Read Biete 1 SAMUELA 6 Bible Online

1 SAMUELA 6 - Biete bible

1 SAMUELA 6

¹PUMAPA Thuthlung Bôm khah Filistia mihei ramah khan thla sarikah a om tenah khan,

²Filistia mihei khan thiampuhei neh dôithiamhei an koi a, “PUMAPA Thuthlung Bôm khah ingkan im kin tho rang tâk? A omna ngaingirah thak kîr nôk rang dân ne ril ta u,” itin an ridon a.

³Anni khan, “Israelhei Pathian Thuthlung Bôm hih nin thak kîr rang khom a, a korongin chu infe tlak no rei, a ziangah siat ribôlna thillan thon sa rei; khanchu, indamin om nin ta, ithôm kuttum nangni ai tho iti reh suak nin ti,” an ti a.

⁴Mipuihei khan, “A ziangah kin siat ribôlna thillana lan rang im kin thon rang?” an ti a. Anni khan, “Filistia rênghei kipkah ipoh rî rilim ringakah neh ichâite rilim ringakah rângkachakin siam rei; nangmani neh nin rênghei chunga rî lêng khah munkah a nit.

⁵Ipoh rî rimil ringakah neh nin ram isehtu ichâite rilim ringaka nin isiamheiah khan Israelhei Pathian khah chôiinrisâng rei. Khanchu, nangmani neh nin pathianhei neh nin ram kha kuttum nangni a tho khâi no duai lôi im.

⁶Faroa neh Aigupta mihein an lungril an înkhir angkah khan ithôm nin lungril nin înkhir rang hi? Aigupta ram ata Israel mihei kha an infe suak mâkah Pathianin anni khah chanlamboia a siam dân khah ringil no rei.

⁷Khasikin, atûnah hin tâli thar inrifûk unla, serâtpui inikah a dût sômlâi, ringkol lân ribât tlak ngai ino khah tâliah khan thlung ikhop unla, an tehei kha chu in tiang hong ṭhui pêk rei.

⁸PUMAPA Thuthlung Bôm khah lah unla, tâlia khan seh unla; siat ribôlna ranga nin thillan rângkachak siamhei kha sumduk dangah thunin a kôlah seh rei. Tâli khah a fena rang lampuiah inrithok unla, a khâtin infe rei.

⁹Khanungchu, en ṭian unla, Beth-Semes khua tiang a fen chu ei chunga thil ṭhano tak itlung hi Israelhei Pathian itho nîng a ti, khangkan a fe non chu kuttum ne thotu khah ama kut ni mak a, ei chungah vânduaina a hong tlung rêng rêng sika nîng a ti,” an ti a.

¹⁰Mihei khan khangkan an tho a, serâtpui a dût sômlâi inikah an ṭhui a, tâliah khan an thlung ikhop a, an tehei khah in tiang an khum a.

¹¹Thuthlung Bôm khah tâliah khan an sia a, rângkachaka siam ichâite rilim neh ipoh rî rilim an siana sumduk khom kha an sia a.

¹²Serâtpuihei khan Beth-Semes tiang ipanin an fe thal thal a; irâm pumin lam ilian khah an zui thal a, changtiang manih voi tiang manih pêt viat mak a. Filistia rêng ringakahei khan Beth-Semes ramrî dênin an zui a.

¹³Beth-Semes khua mihei khah phâizôlah khan an bu an lei ât a, an hang tangin chu Thuthlung Bôm khah an hang mu a, an lôm tak tak a.

¹⁴Tâli khah Beth-Semes khuaa mi Josua loiah khan a hong tlung a, lungpui ilianpa kôlah khan â ding ṭian tâk a. Mihei khan tâli thinghei khah an rikit a, serâtpuihei khah an that a, PUMAPA zianga hâlrivâm thillanin an lan tâk a.

¹⁵Levia chihei khan PUMAPA Thuthlung Bôm neh rângkachak thil ilu omna sumduk khah an chôi a, lungpui chungah khan an sia a. Khanungchu, Beth-Semes khuaa mihei khan kha nî ngirah khan hâlrivâm thillan neh ribôlna thillan danghei PUMAPA ziangah an lan a.

¹⁶Amakhah Filistia rêng ringakahei khan an thlîr mai a, kha nî ngirah khan Ekron khua tiang an kîr nôk tâk a.

¹⁷Filistia mihein rângkachaka an isiam ipoh rî rilim ringakah kha PUMAPA zianga an siat ribôlna ranga an ilan kha; an khopui ringakah: Asdod, Gaza, Askelon, Gath, Ekron hei tuma khatkah chit a nit.

¹⁸Kulpui inei neh nei ino khuaa an rêng ringakahei riming chitin rângkachaka siam ichâite rilim ringakah khah ai ṭang sa a nit. PUMAPA Thuthlung Bôm an ringatna lungpui, Beth-Semes khuaa mi Josua loia om khah atûn tenah hin a lai om mai a nit.

¹⁹Thuthlung Bôm sung an en sikin Beth-Semes khuaa mihei kha PUMAPA khan mi sômsarikah a that a. An lâiah thina natinsat tak PUMAPA khan â thlun sikin mihei khah an ṭap a.

²⁰Beth-Semes khua mihei khan, “Hi Pathian rithiang PUMAPA maah hin tûm â ding thei rang a? Ei ziang ata hih tu zianga tak im ei infe rang tâk na?” an ti a.

²¹Khanchu, Kiriat Jearim khuaa mihei ziangah khan, “Filistia mihei khan PUMAPA Thuthlung Bôm chu an hong sia nôk tâk a, zuang unla, nin ziangah zuang lah rei,” itia ril rangin mihei an tir tâk a.