Read Biete 1 SAMUELA 4 Bible Online

1 SAMUELA 4 - Biete bible

1 SAMUELA 4

¹Kha lâiah khan Filistia mihei khah Israelhei idoi rangin an rifo a. Khasikah khan Israel mihei kha Filistia mihei idoi rangin an rithok suak a, Ebenezerah ṭangmun an khuar a; Filistia mihei khan Afeka ṭangmun an khuar a.

²Filistia mihei khah Israel mihei lei idan rangin an lei rizar a; an hang ridoiin chu Filistia mihei maah khan Israel mihei khah an tlôm tâk a, ridoina munah khan sipai sângilikah vêl an that a.

³A la dam sipaihei khah an riabukah an va kîr nôkin chu Israel ruaituhei khan, “Îtho sik im vuanah hin Filistia mihei maah PUMAPA khan a ne întlôm tâk hi o? Ei zianga om a, ei irâlhei kut ata ne saninzôk rangin Silo ata PUMAPA Thuthlung Bôm khah hang lâng ei ti u,” an ti a.

⁴Khanchu, mipuihei khan Siloah khan mi an tir a, khantaka ta khah Cherub chunga ṭhung, Tinrêngthothei PUMAPA Thuthlung Bôm kha an va lâk tâk a. Thuthlung Bôm rualah khan Elia naipahei ruai Hofnia neh Finehasa khom an zuang sa a.

⁵PUMAPA Thuthlung Bômin an riabuk a zuang tlungin chu Israel mi murdihei khah iring takkan an ikhêk dur dur a, rinêng ten khom â tlor dur dur a.

⁶Filistia mihein an ikhêk rihu khah an riatin chu, “Hebraihei riabuka khêk rihu rî dur dur tâk soh îsik im ai nit tâk?” an ti a. Hebraihei riabukah PUMAPA Thuthlung Bôm a zuang itlung a nit iti an riat tâk a.

⁷“An riabukah Pathian ai zuang a nit. Ei chung ân khôk e! Kha mânah khan khangkana khah la om ngai mak a, ei chung ân khôk vang na!

⁸Kha Pathian kut irât tak ata khah tûm nen zôk thei rang a? Kha Pathian khah a nit, ramchâra Aigupta mihei ripui chi tinrênga thattu khah.

⁹O nangni Filistia mihei O, nin suaka an iom angkah khan Hebraihei suakah nin om nona rangin irât takkan om unla pânsal rei; pânsal takkan om unla, pânsal takkan doi rei,” an ti a.

¹⁰Khanchu, Filistia mihei khan irât takkan an doi a, Israel mihei khah an tlôm a, an in tiang chit lâizâm an tho a. An that natinsat tak tak a; Israel mihei sipai sîngithumkah an ithi a nit.

¹¹Pathian Thuthlung Bôm khah an lâk pêk a; Elia naipahei ruai Hofnia neh Finehasa hei khom khah an that sa a.

¹²Sipaihei lâia Benjamina richia mi khatkah risual bual ata khah â tlân a, Silo a hong tlung a, ani khan a puanhei â potthlêr a, a lu-ah ipildi a phul a.

¹³Elia khan lampui kôla a ṭhungmuna ṭhung pumin a lei thlîr ṭian a, Pathian Thuthlung Bôm sikah khan a lungril chu rilônthingin a om a. Kha mi khan khua a hong tlung a, thurchi khah a hang isîrin chu a kho pumin rilônthingin an ikhêk veng vung tâk a.

¹⁴Elia khan an ikhêk irî a lei riatin, “Â rî siai suai soh îtho sik im ai nit,” a ti a. Kha mi khah rimot takkan a va fe a, Elia kha a va ril a.

¹⁵Elia chu kum sômikuakka kum iriatkah mi a nit a, a mit a zîng tâk a, khua mu ṭha thei khâi mak a.

¹⁶Kha mi khan Elia ziangah khan, “Risual bual ata hong izôk ki nit a, vuanah hin risual bual ata lâizâm hong itho ki nit,” a ti a. Elia khan, “Ki naipa ingkan im thil a om?” a ti a.

¹⁷Thurchi hong ithluntu khan a sâm a, “Israel mihei chu Filistia mihei maah khan lâizâm an tho a, mipui lâiah rithatna natinsat tak a om sa a, ni naipahei ruai Hofnia neh Finehasa khom an thi a; Pathian Thuthlung Bôm khom an lâk pêk tâk,” a ti a.

¹⁸Kha mi khan Pathian Thuthlung Bôm thu a hang isîr kaneh chu kotbâi kôla a ṭhungmun ata khah Elia kha a thalin â lîr a, a ring â khiak a, a thi tâk a. Itar tak a nit tâk a, arthân ai zoi khâi ino a nit. Israel chungah kum sômilikah roi ai rêl tâk a nit.

¹⁹Khante, Elia moinu, Finehasa nupui khan nai a vong a, a nai nei zoro a nâi teng tâk a. Pathian Thuthlung Bôm an lâk pêk iti thu a riat a, a pu neh a pasal an thi iti thu khom khah a hang riatin chu â khûn a, naiha khan a sê zel a, nai chu a nei tâk a, khan arzal ok a.

²⁰A thi rang to a, a kôla om nupanghei khan a ziangah, “Ṭi no roh, naiipa ni nei tâk hih,” an ti a. Khannisela, ngaisak viat mak a, isâm khom sâm mak a.

²¹“Roinpuina khan Israel a mâk tâk,” itin naite rimingah khan Ikaboda[3] a sak a.Pathian roinpuina khan Israel a mâk tâk. Pathian Thuthlung Bôm khah an lâk pêk tâk a, a tarpu neh a pasal an thi tâk iti inkhinna a nit.

²²“Pathian Thuthlung Bôm khah mîn an lâk tâk sikin Pathian roinpuina khan Israel ai mâk tâk a nit,” a tina a nit.