Read Biete 1 SAMUELA 31 Bible Online

1 SAMUELA 31 - Biete bible

1 SAMUELA 31

¹Filistia mihei khan Israelhei khah Gilboa tlângah khan an doi a. Kha tlângah khan Israel mi itam takka ithatin an om tâk a. Rêng Saula neh a naipahei neh mi danghei kha Filistia mihei ata lâizâm an tho tâk a.

²Khannisela, Filistia mihei khan Saula neh a naipahei khah an rizûl thal a, an môk a, Saula naipahei Jonathana, Abinadaba neh Malkisua hei khah an that a.

³Khante, Saula kha an doi natinsat tak tak a, thal khan a tok tâk a, natinsat takkan a pop a.

⁴A râlthluk ichôitu tlangvâl ziangah khan, “Ni khandai thuat inla, ne that roh; khanonchu, hi sertan inohei hih hong an ta, ne that an ta, ki chungah ripâk duai an ti,” a ti a. Khannisela, a râlthluk ichôitu khan ithat rangin ngam mak a. Khanchu, Saula khan a khandai khah a lâk a, â bô tâk a.

⁵A râlthluk ichôitu khan Saula a thi iti a riatin chu ani khom khah a khandai kha â bô sa a, an ruaikan an thi tâk a.

⁶Khangkah khan Saula neh a naipa ithumkahei neh a râlthluk ichôitu khah an ithi a nit. Kha nî-ah khan Saula mihei murdi an ithi vang a nit.

⁷Israel mi Jezreel phâi kiangtiang râla omhei neh Jordan râl sak tianga omhein, Israel sipaihei lâizâm an tho a, Saula neh a naipahei khah an thi tâk iti an riatin chu an khuahei imah rakin lâizâm an tho tâk a. Khanungchu, Filistia mihei khan an khuahei khah an va lua tâk a.

⁸Ridoi nî tûkah khan Filistiahein an râlthathei irok ranga an va fen chu Saula neh a naipa ithumkahei Gilboa tlânga lei ithi ruak khah an va mu a.

⁹Saula lu khah an tan a, a râlthluk khah an khêng pêk a; kha thurchi khah an mirmil biakna inah neh an mihei zianga inpuang rangin Filistia ramah khan mi an tir vêl tâk a.

¹⁰Khanchu, Saula râlthluk khah Astarothi pathiannu inah an sia a, a ruak khah Bethsan khopui kulbangah an târ tâk a.

¹¹Jabes Gileada omhein Filistia mihein Saula an tho dân chungchâng thu kha an riatin chu,

¹²mihei murdi khah an rithok a, zântluanin an fe a, Saula ruak neh a naipahei ruak kha Bethsan kulbang ata khah an lâk a. Khante, Jabesah an hong chôi ithlun a, khan an hâl tâk a.

¹³Khanungchu, an ruhei khah an rikhôm a, Jabes muna tamarisk thing nuaiah khan an phûm a, sûn sarikah bu an ngei a.