah a thoi a, Elia ziangah khan a fe a, “Hin ki om, ni ne ikoi im?” a ti a. Khannisela, Elia khan a sâm a, “Nang koi mang e, ki naipa, va zâl nôk ta roh,” a ti a.

⁸A voithumnan PUMAPA khan Samuela khah a koi nôk a. A thoi a, Elia ziangah khan a fe a, “Hin ki om, ni ne ikoi im?” a ti a. Khanungchu, Elia khan naipang khah PUMAPA khan ai koi a nit iti a riat tâk a.

⁹Khanchu, Elia khan Samuela ziangah, “Fen la, va zâl nôk inla, nang a koi nôkin chu, ‘PUMAPA, thusîr roh, ni suak hin arngai ṭian,’ ti roh dua,” a ti a. Khanchu, Samuela khah a va zâl nôk tâk a.

¹⁰PUMAPA khah a zuang a, â ding a, matona a koi lam angkah khan, “Samuel, Samuel,” itin a koi nôk a. Khanchu, Samuela khan, “Thusîr roh; ni suak hin arngai ṭian,” a ti a.

¹¹Khanungchu, PUMAPA khan Samuela ziangah, “Ringai roh, Israel ramah hin â ria murdihei kuar kiangruaika ṭhông lam takkan thil natinsat kî tho rang a nit.

¹²Kha nikhuaah khan Elia insungkua chungchâng thu ki îsîr murdi khah a bula rithokin a mong idênin kî îthlun rang a nit.

¹³A naipahein Pathian an isîr insiatna sual khah ireh chakka a khap no sikin a insungkua khah kumkhuaka rangin kuttum kî tho rang a nit iti ki lei îril thlâm tâk a nit.

¹⁴Khasikin, Elia insungmihei siatna khah ribôlnan manih, thillanin manih, tiklâi khomin inrikiang thei ni no nih itin ṭong ki lei irkhâm tâk a nit,” a ti a.

¹⁵Samuela kha zîng idênin a zâlmunah a om a; khanungchu, a thoi a, PUMAPA in kotkhârhei khah â ong a. Kha inlârna thu khah Elia ril a ṭi a.

¹⁶Khanchu, Elia khan Samuela khah a koi a, “Samuel ki naipa,” a ti a. Samuela khan, “Hin ki om, Epu,” a ti a.

¹⁷Elia khan, “Îthil im PUMAPA khan ni ziangah a îsîr? Ki ziangah îte ip no roh dua. Ni zianga a îsîr murdi khah ki ziangah iip ni neiin chu Pathianin natinsat takkan kuttum nang ai tho rang a nit,” a ti a.

¹⁸Khanchu, Samuela khan îtinrêng â ril infâi riai tâk a; îte ip viat nei mak a. Elia khan, “Ani chu PUMAPA a nit, ṭha a ti lam angkah takin tho riseh,” a ti a.

¹⁹Samuela chu a hong thuar tîr tîr a, a ziangah PUMAPA a om mai a, Samuela ṭongbâi suak murdi chu a hong tlung idik mai a.

²⁰Khanchu, Dana rithoka Beerseba dên rakka Israel mihei murdi khan Samuela chu PUMAPA zânthla ranga indet a nit iti an hong riat tâk a.

²¹PUMAPA chu Siloah khan ân lâr mai a, amakhan PUMAPA kha Samuela ziangah inlârin, ani chu a îsôn ngai a nit. Samuela khan thu â sîrin, Israel mihei murdi khan an irngai ngai a nit.